Mɔgɔ minnu bɛ sukasi la, olu dusu saalo
1. Mɔgɔ minnu bɛ sukasi la, munna u mago bɛ dususaalo la?
1 Ni mɔgɔ dɔ ka mɔgɔ kanulen banna, o bɛ digi a la kosɛbɛ. Masaya bɛ jigi min di an ma, o tɛ minnu na, olu ka mɔgɔ dɔ ka saya bɛ digi u la fo ka dama tɛmɛ. (1 Tes. 4:13) Mɔgɔ caman bɛ u yɛrɛ ɲininka, wa, tuma caman na ko: ‘Munna mɔgɔ bɛ sa? Minnu sara, olu bɛ taa min? Ne ka mɔgɔ kanulen min banna, yala ne bɛna o ye tun wa?’ An bɛ mɔgɔ minnu ye foro baara la n’olu bɛ u somɔgɔ walima u teri dɔ ka sukasi la, hakilila dɔw filɛ nin ye walisa ka olu dusu saalo.—Esa. 61:2.
2. Ni an barokɛɲɔgɔn y’a fɔ an ye ko a dusu kasilenba don a ka mɔgɔ dɔ banni ko la, yala an ka kan tuma bɛɛ k’a ɲini ka mɛn o tigi ka so waajuli kama wa?
2 Da ni da la: An barokɛɲɔgɔn bɛ se k’a fɔ an ye ko banni kɛra sisan a ka denbaya kɔnɔ. Yala a dusu kasilenba dɔ wa? Yala du falen bɛ a balimaw la minnu bɛ sukasi la wa? O ko suguw la, a ka fisa i kana mɛn o yɔrɔ la waajuli kama. (Waaj. 3:1, 7) Laala, an bɛ se k’a fɔ a ye ko o ko ma diya an ye, ka sɛbɛndennin walima gafenin walima sɔn-ni-sɔn gafenin di a ma min bɛnnen don, ani ka sira ɲini ka taa. O kɔfɛ sa, an bɛ se ka segin waati bɛnnen wɛrɛ la walisa k’a dusu saalo kosɛbɛ ni Bibulu kɔnɔkumaw ye.
3. An bɛ se ka Bibulu tɛmɛsira jumɛnw jira an barokɛɲɔgɔn na min dusu kasilenba don a ka mɔgɔ dɔ banni ko la, ni a bɛnnen don k’o kɛ?
3 Waati wɛrɛw la, an bɛ se k’a ye ko caman bɛ se k’a fɔ ka tɛmɛ min fɔra dakun filanan na. Hali ni o tɛ a waati ye k’a jira ko hakilila dɔw tilennen tɛ, laala layidu minnu bɛ Bibulu kɔnɔ lakununni kan, an bɛ se ka olu kalan u ye. (Yuh. 5:28, 29) Walima Bibulu bɛ min fɔ mɔgɔ salen cogoya kan, an bɛ se k’o jira a la. (Waaj. 9:5, 10) Bibulu maana min bɛ lakununni dɔ kan, o fana bɛ se ka mɔgɔ dusu saalo. (Yuh. 11:39-44) Kantigi Job ye kuma minnu fɔ walisa k’a jira ko a jigi bɛ Jehowa kan, an bɛ se fana k’o kumaw mafilɛ. (Job 14:14, 15) Sani an ka taa, an bɛ se ka gafeninw di a ma minnu tɔgɔ ye ko Que devient-on quand on meurt ? Quand la mort frappe un être aimé. . . walima gafenin bɛnnen dɔ wɛrɛ walima sɛbɛndennin wɛrɛ min bɛnnen don. Walima an bɛ se ka Qu’enseigne la Bible gafe to a bolo, ka kunnafoniw jira a la minnu bɛ tilayɔrɔba 6 nan na, ani ka fɛɛrɛ tigɛ walisa ka baro kɛ o kan kosɛbɛ, n’an seginna ka na.
4. An bɛ se ka mɔgɔw dusu saalo cogo wɛrɛ jumɛnw fɛ?
4 Cogo wɛrɛw: Ni banni kɛra, wa, ni jɛmu bɛna kɛ Masaya so kɔnɔ, yala mɔgɔw bɛna kɛ yen minnu tɛ Jehowa Seerew ye wa? Sɛbɛn minnu bɛ mɔgɔ dusu saalo, olu ka kan ka sɔrɔ yen o mɔgɔw kama. Tuma dɔw la fana, mɔgɔ minnu banna, olu ka suko bɛ fɔ kunnafonidisɛbɛn kɔnɔ. O bɛ sira dayɛlɛ an ye ka lɛtɛrɛ surun ci banbagatɔ somɔgɔw ma walisa k’olu dusu saalo. Firiyatɔ dɔ n’a denmuso kɛlen ka lɛtɛrɛ dɔ sɔrɔ ani sɛbɛndennin dɔw fana minnu tun bɛ lɛtɛrɛ foroko kɔnɔ, u taara weleweledala ka so k’a ɲininka ko: “Yala e de ye nin lɛtɛrɛ ci an ma wa? O ɲɛna. Ne b’a fɛ ka dɔ fara n ka dɔnniya kan Bibulu ko la.” Cɛ ni a denmuso sɔnna Bibulukalan ma, wa, u y’a daminɛ ka na lajɛw la.
5. Munna an ka kan ka cogow ɲini walisa ka mɔgɔw dusu saalo, mɔgɔ minnu bɛ u ka banbagatɔ dɔ ka sukasi la?
5 Waajulikɛla 7:2 ko: “Ka taa sangabon dala, o ka fisa ni dumuniba so kɔnɔ taali ye.” Mɔgɔ minnu bɛ banbagatɔ dɔ ka sukasi la, tuma caman na, olu ka teli ka Ala ka Kuma lamɛn ka tɛmɛ mɔgɔw kan minnu hakili bɛ ɲɛnajɛkow dɔrɔn na. An kelen-kelen bɛɛ ka kan ka cogo bɛnnenw ɲini walisa ka mɔgɔw dusu saalo, mɔgɔ minnu bɛ u ka banbagatɔ kanulen dɔ ka sukasi la.