An ka dannayaba seereya
1. Tɔɔrɔko jumɛnw tun kofɔra Yesu fɛ?
1 Tuma min na Yesu tun bɛ ka kuma a ka bɛ-yan waati kan ani diɲɛ laban kan, a ka kalandenw tun y’u tulomajɔ kosɛbɛ. Tɔɔrɔkow tun bɛna hadamadenw sɔrɔ, i n’a fɔ kɛlɛw, kɔngɔw, dugukolo yɛrɛyɛrɛw ani fiɲɛbanaw. O kɔfɛ, Yesu y’a fɔ a ka kalandenw ye ko mɔgɔw bɛna u koniya, k’u don bolo la ka u tɔɔrɔ, k’u faga. Kira nkalontigɛlaw bɛna wuli ka mɔgɔ caman lafili. Mɔgɔ caman ka kanuya bɛna dɔgɔya fana.
2. Munna kabako don ko kibaru duman waajuli bɛ ka kɛ diɲɛ yɔrɔ bɛɛ la?
2 Yesu y’a fɔ a ka cidenw ye tuma min na ko Ala ka Masaya Kibaru Duman waajuli bɛna kɛ diɲɛ yɔrɔw bɛɛ la, ka o tɔɔrɔkow to senna, a bɛ i ko o ye cidenw kabakoya. (Mat. 24:3-14) O kirayakuma min b’an nisɔndiya kosɛbɛ, an ɲɛ b’a la ko o bɛ ka tiimɛ dakabana cogo la bi. Hali ni an bɛ waatiw de la minnu bɛ an ka ɲɛnamaya bila farati la, Jehowa Seerew bɛ ka kibaru duman weleweleda ni u seko bɛɛ ye. Diɲɛ mɔgɔw ka kanuya bɛ ka dɔgɔya, nka, anw ka kanuya bɛ ka bonya ka taa a fɛ. Hali ni “siya bɛɛ” b’an koniya, o bɛɛ n’a ta an bɛ ka waajuli kɛ jamana minnu na, bɛrɛ ma an jɛn an ka o kɛ dugukolo jamana kelen-kelen bɛɛ la.
3. E ye mun de ye waajuli baara dantigɛli kɔnɔna na min kɛra diɲɛ kɔnɔ, n’o bɛ dusu don mɔgɔ kɔnɔ?
3 I ko a jiralen bɛ cogo min na waajuli baara dantigɛli yɔrɔ la nin sɛbɛn ɲɛ 3 nan na ka na ɲɛ 6 nan na, Jehowa Seerew ye baara min kɛ ka ta Sɛtanburukalo san 2006 la ka n’a bila san 2007 Utikalo la, n’an bɛ o lajɛ, o bɛ dusu don an kɔnɔ kosɛbɛ. A san 16 nan de ye nin ye ka tugu ɲɔgɔn kɔ, lɛrɛ miliyari kelen ni kɔ ɲɔgɔn de kɛra waajuli ni kalanden kɛli baara la. O b’a seereya tiɲɛ na ko dannayaba de bɛ Jehowa Seerew la. N’i ye nin hakɛw ni san tɛmɛnen hakɛw suma ɲɔgɔn ma, i b’a ye ko kɛmɛ sarada la, mɔgɔ 5,8 de farala tutigɛbagaw hakɛ kan, mɔgɔ 3,1 farala weleweledalaw hakɛ kan, ani mɔgɔ 4,4 farala Bibulu kalandenw hakɛ kan, ani mɔgɔ 20.1 ni kɔ ɲɔgɔn de farala batiselenw kan kɛmɛ sarada la. K’a ye ko mɔgɔ miliyɔn wolonwula ɲɔgɔn de bɛ ka baara kɛ bi Jehowa ye ni kantigiya ye, n’o ye hakɛ ye min ɲɔgɔn ma sɔrɔ fɔlɔ hadamadenw ka tariku kɔnɔ, o ye nisɔndiyakoba de ye. N’i ye waajuli baara dantigɛli yɔrɔ lajɛ, e ye mun de ye min bɛ dusu don i kɔnɔ kɛrɛnkɛrɛnnenya la?
4. Cɛ dɔ ye ko kolon jumɛnw dabila walisa ka se ka batise?
4 Hali ni hakɛ minnu dilen bɛ yan, olu ka bon kosɛbɛ, an man kan abada ka ɲinɛ ko o hakɛw bɛ mɔgɔw de jira minnu ye u ka dannaya da kɛnɛkan. An ka misali ta Gilɛrimo kan min lamɔna Bolivi jamana na. A wolola san 1935, wa, kabini a san kɔnɔntɔn, a tun bɛ baara kɛ nisɔndiyafuranin foro dɔ la min bɛ wele tubabukan na ko cocaïne. Kabini a denmisɛnman, a tun bɛ farikolo baara de kɛ min ka gɛlɛn kosɛbɛ, o kosɔn a tun bɛ to ka cocaïne furabulu ɲimi walisa ka dɔ bɔ a ka sɛgɛn na. O kɔfɛ, a ye dɔlɔ min fo ka dama tɛmɛ, ka sigarɛti fana min. Gilɛrimo kɛlen ka Bibulu kalan daminɛ, k’a faamu Jehowa bɛ min wajibiya a ma, a ye sigarɛti bila, ka tila ka dɔlɔ fana bila. Fɛn min bilali gɛlɛyara a ma ka tɛmɛ a bɛɛ kan, o kɛra a ka cocaïne furabulu ɲimi ye, a ye min ɲimi kabini a denmisɛnman. A tora ka Jehowa deli fo a sera k’o fana dabila. O ko kolonw bɛɛ bilalen kɔfɛ, a batisera. A ko: “Ne saniyalen don sisan, wa, ne nisɔndiyalen don kosɛbɛ.”
5. An bɛ mun de fɛ?
5 Jehowa b’an jan to mɔgɔw la tiɲɛ na. A b’a fɛ bɛɛ ka se ka nimisa u ka jurumuw la. (2 Pi. 3:9) An fana bɛ o de fɛ. An bɛ Ala deli an dusukunw k’an bila an ka an seko damajira bɛɛ kɛ ka mɔgɔ kɔnɔnajɛlɛnw dɛmɛ ka taa a fɛ walisa u ka se ka Jehowa dɔn, k’a kanu, i ko an yɛrɛ b’a kanu cogo min na.