I ni i balima cɛ bɛn fɔlɔ—Cogo jumɛn na?

E k’a miiri ko i bɛ Galile Yesu ka waati la. I taara Jerusalɛm ka taa gakɔrɔsigi seli kɛ. I ni minnu bɛ diinɛ kelen na, dugu falen bɛ olu la, wa u bɛ ka taa bɔ yɔrɔw bɛɛ la. I b’a fɛ ka saraka bɔ Jehova ye. O la i nana ni ba ye i fɛ, i bɛ ka tɛmɛn jama ni ɲɔgɔn cɛ ka taa Alabatosoba la. I selen, i y’a sɔrɔ Alabatosoba falen bɛ jama la minnu fana b’a fɛ ka u ka saraka bɔ. A laban na, waati sera i ma i k’i ka ba di sarakalasebaaw ma. O yɔrɔnin bɛɛ, i hakili jiginna a la yen ko i ye i balima hakɛ ta, a bɛ se ka kɛ ko o bɛ jama cɛla walima dugu kɔnɔ. I ka kan ka min kɛ, Yesu ye o ɲɛfɔ. (Matiyu 5:24 kalan.) O la e, ani i ye i balima min hakɛ ta, aw fila ka kan ka mun de kɛ walasa ka tugu bɛn kɔ iko Yesu y’a fɔ cogo min na? Taamashyɛn kɛ jaabi ɲuman na yɔrɔ fila nata ninnu bɛɛ kɔnɔ.

E KA KAN KA . . .

• kuma ni i balima ye dɔrɔn de, n’a y’a sɔrɔ e fɛ, kun jɔnjɔn b’a bolo ka dimin

• a ɲini ka i balima hakilina latilen ni i y’a ye ko fɛn bɛ don a la joona walima ko a bɛ ko kɛlen turu ta k’a da aw fila kun na

• i balima lamɛn ka ɲɛ ni a bɛ ka kuma i fɛ, hali n’a y’a sɔrɔ i tɛ k’a faamu koɲuman. Ka yafa ɲini a fɛ ni kɔnɔnajɛya ye hakɛ kɛlen kosɔn. Walima i ye ko minnu kɛ a la k’a sɔrɔ i ma bɔ a kalama, ka yafa ɲini a fɛ olu kosɔn

I BALIMA KA KAN KA . . .

• dɛmɛ ɲini mɔgɔ wɛrɛw fɛ jɛkulu kɔnɔ a kɛtɔ ka a fɔ u ye, e ye a dusu bɔ cogo min na

• i kɔrɔfɔ, ani kow kɛra cogo min na ka segin segin o bɛɛ kan, ani k’a ɲini i ka sɔn i ka filiw ma

• waleɲumandɔn jira i la i ka majiginnenya ni i ka jagɛlɛya kosɔn walasa ka gɛrɛ a la ani k’a bɔ a dusukun na ka yafa i ma

Hali ni an tɛ bagan saraka bɔ an ka bato la bi, ka bɛn sigi an ni an balimaw cɛ, jɛɲɔgɔnya min bɛ o ni bato cɛ Ala bɛ sɔn min ma, Yesu ye an kalan mun de la o ko la?