Baara kɛ ni fɛn yetaw ye minnu bɛ mɔgɔ kalan
1. Walisa ka a ka fɔlɔ baarakɛlaw kalan, Jehowa ye baara kɛ ni fɛn yetaw ye cogo jumɛn na, wa, o ye nɔ jumɛn bila u la?
1 Jehowa ye baara kɛ ni yelifɛnw ni sugow ye tuma dɔw la, walisa ka kunnafoni nafama di a ka fɔlɔ baarakɛlaw ma. E ka miiri Ezekiɛl ka yelifɛn la Jehowa ka sankolola wotoro ko la. (Eze. 1:1-28) E ka miiri fana Daniɛl kɛra cogo min na, a kɛlen kɔ ka kiraya sugo kɛ min y’a jira diɲɛ masayaw bɛna tugutugu ɲɔgɔn kɔ cogo min na. (Dan. 7:1-15, 28) An bɛ se ka mun fɔ Jirali ko la min ɲɛfɔra ni taamasiyɛn ye ciden Yuhana ye, cogo la min bɛ don mɔgɔ la kosɛbɛ, min ɲɛsinnen bɛ kow ma minnu bɛna kɛ “Matigi ka don na”? (Jir. 1:1, 10) Jehowa ye baara kɛ ni dakabanakulɛri ni kabakowale ye walisa ka Ezekiɛl, Daniɛl ni Yuhana kalan, wa, o kow tora u hakiliw la waatijan kɔnɔ.
2. An bɛ se ka baara kɛ ni fɛn yeta jumɛnw ye walisa ka mɔgɔw kalan Bibulu tiɲɛw la?
2 N’an b’a fɛ ka Bibulu tiɲɛw ɲɛfɔ mɔgɔw ye cogo la min tɛna bɔ u kɔnɔ joona, an fana bɛ se ka baara kɛ ni wideyow ye walisa ka mɔgɔw kalan. Barokun caman bɛ an ka wideyow kɔnɔ, wa u bɛ an ka dannaya kologɛlɛya Bibulu la, Jehowa ka jɛkuluba la, ani sariyakolow la minnu b’an kɛ Kretiɛn ɲumanw ye ka taa a fɛ. An k’a lajɛ an bɛ se ka baara kɛ ni wideyow ye sira minnu dɔw fɛ walisa ka mɔgɔw kalan. Nin ye wideyo dɔw de ye, an bɛ se ka baara kɛ ni minnu ye.
3. I bɛ se ka baara kɛ ni mun ye walisa ka Bibulu kalanden ɲɛsin an ka jɛkuluba ma?
3 Cidenyabaara la: Balimaya min bɛ an ni ɲɔgɔn cɛ Kretiɛnya sira la, dugukolo yɔrɔ bɛɛ la, yala Bibulu kalanden dɔ ye o kuma fɔ i ye wa? O jira a la Toute la communauté des frères wideyo fɛ. I bɛ se k’o singa a ma walisa a k’o lajɛ aw ka kalan nata ɲɛ, walima aw bɛ se k’o lajɛ ɲɔgɔn fɛ aw ka kalan nata dɔ la. O kɔfɛ, baro kɛ seginkanni ɲininkaliw kan minnu bɛ san 2003 Awirilikalo An ka Masaya Cidenyabaara kɔnɔ.
