Tila 6: Ka Bibulu-kalanw ɲɛminɛ minnu bɛ taa ɲɛ
Ni kalanden ye ɲininkali dɔ lawuli
1 Ni aw ka Bibulu-kalan sigira ka ɲɛ, sanni aw ka to ka barokunw ta aw kunfɛ, min ka ɲi ni a bɛɛ ye, o ye ka kalan kɛ ka kɛnyɛ ni kalansenw sigicogoya ye. O bɛ kalanden dɛmɛ a ka dɔnniya jɔnjɔn jusigi ani a ka ɲɛtaa sɔrɔ. (Kol. 1:9, 10) Nka tuma caman, kalandenw bɛ ɲininkaliw lawuli ko wɛrɛw kan kalan waati. O bɛ ɲɛnabɔ cogo di?
2 Jateminɛ kɛ: Ɲininkali minnu bɛ aw ka yɔrɔ kalanta kan, olu jaabi bɛ se ka di o yɔrɔnin bɛɛ la. Ni ɲininkali lawulilen dɔ jaabi dilen bɛ kɔfɛ gafe kɔnɔ, o fɔ a ye. O bɛ kuma ban. O bɛɛ n’a ta, ɲininkali min ni kalan tɛ sira kelen na, ni o dɔ lawulila, ni o jaabi ɲuman tɛ sɔrɔ ɲininiw kɔ, a ɲuman ye aw ka o koɲɛ lajɛ kalan kɔfɛ walima waati wɛrɛ la. Weleweledala dɔw ka fɔ la, ni i ye o ɲininkali sɛbɛn ka bila, o b’a jira kalanden na ko i ye ale ka ɲininkali minɛ ni sɛbɛ ye ani o b’a to aw ka kalan tɛ jɛgɛn ka taa fan wɛrɛ fɛ.
3 An ka kalan sinsinnen bɛ sɛbɛn minnu kan, Bibulu kalansira caman jateminɛlen bɛ olu kɔnɔ ka surunya. Ni kalanden dɔ ma sɔn Bibulu-kalansira dɔ ma walima ni a nɔrɔlen bɛ dannaya dɔ la min tɛ tiɲɛ ye, o koɲɛ bɛ ɲɛnabɔ cogo di? Sɛbɛn wɛrɛw minnu bɛ Bibulu ka ɲɛfɔli dafalenw di a koɲɛ kan ni aw ye olu lajɛ, o bɛ se ka aw nafa. Nka ni hali o bɛɛ la kalanden ma wasa sɔrɔ a ka ɲininkali la, aw ka a koɲɛ bila ka waati wɛrɛ makɔnɔ, ka tɛmɛ ni aw ka kalan ye. (Yuh. 16:12) Dɔ bɛ to ka fara kalanden ka Bibulu dɔnniya ni a ka ɲɛtaa kan minkɛ, a bɛna o Bibulu-kalansira in faamu don dɔ.
4 Kɛ mɔgɔ ye min ka kow ka nɔgɔn: Ni i dalen tɛ a la ko i bɛ se ka ɲininkali dɔ jaabi di, i yɛrɛ minɛ kuma fɔli la siga bɛ min na. (2 Tim. 2:15; 1 Pi. 4:11) A ɲɛfɔ kalanden ye ko i bɛna ɲininiw kɛ ka sɔrɔ ka na jaabi di a ma. Hali i bɛ se ka ɲinini kɛcogo jira a Fla yɛrɛ. Ɲinini bɛ se ka kɛ ni Jehowa ka jɛkulu ka sɛbɛnw ye cogoya min na, o dɔɔnin-dɔɔnin jira a la. A laban na, a na se o cogo la ka a yɛrɛ ka ɲininkaliw jaabi.—Kɛw. 17:11.