Aw ye “diɲɛ ka kɛnɛ” kuma fɔ mɔgɔ wɛrɛw ye
1 Kira Esayi sababu fɛ, Jehowa kɔnna k’a fɔ ko: “Siya minnu tun bɛ taama dibi la, olu ye kɛnɛba ye. Minnu sigilen tun bɛ jamana dibima kɔnɔ, kɛnɛ bɔra olu ye.” (Esa. 9:1) O “kɛnɛba” yera Ala yɛrɛ denkɛ Yesu Krista taamacogo la. Yesu ye waajuli baara min kɛ, k’a to dugukolo kan, ani nafa minnu sɔrɔla a ka saraka la, olu ye mɔgɔw cogo ɲɛ kosɛbɛ, mɔgɔ minnu tun bɛ dibi la alako ta fan fɛ. Mɔgɔw mago bɛ o yeelen sugu de la bi, nin waati dibimaw na. Matigi ka surɔfana bɛ cogo kɛrɛnkɛrɛnnen di an ma ka “diɲɛ ka kɛnɛ” kuma fɔ mɔgɔw wɛrɛw ye. (Yuh. 8:12) Salon mɔgɔ miliyɔn caman nana u fara an kan k’a jira ko dannaya bɛ u la, ka Yesu ka ci fɔlen matarafa, n’o ye ko: “A’ ye nin kɛ walisa ka aw hakili to ne la.” (Luka 22:19) Ikomi ɲinan Hakilijigin don bɛ ka surunya, an bɛ se ka mun kɛ walisa ka mɔgɔ wɛrɛw ɲɛsin kɛnɛba ma, Jehowa kɛra o min manamanani sababu ye?—Fil. 2:15.
2 Waleɲumandɔn min bɛ bɔ an dusukun na, an ka dɔ fara o kan: Jehowa ni Yesu ye kanuya min jira an na u kɛlen ka hadamadenw kunmabɔ saraka di, Hakilijigin waati ye hakilijakabɔ waati ɲuman ye o kanuyaba ko la. (Yuh. 3:16; 2 Kɔr. 5:14, 15) Siga t’a la ko o ɲɔgɔn hakilijakabɔ bɛna dɔ fara an ka waleɲumandɔn kan, min bɛ bɔ an dusukun na, ka ɲɛsin o ko senuma ma. Bibulu kalan min bolodara kɛrɛnkɛrɛnnenya la Hakilijigin kama, n’o jiralen bɛ Examinons les Écritures chaque jour gafenin kɔnɔ, Ala ka jamakulu kɔnɔmɔgɔw bɛɛ bɛna waati bila o kalan kama, ani k’a hakilijakabɔ kosɛbɛ o fana kan. Ka miiri Jehowa mankutuw la minnu ɲɔgɔn tɛ, a ye o minnu jira ni nɔɔrɔ ye kunmabɔsara fɛ, o bɛ an bila ka waso ni a ye ko ale ye an ka Ala ye. Kunmabɔsara kɔrɔ ye min ye an kelen-kelen bɛɛ bolo, ni an bɛ hakilijakabɔ o la, o bɛ an ka kanuya bonya ka ɲɛsin Ala ni a Denkɛ ma, kanuya min bɛ bɔ an dusukun na, ka an bila ka an seko damajira kɛ a sago kɛli la.—Gal. 2:20.
3 Jehowa ye fɛɛrɛ min tigɛ an kisili kama, ni an bɛ dɔ fara an ka waleɲumandɔn kan o ko la, Hakilijigin nisɔndiya min bɛ an na, an bɛna o lase an ka Bibulu-kalandenw ma, an ka segin-ka-bɔnyew, an somɔgɔw, an sigiɲɔgɔnw, an lakɔlidenɲɔgɔnw ani an baarakɛɲɔgɔnw ma, ani mɔgɔ wɛrɛw fana ma, an bɛ minnu wele ka na o ko kɛrɛnkɛrɛnnen na. (Luka 6:45) O kosɔn, an k’an cɛsiri kɛrɛnkɛrɛnnenya la ka o mɔgɔ suguw bɛɛ wele u ka na Hakilijigin na, an ka mɔgɔ welesɛbɛnw di u ma walisa u kana ɲinɛ Hakilijigin don kɔ. Weleweledala caman y’a ye ko a nafa ka bon, ni u t’a fɛ ka ɲinɛ mɔgɔ si kɔ, u ka mɔgɔw tɔgɔw sɛbɛn ka bila, u bɛ deli ka mɔgɔ minnu wele Hakilijigin na. Ni san o san mɔgɔ kuraw ka kan ka wele, u bɛ olu tɔgɔw sɛbɛn ka fara tɔgɔ tɔw kan. Ni an b’a kɛ o cogo la, ka an seko bɛɛ kɛ walisa ka mɔgɔw wele ka na Hakilijigin na, minnu y’a jira ko kibaru duman ka di u ye, o bɛna kɛ sira ɲuman dɔ de ye walisa k’a jira Jehowa Ala la, ko an b’a waleɲumandɔn “a ka nili fɛnba kosɔn min ɲɔgɔn tɛ!”—2 Kɔr. 9:15.
