Jehova ye sariyakolo minnu di jogo ta fan fɛ an ka olu kɔkɔrɔdon

Jehova Ala ye sariyakolow di hadamadenw ma jogo ta fan fɛ. Misali la, a ye furu sigi walasa o ka kɛ jɛɲɔgɔnya ye badaa cɛ ni muso cɛ. (Matiyu 19:4-6, 9) Jogo juguya fan si man di a ye cɛnimusoya ta fan fɛ. (1 Kɔrɛntekaw 6:9, 10) Wa hali a fana ye sariyakolow di finidoncogo ani kun labɛncogo kan a ka mɔgɔw ma, o min tun bɛ olu ni mɔgɔ tɔw bɔ ɲɔgɔn na.—Dutɛrɔnɔmɛ 22:5; 1 Timote 2:9, 10.

An ka bi diɲɛ kɔnɔ, mɔgɔ caman banna Jehova ka sariyakolow la. (Romɛkaw 1:18-32) U y’a to jama hakilina ka nɔ bila u ka finidoncogo, u ka kun labɛncogo ani u taamacogo la. Mɔgɔ caman bɛ u ka jogojuguyakow da kɛnɛ kan, wa u bɛ mɔgɔw kɔrɔfɔ minnu tɛ sɔn u ka o jogojuguyakow ma.—1 Piɛrɛ 4:3, 4.

Ikomi an ye Jehova Seerew ye, an ka kan ka Ala ka sariyakolow jogo ta fan fɛ kɔkɔrɔdon ni jagɛlɛya ye. (Romɛkaw 12:9) An bɛ o kɛ cogo jumɛn na? Min ka di Jehova ye an ka kan k’a ɲini ka o jira mɔgɔw la ni bonya ye. Nka an mago b’a la fana ka sariyakolo kɔrɔtalenbaw mara an ka ɲɛnamaya kɔnɔ. Misali la, ni an bɛ fini dontaw ni kun labɛncogo sugandi, an ka kan ka an yɛrɛ ɲininka ko: ‘Ne bɛna min sugandi yala o ni Jehova ka sariyakolow de bɛ taa ni ɲɔgɔn ye wa, wala o ni diɲɛ taw de bɛ taa? Yala ne ka finidoncogo ni ne ka kun labɛncogo b’a jira ko ne ye krecɛn ye, min bɛ siran Ala ɲɛ wa?’ Walima ni an b’a fɛ ka teleso porogaramu walima ka filimu dɔ filɛ, an ka kan ka an yɛrɛ ɲininka ko: ‘Yala o teleso porogaramu in ko ka di Jehova ye wa? O teleso in bɛ sariyakolo jumɛnw de kɔkɔrɔdon jogo ta fan fɛ? Ne bɛ sugandili min kɛ ɲɛnajɛ ta fan fɛ, yala o bɛ ne barika dɔgɔya ka ɲɛsin jogo ɲuman lafasali ma wa? (Zaburu 101:3) Yala o bɛ se ka kɛ an ka denbaya kɔnɔmɔgɔw walima mɔgɔ wɛrɛw kunnatiɲɛ sababu ye wa?’—1 Kɔrɛntekaw 10:31-33.

Mun na a nafa ka bon kosɛbɛ an ka Jehova ka sariyakolow kɔkɔrɔdon jogo ta fan fɛ? Sɔɔnin, Krisita Yesu bɛna mɔgɔ juguw bɛɛ halaki. (Ezekiɛl 9:4-7) Mɔgɔ minnu bɛ ka Ala sago kɛ, olu dɔrɔn de bɛna to yen. (1 Yuhana 2:15-17) O la, Jehova ye sariyakolo minnu di jogo ta fan fɛ an ka taa a fɛ ka olu kɔkɔrɔdon. O cogo la, mɔgɔw na an ka kɛwale ɲumanw ye ka Ala tanu olu kosɔn.—1 Piɛrɛ 2:11, 12.

WIDEYO MIN TƆGƆ YE KO DEVIENS L’AMI DE JÉHOVAH—UN HOMME, UNE FEMME O JIRA, O KƆ AW YE NIN ƝININKALI NINNU SƐGƐSƐGƐ:

• Mun na hakilitigiyako don ka ɲɛnamaya kɛ ka kɛɲɛ ni Jehova ka sariyakolow ye?

• Mun na bangebagaw ka kan ka kɔn ka u denw kalan Jehova ka sariyakolow la jogo ta fan fɛ kabini u denmisɛnma?

• Denmisɛnw ni mɔgɔkɔrɔbaw bɛ se ka mɔgɔw dɛmɛ cogo jumɛn na u ka nafa bɔ Ala ka ɲumanya la?