Kan caman bɛ fɔ waajulikɛyɔrɔ min na, an ka jɛ ka waajuli kɛ yen ɲɔgɔn fɛ

Tuma caman na, mɔgɔw bɛ sɔn joona Masaya cikan na, ni u y’a mɛn kan na min bɛ fɔ u bara. A bɛ se ka kɛ ko o de kosɔn Pantekɔti la, san 33 Krisita tile la, Jehova ye fɛɛrɛ tigɛ walasa “Yahutuw Ala ɲɛsiranbaa” minnu “nana ka bɔ sankolo jukɔrɔ siyaw bɛɛ cɛma”, olu ka kibaru duman lamɛn kan na min bɛ fɔ u “bara”, hali n’a bɛ se ka kɛ ko u tun bɛ kanw fɔ minnu bɛ fɔ ka caya i n’a fɔ Heburukan walima Gɛrɛkikan. (Kɛwalew 2:5, 8) Yɔrɔ minnu na kan caman bɛ fɔ bi, jɛkulu minnu bɛ lajɛw kɛ kan caman wɛrɛw la o yɔrɔw la, olu bɛ se ka jɛ waajulikɛyɔrɔ kelen na. Weleweledala minnu bɛ o jɛkulu suguw kɔnɔ, olu bɛ se ka jɛ ka baara kɛ ɲɔgɔn fɛ cogo di walasa ka seereya di bɛɛ ma u kɛtɔ k’u janto a la u kana to ka segin ka taa waajuli kɛ o waajulikɛyɔrɔ kelen na siɲɛ caman ka tugu ɲɔgon kɔ? Bawo o bɛ se ka mɔgɔw ladimin.

• 

  An ka tɔw hakilinataw ɲini (Ntalenw 15:22): Baara lakɔlɔsibagaw ka kan ka ɲɔgɔn kumaɲɔgɔnya ani ka cogoya ɲuman sɔrɔ min bɛ bɛn jɛkuluw ma walasa ka kibaru duman jɛnsɛn. Jɛkulu minnu bɛ waajuli kɛ kan wɛrɛw la, ni olu ka waajulikɛyɔrɔ ma bon, a bɛ se ka kɛ ko a bɛna diya u ye aw ka pan sow kunna minnu bɛ olu ka kan waajulikɛyɔrɔ la. Nka ni u tɛ se ka u ka waajulikɛyɔrɔ bɛɛ baara tuma bɛɛ ka d’a kan a yɔrɔ ka bon kojugu, a bɛ se ka kɛ ko a bɛ diya u ye aw kana pan so si kunna, nka ni mɔgɔ dɔ y’a jira u ka waajulikɛyɔrɔ la, ko kibaru duman ka di a ye aw ka u ladɔnniya o la. (od 93 § 37) Walima u bɛ se k’a ɲini aw ka jɛkulu fɛ, aw ka u dɛmɛ ka mɔgɔw sɔrɔ minnu bɛ u ka jɛkulu kan fɔ ani ka o mɔgɔw ka ladɛrɛsiw bila ka taa u ka waajulikɛyɔrɔ la. (km 7/12 5, encadré) Aw y’a to aw hakili la ko tuma dɔw la, a bɛ se ka kɛ ko so kelen kɔnɔ kan caman bɛ fɔ. Fɛɛrɛ minnu tigɛra walasa ka waajulikɛyɔrɔ bɛɛ baara k’a ban pewu, olu ka kan ka bɛn sariyaw ma minnu bɛ mɔgɔw ka kunnafoniw lakana cogo bɛɛ kan.

• 

  An ka jɛ ka baara kɛ ɲɔgɔn fɛ (Efesekaw 4:16): An bɛ ɲɛminɛli fɛn o fɛn sɔrɔ ka bɔ an ka baara lakɔlɔsibaga yɔrɔ, an ka tugu olu kɔ koɲuman. Yala an bɛ ka Bibulukalan kɛ dɔw kun minnu ka kanw tɛ an ka jɛkulu kan ye wa? Laala Bibulukalanden bɛ se ka ɲɛtaa kɛ joona ni an ye a ka kalan di jɛkulu walima gurupu dɔ ma min ka surun a la ni a ka kan bɛ fɔ yen.

• 

  An ka an labɛn (Ntalenw 15:28; 16:1): An ka waajulikɛyɔrɔ la, an bɛ kuma mɔgɔ min fɛ da la ni o tigi bɛ kan wɛrɛ fɔ, an ka an seko bɛɛ kɛ ka kibaru duman fɔ a tigi ye. An bɛ se ka an labɛn an kɛtɔ ka kan wɛrɛw fɔbagaw to an hakili la an ni minnu bɛ se ka bɛn ani ka kɔn ka Bibulu bayɛlɛmalenw ani wideyow ta intɛrinɛti kan an ka telefɔniw kɔnɔ. An bɛ se ka baara kɛ fana ni application JW Language ye walasa ka foliw dege kanw dɔw la.