Ka dakun Bibulu-kalanw ni telefɔni Bibulu-kalanw kɛ minu bɛ taa ɲɛ
1 Ka Bibulu-kalan daminɛ, o ye nisɔndiyako ye dɛ! Nka, ka mɔgɔ sɔrɔ min b’a fɛ ka Bibulu kalan, o y’adaminɛ dɔrɔn de ye. Kalan kuntilenna ye ka mɔgɔ dɛmɛ a ka kɛ Krista ka kalanden lakika ye. (Mat. 28:19-20) Mun bɛ se k’an dɛmɛ k’o kuntilenna sɔrɔ?
2 Mɔgɔw bolo degunnenw: Mɔgɔw bolo degunnen bɛ bi ka taa a fɛ. Yɔrɔ dɔw la, i bɛ mɔgɔ damadɔw de sɔrɔ minnu bɛ sɔn kabini aw siɲɛ fɔlɔ la, ka lɛrɛ kelen dafalen ta Bibulu-kalan kama. Walisa ka se ka o mɔgɔ suguw dɛmɛ, dusu donna an kɔnɔ ka Bibulu-kalanw daminɛ ani k’u ɲɛminɛ so dakun na, walima telefɔni fɛ. A daminɛ na, o kalanw bɛ se ka surunya. Baro bɛ se ka kɛ Bibulu tɛmɛsira damadɔw dɔrɔn kan, ani ka dakun kelen walima fila lajɛ sɛbɛn kɔnɔ, i n’a fɔ Qu’enseigne la Bible ? gafe. Weleweledala caman minnu bɛ ka Bibulu-kalanw ɲɛminɛ sisan so dakun na walima telefɔni na olu bɛ fo kosɛbɛ.
3 Nka, ka to Bibulu-kalanw ɲɛminɛni na so dakun na kudayi, yala o ka kan ka an wasa wa? Ayi. Hali ni o ye hakilitigiya ye ni an ma mɛn kuma na Bibulu-kalan kɛ ko fɔlɔ la so dakun na, san 1990 Mɛkalo Le ministère du Royaume ɲɛ 8nan b’a fɔ ko: “Ni kalan basigira ka ban, ani ni an barokɛɲɔgɔn y’a jira ko kalan ka di a ye, aw bɛ se ka dɔ fara kalan kɛwaati kan.” O nafa ka bon kosɛbɛ. An ka misali ta: Den min ye kɔngɔtɔ ye, a daminɛ na dumuni dɔɔnin-dɔɔnin de bɛ di a ma fo dumuni nege bɛ don a la kokura. Nka, a ka gɛlɛn an ka sigi n’a ye ko o den bɛna se k’a fanga ba sɔrɔ ani ka bonya a cogo la, ni a bɛ balo ni dumuni hakɛ fitinin-fitininw ye waatijan kɔnɔ. O cogo kelen na, Bibulu kalanden mago bɛ kalan na min bɛ kɛ a kɛcogo la, ani tuma bɛɛ Walisa o tigi ka kɔgɔ ka kɛ Ala ka baarakɛla mɔlen ye.—Heb. 5:13, 14.
4 Bibulu-kalan minnu bɛ kɛ so kɔnɔ: A ka fisa Bibulu-kalan ka kɛ yɔrɔ la min mabɔlen bɛ mɔgɔw la—so kɔnɔ walima yɔrɔ wɛrɛ la min bɛnnen don. O bɛna a to kalan bɛ nɔgɔya kalanden ma, k’a dɛmɛ fana a ka Ala ka Kuma kɔrɔ faamu. (Mat. 13:23) O fana bɛna a to karamɔgɔ ka yɔrɔ kalanta labɛn ka kɛnyɛ ni kalanden magow ye. Ka fara o kan, ni Bibulu kalan bɛ kɛ waati kɔnɔ min ka jan, o bɛna a to aw bɛ Ala ka Kuma fɛsɛfɛsɛ, ka kalan kɛ cogo la min bɛ dannaya barika bonya.—Rom. 10:17.
5 An bɛ se ka mun kɛ walisa ka bɔ kalan kɛli la so dakun na, ka na kalan kɛli la so kɔnɔ? Kalan surun caman kɛlen kɔfɛ, mun na i tɛ sin k’a fɔ i barokɛɲɔgɔn ye k’i bɛ se ka Bibulu-kalan kɛ a kun waati pereperelatigɛlen dɔ kɔnɔ, min bɛ mɛn ni aw ka waati kɛta ye. Walima i bɛ se k’a ɲininka ko “Yala i bɛ se ka waati sɔrɔ bi walisa an ka sigi ka baro kɛ nin yɔrɔ kan wa?” walima “E b’a fɛ ka waati hakɛ jumɛn kɛ baro la bi nin barokun kan?” Ni i y’a ɲini ka kalan kɛ a kun so kɔnɔ, nka i ma se, siga t’a la k’i bɛna taa a fɛ Bibulu-kalanw kɛli la so dakun na. Waati bɛnnen na, a ɲini ko kura ka kalan kɛ a kun so kɔnɔ.
6 Mɔgɔ minnu ka kan ni kibaru duman ye, ni an bɛ taa a fɛ k’olu ɲini, an kana ɲinɛ an kuntilenna kɔ, n’o ye ka Bibulu-kalanw daminɛ ani k’u ɲɛminɛ. An kuntilenna ye ka mɔgɔ kɔnɔnajɛlenw dɛmɛ u ka kɛ Jehowa ka baarakɛlaw ye minnu ye u yɛrɛ di a ma, ka batise. K’a sɔrɔ an bɛ ka an ka cidenyabaara kɛ ni o kuntilenna ye, Ala ka duba an ka cɛsiriw ye.—2 Tim. 4:5.
[Study Questions]
1. An kuntilenna ye mun ye ni an bɛ Bibulu-kalanw kɛ mɔgɔw kun?
2. Bibulu-kalan min bɛ kɛ so dakun na ani telefɔni na, olu ye mun ye, ani nafa jumɛn bɛ u la?
3. An bɛ waati min kɛ kalan na so da la, mun na an ka kan k’a ɲini ka dɔ fara o kan?
4. Nafa jumɛnw b’a la ka Bibulu-kalanw kɛ so kɔnɔ?
5. An bɛ se ka mun kɛ walisa ka bɔ kalan kɛli la so dakun na, ka na kalan kɛli la so kɔnɔ?
6. An ka kan ka an ka cidenyabaara kɛ ni kuntilenna jumɛn ye? Hakilila minnu bɛ nin barokun kɔnɔ, o bɛ se k’an dɛmɛ cogo di ka o kuntilenna sɔrɔ?