Ala-ka-marako Cidenyabaara Kalanso Dalafɔ-seginnkanni

Ɲininkali ninnu jaabiw bɛna kɛ dalafɔ ye Ala-ka-Marako Cidenyabaara kalanso ka lajɛ la, o min bɛna kɛ Utikalo tile 30nan dɔgɔkun kɔnɔna na, san 2004. Kalan lakɔlɔsibaga bɛna seginnkanni ɲɛminɛ sanga 30 kɔnɔ. O seginnkanni bɛna sinsin kalanw kan minnu kɛra k’a ta Zuluyekalo tile 5 ka na a bila Utikalo tile 30nan na, san 2004. [Kɔlɔsili: Ni ɲininkali dɔ kɔ fɛ, sinsin yɔrɔ ma fɔ, i wajibiyalen bɛ ka i yɛrɛ ka ɲininiw kɛ walisa ka jaabiw sɔrɔ.​—École du ministère mafilɛ ɲ. 36-7.]

JƐMU KƐCOGO ƝUMANW

1. Jigiya min bɛ an na, an bɛ se ka o ɲɛfɔ cogo di ‘ni majigilenya ani bonyali ye’? (1 Pi. 3:​15) [be ɲ. 192 d. 2-4] Ni an bɛ an ka cidenyabaara la, o tɛna kɛ hakilitigiyako ye ka an kumakɛɲɔgɔn ka filiw da kɛnɛ kan cogo la min bɛ a degun ka a danbɛ bɔ a la. A ɲuman ye ka an kumakɛɲɔgɔn ɲininka mun na a bɛ miiri ten ani ka hakilijagabɔ kɛ ni a ye Sɛbɛnninw kan. Ni an bɛ kuma jama ɲɛfɛ jɛkulu kɔnɔ, yanni an ka mɔgɔw kɔrɔfɔ, wala ka u dɔgɔya an ka kan ka u dɛmɛ u ka baara kɛ Ala ye ni u ka Ala-kanu ni u ka ŋaniya ɲuman ye.

2. Nafa jumɛn b’a la k’a jira i kumacogo fɛ ko i dalen bɛ i ka kuma fɔta la? (Rom. 8:​38, 39; 1 Tes. 1:5; 1 Pi. 5:​12) [be ɲ. 194] Mɔgɔ tɔw bɛ a ye ko an bɛ ka min fɔ ko an yɛrɛ dalen bɛ o la. An ka dannaya bɛ a jira ko fɛn bɛ an bolo ka fɔ u ye min nafa ka bon, o bɛ se fana ka tɔw dɛmɛ u ka an ka kuma fɔtaw minɛ ni sɛbɛ ye, ani ka u waleya.

3. I bɛ a jira cogo di ko i dalen bɛ i ka kuma fɔta la? [be ɲ. 195 d. 3-ɲ. 196 d. 4] An bɛ daɲɛ minnu ta ka kuma kɛ, olu bɛ se ka a jira ko an dalen bɛ an ka kuma fɔta la. (Hab. 2:3; Yuh. 5:​19, 24, 25; Rom. 8:​38; 14:14; 1 Tim. 2:7) An bɛ ka kuma min fɔ, ni an dalen bɛ a la ko tiɲɛ don ani ko a nafa ka bon, o na ye an ɲɛ kan, o na ye fana an bolo filicogow ni an yɛrɛ kɛcogoya la.

4. Gasidɔn ye mun ye; mun na a nafa ka bon, ani an bɛ se k’o kɛ cogo di ni kologɛlɛya ye? (Rom. 12:18) [be ɲ. 197] Kuma cogo min tɛ don mɔgɔ gasi la, o ye ka kuma fɔ a ye min tɛ a tigi tɔɔrɔ fu. O cogo la, kibaru duman lamɛnni bɛ diya mɔgɔw ye. Mɔgɔ dɔw bɛ yen, ni i kumana Bibulu kɔni kan, a kɛra cogo o cogo u bɛ dimin. O fana man kan ka kologɛlɛya tila an na. (1 Pi. 2:​7, 8)

