N’i BarokƐƝƆgƆn BƐ Kan WƐrƐ FƆ
1. Yesu ye ci min fɔ, n’o ye ka taa siyaw bɛɛ la ka u kɛ a ka kalandenw ye, munna o ye ko gɛlɛn ye an bolo tuma caman na?
1 “Jehowa ka ɲi mɔgɔw bɛɛ ma, a bɛ hinɛ a ka dafɛnw bɛɛ la.” (Zab. 145:9, Bible senuma) An Dabaga tɛ mɔgɔ bɔ mɔgɔ la. An b’o ye min na, o ye ko Masaya bɛ jigiya min di an ma, o jigiya bɛ mɔgɔ bɛɛ ye, i kɛra cɛ walima muso ye, i siya, i ka jamana walima i bɛ kan min fɔ, o mana kɛ fɛn o fɛn ye. Ikomi an b’an jija ka Ala ladege. o de kosɔn an ka kan k’an seko bɛɛ kɛ ka o ɲumanya sugu jira. Cogo jumɛn na? An b’o jira n’an bɛ tugu Yesu ka ci fɔlen na, n’o ye ko: “A’ ye taa siyaw bɛɛ la ka u kɛ ne ka kalandenw ye.” (Mat. 28:19) O baara bɛ se ka kɛ gɛlɛya yɛrɛyɛrɛ de ye jamanaw kɔnɔ minnu bɛ an ka Tɔn bolofara ka bolo kan. Kan caman bɛ fɔ an ka waajulikɛyɔrɔ fanba la. Ka fara o kan, gofɛrɛnɛman b’a ka sariyaw sɛbɛn kan min na, dugulen caman tɛ o mɛn i n’a fɔ kan minnu bɛ fɔ sigida la. O kan minnu bɛ fɔ sigida la, caman bɛ olu dɔ la kelen de mɛn kosɛbɛ, nka u tɛ se ka o kalan. O la sa, cogo jumɛn na an bɛ se ka tugu Yesu ka ci fɔlen na i ko a y’a fɔ cogo min na, ani ka Paul ladege, ale min ye a “yɛrɛ kɛ fɛn bɛɛ ye bɛɛ kosɔn”?-1 Kɔr. 9:22.
2. N’an bɛ ka waajulibaara kɛ ani ka mɔgɔw kalan, ni dɔ y’a jira ko kibaru duman ka di a ye, an bɛ se ka o tigi dɛmɛ cogo jumɛn na alako ta fan fɛ, n’a y’a sɔrɔ a bɛ kan wɛrɛ de mɛn kosɛbɛ?
2 I barokɛɲɔgɔn bɛ kan min faamu kosɛbɛ: A ka ɲi ka to an hakili la kɛrɛnkɛrɛnnenya la, ko n’an bɛ ka waajuli kɛ, an kuntilenna ye ka mɔgɔw kɛ kalandenw ye, k’u kalan tiɲɛ ko la. (Mat. 28:19, 20) N’an bɛ mɔgɔw kalan tiɲɛ ko la, an ka kan ka o kɛ kan na, u bɛ min faamu kosɛbɛ. (1 Kɔr. 14:9) O la sa, ni weleweledala bɛ ka waajuli kɛ da ni da, n’a ye mɔgɔ sɔrɔ min bɛ kan dɔ mɛn kosɛbɛ n’o bɛ fɔ sigida la ka tɛmɛ an yɛrɛ bɛ kan min fɔ, weleweledala ka kan k’a jija ka seereya kɛ a ye o kan na. N’a barokɛɲɔgɔn y’a jira ko kibaru duman ka di a ye, a ka kan ka to ka taa bɔ a ye. Weleweledala bɛ se ka gafenin kɔnɔkuma jira a la min tɔgɔ ye ko une bonne nouvelle pour des gens de toutes nations walisa k’a ladɔnniya kibaru duman yɔrɔ kolomaw na. N’a barokɛɲɔgɔn y’a jira ko kibaru duman ka di a ye, mɔgɔ min bɛ i barokɛɲɔgɔn ka kan mɛn, n’o bɛ weleweledala