4. I bɛ se ka Bibulu kalanden dɛmɛ a ka Bibulu ka se ye cogo jumɛn na?
4 La Bible—une force dans votre vie wideyo ye baarakɛminɛn nafama ye mɔgɔ kuraw ta fan fɛ minnu y’a jira ko kibaru duman ka di u ye. A b’u dɛmɛ u k’a ye nafa minnu b’a la ka Ala ka Kuma kɛ fɛn ye min bɛ u bilasira u ka diɲɛlatigɛ kɔnɔ. La Bible : un livre historique et prophétique ye wideyo kasɛti caman de lajɛlenw tɔgɔ ye. O kasɛtiw la, La Bible—Une force dans notre vie bɛ na yɔrɔ sabanan na. Kɛcogo min ɲɛfɔra dakun 3nan na, i ka baara kɛ ni o ye, ka cogo di i ka kalanden ma a ka a hakilinata di cikan kan min bɛ o wideyo kɔnɔ. Ni a bɛnnen don, baara kɛ ni ɲininkali nataw ye: Mun y’a to mɔgɔ miliyɔn caman sera ka u ka ɲɛnamaya kɛcogo yɛlɛma cogo la min ye u ka ɲɛnamaya kɛcogo ɲɛ u bolo ka taa a fɛ? (Heb. 4:12) Bibulu tɛmɛsira jumɛnw de fɔra walisa ka furuɲɔgɔnw dɛmɛ (a) u k’u ka kumaɲɔgɔnya cogo ɲɛ ka taa a fɛ ani (b) u ka se u yɛrɛ la? Jehowa Ala ye misali dafalen jira a kɛlen ka fɛn saba di denmisɛnw ma, u bɛɛ bɛ minnu fɛ ani u bɛɛ mago bɛ minnu na, cogo di? Bangebagaw bɛ se ka o ɲɔgɔn kɛ bi cogo jumɛn na? (Mar. 1:9-11) Cogo jumɛn na Bibulu ka laadilikan bɛ se ka denbayaw dɛmɛ u ka balo k’a sɔrɔ wari bɛrɛ t’u bolo?
5. Jehowa Seere denmisɛn dɔ bɛ se ka baara kɛ lakɔli la ni fɛn jumɛnw ye minnu bɛ mɔgɔw kalan?
5 Denmisɛnw, aw bɛ se k’a fɔ a ka lakɔli karamɔgɔ ye, ko La fermeté des Témoins de Jéhovah face à la persécution nazie walima Fidèles dans les épreuves —Les Témoins de Jéhovah en Union soviétique wideyow bɛ se ka jira aw ka kalasi kɔnɔ, ni o wideyow bɛ ko jɔnjɔnw kan minnu kɛra tiɲɛ na. Aw k’a fɔ a ye fana ko aw bɛ se ka ɲininkali-sɛbɛn labɛn. Ɲininkali minnu bɛ san 2003 Desanburukalo An ka Masaya Cidenyabaara kɔnɔ, aw ka olu labɛn ka kɛ kalasi ka baro cogo ye.
6. Fɛn jumɛn bɛ bangebagaw bolo, u bɛ se ka baara kɛ ni min ye u ka denbaya ka kalanw na?
6 N’i ka denbaya ani n’i teriw ye: Bangebagaw, aw ka miiri a ka denmisɛnw kɔrɔbayara ka se hakɛ min na, kabini Les jeunes s’interrogent. . . Comment se faire de vrais amis? wideyo bɔra siɲɛ fɔlɔ min na. Mun na aw tɛna o lajɛ kokura aw ka denbaya ka kalan nata la? San 2003 Feburuyekalo walima san 2006 Desanburukalo An ka Masaya Cidenyabaara ye ɲininkaliw labɛn baro ɲɛnama kama, bɛɛ bɛna kuma min na ni kɔnɔnajɛya ye.
7. E ka miiri la, cogo jumɛnw na, baara bɛ se ka kɛ ni an ka wideyow ye?
7 Cogo wɛrɛ minnu bɛ yen: An ka wideyo 20 minnu b’an bolo, i bɛ se ka baara kɛ ni olu ye cogo jumɛnw fana na? I bɛ taa bɔ mɔgɔ min ye tuma bɛɛ, n’i ye wideyo ninnu dɔ la kelen walima u fila jira a la, yali o bɛna a dɛmɛ ka taa ɲɛ alako ta fan fɛ wa? An somɔgɔw, an sigiɲɔgɔnw ni an baarakɛɲɔgɔn minnu tɛ Jehowa Seerew ye, yali wideyo ninnu bɛna u dɛmɛ ka bonya da i kan wa? An ka wideyow ye fɛn nafamaw ye minnu bɛ nɔ bila mɔgɔw la, k’u kalan. Baara kɛ ni u ye walisa ka mɔgɔw kalan.