5. Mɔgɔ min bɛ gasi dɔn, yanni o tigi ka kuma, a bɛ mun jateminɛ? (Nt. 25:11; Yuh. 16:12) [be ɲ. 199] Tuma caman gasidɔn bɛ kɛ ni an bɛ kuma fɔ ka bɛn a fɔtuma ma. Mɔgɔw bɛ fɛn o fɛn fɔ wajibi tɛ an ka sɔn o bɛɛ ma, nka, o kun tɛ fana an ka mɔgɔw ka kuma fɔlen kelen-kelen bɛɛ kɛ gɛlɛyako ye, k’o kumaw tɛ sɔrɔ Bibulu kɔnɔ. O nɔ la, an ma bɛn fɛn minnu kan, an ka olu filɛ fɛnw ye minnu b’an dɛmɛ k’a tigi faamuya kosɛbɛ. Ni a bɛ se ka kɛ, an ka u fo u ka timinandiya la diinɛko ta fan fɛ. (Kɛw. 17:22)

KALANSEN FƆLƆ

6. An bɛ kuma minnu fɔ ani an bɛ Bibulu dɔnniya kalan kɛ an deliko ye cogo min na, cogo jumɛn na olu bɛ an ka ɲɛtaa kofɔ? [be ɲ. 74 d. 3–ɲ. 75 d. 2] Mɔgɔ minnu bɛ ‘jogo kura don u yɛrɛ la’, olu bɛ u yɛrɛ tanga fɛnw ma iko tilenbaliya kow, ko bɛnbaliw wala kuma min tɛ mɔgɔ kologɛlɛya. O nɔ la u bɛ kuma fɔ ‘min bɛnnen bɛ, min bɛ se ka dɔ fara mɔgɔ wɛrɛw barika kan, ka nɛɛma di a lamɛnbagaw ma.’ (Efɛ. 4:​24, 25, 29) Minnu ye tiɲɛ kuma faamu olu tɛ u ka Alako baara bila ni ka tugu hakilinata kuraw ani ko kuraw nɔfɛ, wala ka tugu tulonkɛw nɔfɛ minnu ye sangawulikow ye. (Efɛ. 3:​18; 4:​14) An bɛ mɔgɔ tɔw minɛ cogo min na fana, o bɛ an ka ɲɛtaa kofɔ. (Efɛ. 4:​32)

7. Kɔrɔ jumɛn bɛ nin kuma na: “ka waati kunmabɔ” ani an bɛ se ka o waleya cogo di? (Efɛ. 5:​16) [w02 15/11 ɲ. 23] O kɔrɔ ye ka waati “gɛn ka minɛ” ka bɔ kow la minnu nafa ka dɔgɔ ani ka o waati kɛ ka fɛn nafama kɛ. Ni an ye an ka waati surunya an bɛ min ta ka tele filɛ, ka yaala-yaala ɛntɛrinɛti kɔnɔ, ka kitabuw kalan minnu ni alako tɛ ɲɔgɔn ɲɛ sira la, walima ka lafiɲɛ waati caman ta, o cogo la an na waati caman sɔrɔ “ko fisamaw” kama. (Fil. 1:​9, 10) O ko dɔw ye i yɛrɛ tɔgɔla-Bibulu-kalan ye o min bɛ i kologɛlɛya hakili ta fan fɛ ani ka i ni Jehowa cɛ surunya. (Zab. 1:​1-3)

8. Sɛbɛnninw bɛ a jira ka jɛya cogo di ko mɔgɔ bɛɛ ka kan Ala ɲɛkɔrɔ, ani fana, o dɔnniya ka kan ka nɔ jumɛn bila an ka cidenyabaara la? [w02 1/1 ɲ. 5, 7] Kɛwalew 17:26 bɛ nin fɔ: “[Ala] ye hadamadenw siyaw bɛɛ da ka bɔ mɔgɔ kelen na.” Dabaga ma wolomali kɛ min sinsinnen bɛ mɔgɔw cogoyaw kan. (Job 34:19) Mɔgɔ bɛɛ cogoya ka kan saya ɲɛkɔrɔ. (Zab. 49:10; Ekl. 9:​5, 10) Mɔgɔ o mɔgɔ bɛ a ka dannaya da Yesu Krista kan o tigi bɛ se ka ɲɛnamaya banbali sɔrɔ. (Yuh. 3:​16) Nin bɛɛ de ka kan ka an bila an ka Kibaru duman wajuli kɛ ‘mɔgɔ sifa bɛɛ’ ye, a kana kɛ ni wolomali ye. (1 Tim. 2:4)