4 An bɛ to ka waati min kɛ cidenyabaara la, an ka dɔ fara o kan: An bɛ to ka waati min kɛ cidenyabaara la, yala an bɛ se ka dɔ fara o kan Marisikalo ni Awirilikalo la wa? Ni an b’an cɛsiri ka Krista “nɔɔrɔ kibaru duman” fɔ mɔgɔ wɛrɛw ye, siga t’a la ko Ala bɛna barika don o la. Ka masɔrɔ Hakili ta fan fɛ kɛnɛ bɛɛ bɛ bɔ Jehowa yɔrɔ, a ye nin ci fɔ ko: “Kɛnɛ ka manamana ka bɔ dibi la.” (2 Kɔr. 4:4-6) Maakɔrɔw bɛna fɛɛrɛw tigɛ ka dɔ fara foro baara kɛwaatiw ani a kɛyɔrɔw kan, ni o mago bɛ yen, walisa ka weleweledalaw kɔkɔrɔdon minnu b’a fɛ ka waati caman kɛ cidenyabaara la. Ka nbɛda seereya kɛ sɔgɔma joona fɛ walima ka fɛɛrɛw tigɛ ka waajuli kɛ jagokɛyɔrɔw la, ani telefɔni fɛ wulada fɛ walima wuladanin fɛ, olu bɛɛ sen bɛ maakɔrɔw ka fɛɛrɛ tigɛtaw la. Fɛn min bɛ se k’an dɛmɛ fana ka dɔ fara an ka waati kan cidenyabaara la, o ye k’a boloda ka lɛrɛ hakɛ dɔ kɛ cidenyabaara la ani k’an cɛsiri kosɛbɛ ka se k’o lɛrɛ hakɛ sɔrɔ. Mɔgɔ caman bolo, n’a fɔra ka i seko damajira bɛɛ kɛ Jehowa ye, tutigɛbaga farankanya sen bɛ o la.—Kol. 3:23, 24.
5 Yala aw bɛ se ka kɛ tutigɛbaga farankan ye wa? A ka ca ni san wolonwula ye sisan, dɔ bɔra tutigɛbaga farankanw ka lɛrɛ wajibiyalen na. O yɛlɛma y’a to mɔgɔ caman sera ka nafa ni nisɔndiya sɔrɔ tutigɛbaga farankanya baara la. Yala aw ye o kɛ ka ye wa? Dɔw y’a kɛ u deliko ye ka kɛ tutigɛbaga farankan ye san o san. Jɛkulu caman kɔnɔ, weleweledala caman jɛra ka kɛ tutigɛbaga farankanw ye ɲɔgɔn fɛ. O bɛ kɛ jɛkulu ka san kɔnɔna baara yɔrɔba dɔ ye dugawu bɛ min na. Yala Hakilijigin waati la e fana bɛ se k’a boloda ka kɛ tutigɛbaga farankan ye kalo kelen kɔnɔ, k’o nisɔndiya sɔrɔ wa? Awirilikalo ye kalo ɲuman ye dɔw bolo, bawo sibiri duuru ani kari duuru de bɛ o kalo kɔnɔ.
6 Yala kafo lakɔlɔsibaga y’a boloda ka na bɔ aw ka jɛkulu ye Marisikalo ni Awirilikalo la wa? O ye sira kɛrɛnkɛrɛnnen wɛrɛ dayɛlɛlen ye i ɲɛ. I ko a tun fɔra ka tɛmɛ cogo min na, san 2006 Ala-ka-marako kɔnɔna na, kafo lakɔlɔsibaga bɛ na bɔ jɛkulu ye kalo min na, mɔgɔ minnu ye tutigɛbaga farankanw ye o kalo la, yamaruya bɛna di olu bɛɛ ma u ka se ka ye kafo lakɔlɔsibaga ni tutigɛbagaw ka lajɛ tilancɛ fɔlɔ la, kafo lakɔlɔsibaga bɛna bɔ jɛkulu ye dɔgɔkun min kɔnɔ. Siga t’a la ko kunnafoni barikama minnu bɛna sɔrɔ o lajɛ la alako ta fan fɛ, o bɛna tutigɛbaga farankan caman dɛmɛ ka kɛ tutigɛbaga basigilenw ye. Ka fara o kan, Marisikalo la, an bɛna nisɔndiya sɔrɔ ka mɔgɔw dɛmɛ u ka na hakili ta fan fɛ kɛnɛ na ni Qu’enseigne réellement la Bible ? gafe kura ye. Mun na i tɛ a kɛ i kuntilenna ye ka Bibulu-kalan daminɛ ni o gafe kura ye?
