“Aw ka kɛ ɲuman dɔnbaaw ye”
1 Yesu ye kunatɔ tan kɛnɛya tuma min na, olu la, kelen dɔrɔn seginna ka na barika da a ye. Yesu ye ɲininkali kɛ ko: ‘Mɔgɔ tan ma saniya wa? U tɔ kɔnɔntɔn bɛ minni?’ (Luka 17:11-19) An Fa Jehowa Ala min bɛ sankolo la, ale ye fonisire ye. A b’an kanu kosɛbɛ. A ye fɛn ɲuman minnu bɛɛ di an ma, an’a ye nilifɛn dafalen minnu bɛɛ k’an ye, a nafa ka bon, o fɛnw ko ka bonya an bolo kosɛbɛ, wa, an k’an ka waleɲumandɔn jira olu ko la.—Kol. 3:15; Yak. 1:17.
2 An ka kan k’an ka waleɲumandɔn jira fɛn jumɛnw ko la? An bɛ Jehowa waleɲumandɔn kunmabɔsara ko la, n’o ye Ala ka nilifɛn bɛɛ la belebele ye hadamadenw ma. (Yuh. 3:16) An bɛ Jehowa waleɲumandɔn fana bawo a ye an sama ka na ale ma. (Yuh. 6:44) Kelenya min bɛ anw ni ɲɔgɔn cɛ jɛkulu kɔnɔ diɲɛ yɔrɔ bɛɛ la, o fana ye kun wɛrɛ ye min kosɔn, an bɛ Jehowa waleɲumandɔn. (Zab. 133:1-3) Siga t’a la ko an bɛ se ka miiri nilifɛn caman wɛrɛw la minnu bɛ bɔ Jehowa yɔrɔ. An t’a fɛ abada ka kɛ waleɲumandɔnbaliw ye i n’a fɔ Israɛl den minnu ɲinɛna Jehowa ka kabakow kɔ, a tun ye minnu kɛ u ye.—Zab. 106:12, 13.
3 Waleɲumandɔn jira: Hali ni kunatɔ tan bɛɛ tun bɛ se ka waleɲumandɔn jira Yesu ka kɛwale ɲuman ko la u fan fɛ, kelenpe dɔrɔn y’a yɛrɛ jira waleɲumandɔnbaga ye. (Luka 17:15) O cogo kelen na, an fana bɛ se k’an ka waleɲumandɔn jira an ka cɛsiri fɛ cidenyabaara la. An Fa ɲuman min bɛ sankolo la, ale ye min kɛ an ye, ni waleɲumandɔn b’an na tiɲɛ na o kow bɛɛ la, an dusukunw bɛna an bila k’a ka kanuya ni a ka fonisireya ladege n’an b’a ka kuma fɔ mɔgɔw ye. (Luka 6:45) O la sa, Jehowa ye ‘kabakow ni a ka ko ɲumanbaw minnu kɛ an ye’, n’an bɛ olu fɔ mɔgɔw ye, kanuya min bɛ an dusukun na ka ɲɛsin a ma, o bɛna bonya, wa a ye ko minnu kɛ an ye, o kow bɛna bonya an bolo kosɛbɛ fana.—Zab. 40:6.
4 An ka dusu don mɔgɔw kɔnɔ u ka waleɲumandɔn jira: An ka kan ka cogow ɲini walisa k’an denw ni an ka Bibulu kalandenw dɛmɛ u ka waleɲumandɔn dege, k’o jira kosɛbɛ. Cogo caman bɛ bangebagaw bolo k’o kɛ, misali la n’u bɛ kuma u denw fɛ Ala ka fɛn dalenw kan. (Rom. 1:20) N’an bɛ ka Bibulu kalan ɲɛminɛ, an bɛ se k’an kalanden ɲininka ko: “Jehowa ye Ala sugu min ye, nin bɛ mun jira an na o ko la?” Ni kalanden ka waleɲumandɔn bɛ ka bonya, kanuya min b’a dusukun na ka ɲɛsin Ala ma o fana bɛna bonya, wa dusu min b’a la k’a ko diya Ala ye, dɔ bɛna fara o fana kan.
5 Nin laban donw na, mɔgɔ caman ye fitiriwalew ye, wa koɲuman minnu bɛ kɛ u ye, o kow man bon u bolo. (2 Tim. 3:1, 2) A ka di Jehowa ye k’a ye ko a ka baarakɛla minnu y’u yɛrɛ di ale ma, olu bɛ waleɲumandɔn jira u ka cɛsiri fɛ cidenyabaara la.—Yak. 1:22-25.