ka jɛkulu la walima jɛkulu dɔ wɛrɛ la min ka surun a la, o tigi bɛ se k’a dɛmɛ. Mɔgɔ min y’a jira ko kibaru duman ka di a ye, Bibulukalan bɛ se ka kɛ a kun, kan na a bɛ min faamu kosɛbɛ, hali ni a tɛ se ka o kan sɛbɛnnen kalan. Ni lajɛw bɛ kɛ a ka jɛkulu la, kan kelen walima kan caman na i barokɛɲɔgɔn bɛ min faamu kosɛbɛ, weleweledala bɛna dusu don a kɔnɔ, walisa a ye kan min sugandi, a ka taa o lajɛw la. O bɛ se ka kɛ ni jɛkulu caman bɛ lajɛ kelen walima lajɛ caman kɛ kanw na minnu bɛ fɔ kosɛbɛ u ka waajulikɛyɔrɔ mɔgɔw fɛ. Yɔrɔ min na lajɛw tɛ kɛ kan na i barokɛɲɔgɔn bɛ min mɛn, weleweledala bɛ se ka dusu don a kɔnɔ a ka taa sigida jɛkulu ka lajɛw la. An Kretiɛn ɲɔgɔn ka jɛɲɔgɔnya dama bɛ se ka dusu don mɔgɔ kɔnɔ. (Mat. 18:20) An ka to an hakili la ko an kuntilenna ye ka mɔgɔw kɛ kalandenw ye.
3. An bɛ se ka kɛ cogo jumɛn na ni jɛkulu caman bɛ baara kɛ waajulikɛyɔrɔ kelen na?
3 Baarakɛcogo ɲuman an ni ɲɔgɔn cɛ: Yɔrɔ dɔw la, jɛkulu fila minnu tɛ kan kelen fɔ, olu bilala ka waajulikɛyɔrɔ kelen baara. O yɔrɔ sugu la, ni weleweledala bɛ ka waajuli kɛ nbɛda la walima ka senfɛ seereya kɛ, a mana mɔgɔ o mɔgɔ ye, a bɛ se ka kuma o tigi fɛ. Mɔgɔ minnu bɛ siginfɛw ka kan fɔ, olu sen bɛ o mɔgɔw la. A bɛ se ka sɛbɛn di u ma kan na, u yɛrɛ b’a fɛ k’a kalan kan min na. Nka, n’a bɛ ka waajuli kɛ du ni du waajulikɛyɔrɔ la, ni kulu dɔ walima jɛkulu wɛrɛ bɛ ka o waajulikɛyɔrɔ kelen baara, mɔgɔ minnu bɛ o waajulikɛyɔrɔ la, n’u bɛ o kulu walima o jɛkulu ka kan dɔ la kelen mɛn kosɛbɛ, o mɔgɔw ka so ka kan ka to o jɛkulu weleweledalaw bolo. Ni jɛkulu caman bɛ ka waajulikɛyɔrɔ kelen baara, sɛbɛn o sɛbɛn ɲɛsinnen bɛ o baara ma, olu marako ɲuman nafa ka bon kosɛbɛ. Baara lakɔlɔsibagaw ka kan ka ɲɔgɔn kumaɲɔgɔnya, wa, baara ka kan ka kɛ cogo min na bɛɛ ka nafa kama, u ka kan ka o kow labɛn.-Nta. 11:14.
4. Kirayakuma jumɛn de bɛ ka tiimɛ bi?
4 Bibulu tun y’a fɔ kirayakuma na ko kan fɔbaga caman mɔgɔw bɛna kibaru duman mɛn. (Jir. 14:6, 7) An bɛ se halisa ka jamana ni kan bɛɛ mɔgɔ caman wɛrɛw dɛmɛ u ka fara an kan ka Jehowa bato, n’an bɛ nin fɛnw to an hakili la kɛrɛnkɛrɛnnenya la: Waajulikɛyɔrɔ mɔgɔ minnu jogoɲumanw bɛ i n’a fɔ saga jogow, olu ka hɛrɛ alako ta fan fɛ, ani an kuntilenna ka mɔgɔ kɛ kalandenw ye.-Esa. 2:2, 3.