7 N’i bɛ ka jateminɛ kɛ tutigɛbaga farankanw ka lɛrɛ 50 wajibiyalen kan, a lajɛ waatibolodacogo min bɛna se k’i dɛmɛ ka tiɲɛ yeelen bɔ lɛrɛ 12 ɲɔgɔn kɔnɔ, dɔgɔkun o dɔgɔkun. Mɔgɔ minnu sera ka kɛ tutigɛbaga farankanw ye, ani minnu ma deli ka kɛ a ye, a fɔ olu ye. O fɔli bɛ se ka dusu don olu fana kɔnɔ u ka na fara i kan. Denmisɛnniw ani mɔgɔkɔrɔbaw, olu minnu batiselen don, u caman y’a ye ko ni u ye u ka kow labɛn ka ɲɛ, a man gɛlɛn ka se k’o kuntilenna sɔrɔ min ni tanuni ka kan. I ka Jehowa deli a ko la. O kɔfɛ, n’i bɛ se, i ka kow boloda, i ka kɛ tutigɛbaga farankan ye.—Mal. 3:10.
8 Denbaya caman fana y’a ye ko ni u jɛra ka baara kɛ ɲɔgɔn fɛ, o b’a to mɔgɔ kelen ɲɔgɔn ka se ka kɛ tutigɛbaga farankan ye du kɔnɔ. Denbaya dɔ y’a latigɛ ko mɔgɔ duuru minnu batisera du kɔnɔ, cɛ fara muso kan, olu duuru bɛɛ ka kɛ tutigɛbaga farankanw ye. Denmisɛnnin fila tɔ minnu ma batise fɔlɔ, olu ye cɛsiri kɛrɛnkɛrɛnnen kɛ walisa ka dɔ fara u ka waajuli baara kan. Denbaya ye nafa jumɛn sɔrɔ a kɛlen ka dɔ fara a ka cɛsiri kan? U y’a sɛbɛn ko: “A kɛra kalo duman ye ani an y’a ye fana ko o ye denbaya kɔnɔmɔgɔw gɛrɛ ɲɔgɔn na kosɛbɛ. An bɛ barika da Jehowa ye o dakabana dugawu ko la.”
9 An bɛna baara kɛrɛnkɛrɛnnen min kɛ Marisikalo ni Awirilikalo la, yala o bɛna dusu don an kɔnɔ, ka an gɛrɛ kosɛbɛ an sankolola Fa la wa? An ka ɲɛtaasɔrɔ bɛna bɔ kosɛbɛ nin na: Ni an b’an cɛsiri walisa ka an ka Ala ni a Denkɛ kanuya bonya, ani ni an bɛ ka dɔ fara an ka cidenyabaara kan. An ŋaniya ka kɛ i ko zaburusɛbɛnbaga ta, o min ye dɔnkili da ko: “Ne na barikaba da Jehova ye ne da la. Ne na a bonya jamaba cɛma.” (Zab. 109:30) Jehowa bɛna duba an ka timinandiya baara ye nin Hakilijigin waati la. O la sa, an k’a to kɛnɛba ka manamana ka taa ɲɛ walisa mɔgɔ caman wɛrɛw ka se ka bɔ dibi la, ka “ɲɛnamaya kɛnɛ sɔrɔ.”—Yuh. 8:12.
[Study Questions]
1. Kɛnɛba jumɛn de kuma kɔnna ka fɔ Ala ka Kuma kɔnɔ? Ko jumɛn bɛ an ɲɛsin kɛrɛnkɛrɛnnenya la o kɛnɛ ma?
2. An bɛ se ka dɔ fara an ka waleɲumandɔn kan min bɛ bɔ an dusukun na ka ɲɛsin kunmabɔ saraka ma cogo di? N’an ye o kɛ, o bɛ na ni mun ye?
3. An bɛ se ka an ka waleɲumandɔn jira cogo di Hakilijigin ko la?
4. Mun bɛ se k’an dɛmɛ ka dɔ fara an ka waati kɛta kan cidenyabaara la Marisikalo ni Awirilikalo la?
5. Tutigɛbaga farankanw ka lɛrɛ wajibiyalen dɔgɔyara minkɛ, mɔgɔ caman bɛ ka nafa sɔrɔ o la cogo jumɛn na?
6. Nisɔndiyako jumɛnw de sigira sen kan?
7, 8. (a) Mun bɛ se k’an dɛmɛ ka waati boloda walisa an ka kɛ tutigɛbaga farankan ye? (b) Denbaya ka jɛ ka baara kɛ ɲɔgɔn fɛ, o bɛ se ka kɛ dɛmɛ ye cogo di ani denbaya mumɛ bɛ tɔnɔ jumɛn sɔrɔ o la?
9. An bɛ se ka mun kɛ walisa an ka kɛnɛ ka manamana nin Hakilijigin waati la?