I kana ban!
1. An “tɛna ban walima ka siga ka koɲuman kɛ” sira jumɛn fɛ?
1 Ni an b’an sen don kosɛbɛ Ala ka Masaya kibaru duman weleweledali la, an tɛna “ban walima ka siga ka koɲuman kɛ” mɔgɔw ye minnu bɛ an ka wajulikɛyɔrɔw la. (Nt.3:27) Kibaru duman tɛ yen k’a fɔ hadamadenw ye min bɛ tɛmɛ nin kan, n’o ye ko waati dumanw na kɛ don nataw la Ala ka mara kɔrɔ. Laala i bɛ ka i timinandiya kosɛbɛ k’a fɔ mɔgɔw ye senfɛ seereya fɛ walima gafew dili fɛ, ko Ala ka masaya de ye hadamadenw jigi ye. O bɛɛ n’a ta, a kɛ i kuntilenna ye ka Bibulukalan ɲɛminɛ, n’i tɛ ka o kɛ fɔlɔ.
2. Mun bɛ se k’an bali ka Bibulukalan daminɛ?
2 Tuma dɔw la, ko belebele minnu b’an bali ka Bibulukalan ɲɛminɛ, olu dɔ la kelen ye, an yɛrɛ bɛ min miiri o ko la. Dɔw bɛ ban ka Bibulukalan ɲɛminɛ bawo u dalen tɛ u yɛrɛ la, walima u bolodegunnen don kosɛbɛ. Hakilila minnu filɛ nin ye, olu bɛ se k’an dɛmɛ walisa an kana siga ka an ta kɛ Bibulukalan baara la. —Mat. 28:19; Kɛw. 20:20.
3. Munna an bɛ se ka mɔgɔw kalan Bibulu la?
3 N’i dalen tɛ i yɛrɛ la: A bɛ se ka kɛ ko i ma kalan ka taa ɲɛ lakɔli la, walima k’a da kun wɛrɛ kan, i dalen t’a la ko i bɛ se ka Bibulukalan ɲɛminɛ. San kɛmɛ fɔlɔ la, Kretiɛn cidenyabaarakɛla ŋanaw tun ye mɔgɔ “gansan kalanbaliw” de ye. Nka, mun y’a to u sera ka mɔgɔw kalan tiɲɛ ko la? ‘U ni Yesu tun bɛ ɲɔgɔn fɛ.’ (Kɛw. 4:13) U degera Karamɔgɔba Yesu de fɛ, ale min ka kalansiraw n’a ka kalan kɛcogow sɛbɛnna ka mara an kosɔn Bibulu kɔnɔ. Hali n’a y’a sɔrɔ i ma taa ɲɛ kosɛbɛ lakɔli kalan na, i ye dɔnniya sɔrɔ alako ta fan fɛ, min ka fisa ni kalan sugu bɛɛ lajɛlen ye —Esa. 50:4; 2 Kɔr. 3:5.
4. An bɛ se ka kalan jumɛn sɔrɔ ka bɔ Amos ka misali la?
4 Tuma dɔw la, Jehowa ye kiraw kɛ baarakɛminɛnw ye walisa ka kuntigiw kɔrɔfɔ minnu ye tilennenya sira bila, ani minnu fana bɛ jɔyɔrɔba la. Dɔw, i n’a fɔ Amos, olu tun tɛ jɔyɔrɔba la. Amos yɛrɛ y’a fɔ ko: “Ne tɛ kira ye, ne tɛ kiraden ye. Ne ye sagagɛnna dama de ye. Ne bɛ balo kungo kɔnɔ torodenw na [Ne ye toroden sɔgɔbaga de ye, NW]” (Amos 7:14) O bɛɛ n’a ta, Amos tun ma ban ka Jehowa ka kiiri kumaw lase Amaziya ma, n’o tun ye misiden-bato sarakalasebaga ye. (Amos 7:16, 17) An ka kan k’a to an hakili la tuma bɛɛ ko an bɛ ka Ala ka baara de kɛ, wa, ale de fana bɛna an kɛ mɔgɔw ye minnu bɛ se ka o baara dilen kɛ. —2 Tim. 3:17.
5. Munna an ka kan k’an jija ka Bibulukalan daminɛ hali n’an bolodegunnen don kosɛbɛ?
5 N’i bolodegunnen don kosɛbɛ: Hali n’i bolodegunnen don kosɛbɛ, a ka c’a la ko i ye waati boloda kaban walisa ka i sen don cidenyabaara la cogo basigilen na. Ka Bibulukalan ɲɛminɛ, o bɛ se ka kɛ cidenyabaara ɲɛ dɔ la kelen ye min bɛ nisɔndiyaba lase i ma kosɛbɛ, wa, o cogo kelenpe de la an bɛ se k’a ye Jehowa ka kuma bɛ se ka baara min kɛ mɔgɔ dɔ ka ɲɛnamaya kɛcogo la. (Heb. 4:12) N’an bɛ kaariya ko dɔw la walisa ka mɔgɔ dɛmɛ “ ka se ka tiɲɛ dɔn,” o ka di Jehowa ye kosɛbɛ. (1 Tim. 2:4) Hali mɛlɛkɛw bɛ nisɔndiya sɔrɔ ni mɔgɔ dɔ nimisara a taamacogo kɔrɔ la, ka ɲɛtaa kɛ alako ta fan fɛ. —Luka 15:10.
6. Jɔyɔrɔ kɛrɛnkɛrɛnnen jumɛn de b’an bolo Ala sago kɛli la?
6 Ala “b’a fɛ mɔgɔw bɛɛ ka kisi ka se ka tiɲɛ dɔn.” (1 Tim. 2:4) Jɔyɔrɔ kɛrɛnkɛrɛnnen de b’an bolo ka baara kɛ ka kɛɲɛ ni Ala sago ye, k’a sɔrɔ an ma ban walima ka siga ka Bibulukalanw ɲɛminɛ.