9. Dabaga tɔgɔ kelenpe min ye Jehowa ye, o tɔgɔ kɔrɔ ye mun ye? [w02 15/1 ɲ. 5] Ala tɔgɔ kɔrɔ ye ko “A ba Kɛ a Ye.” O bɛ a jira ko fɛn o fɛn ka kan ka kɛ walisa ka a sagonata ɲɛnabɔ, a bɛ a yɛrɛ labila o kɛli kama. (Ek. 3:​14) An bɛ o ye a ka mankutuw fɛ minnu ka ca kosɛbɛ. (Kir. 11:27; Zab. 23:1; 65:3; 73:28; 89:27; Esa. 8:​13; 30:20; 40:28; 41:14) A bɛnnen bɛ Ala sɛbɛ-sɛbɛ dɔrɔn de ma a ka tɔgɔ ta min ye Jehowa ye, ka a sabu kɛ ko ale de kelenpe bɛ se ka a yɛrɛ sago waleya ka se a dan na. (Esa. 55:10, 11)

10. Mun de ye a to Abɛl ka saraka “ka fisa ka tɛmɛ” Kaɛn ta kan, ani fana an bɛ kalansira jumɛn sɔrɔ ka bɔ o la ka ɲɛsin an ka “tanuli sarakaw” ma? (Heb. 11:4; 13:15) [w02 15/1 ɲ. 21 d. 6-8] Hali ni Kaɛn ani Abɛl fila bɛɛ tun bɛ u ka jurumutɔya dɔn ani fana u bɛɛ tun bɛ a fɛ ka Ala ka mandiya sɔrɔ, Abɛl dɔrɔn de ka saraka tun bɔra ni dannaya ye. Kaɛn ma nafa bɛrɛ don a ka saraka la. A m’o saraka bɔ ni nisɔndiya ye. O cogo kelen na walisa Ala ka sɔn an ka “tanuli saraka” la cidenyabaara kɔnɔ, fo an ka a kɛ ka an ka kanuya ani an ka dannaya de jira, a kana kɛ ten dɔrɔn. (Rom. 10:10)

DƆGƆKUN KƆNƆ BIBULUKALAN

11. Cogo jumɛn na Levitike 18:3 bɛ se ka an dɛmɛ walisa an kana kɔrɔ wɛrɛ don ɲuman ani juguman na? (Efɛ. 4:​17-​19) [w02 1/2 ɲ. 29] An taamacogo man kan ka kɛ iko diɲɛ mɔgɔw ta, o kɔrɔ ye ko an kɔnɔna miiri min sinsinnen bɛ Bibulu kan, an man kan ka sɔn o ka yɛlɛma fo a bɛ kɔrɔ wɛrɛ don ɲuman ani juguman ko la, ka kɛɲɛ ni diɲɛ ta ye.

12. ‘Nburukun fila’ min tun bɛ jira saraka-lasebaga-kuntigi fɛ iko ‘saraka finifanata’ dɔgɔkun fɛti sen fɛ, (Pantekɔti fɛti) o tun bɛ kiraya kuma jumɛn de kofɔ? (Lev. 23:15-​17) Nburukun fila, fununan kɛra minnu na, olu dilanna ni alikama kun fɔlɔw ye. O nburukunw bɛ mɔgɔ dafabali 144000 de kofɔ, Yesu ye ‘minnu san Ala ye’ walisa u ka baara kɛ iko ‘masaya ni saraka lasebagaw. . .ka sigi masaya la dugukolo kunna.’ (Jir. 5:​9, 10; 14:​1, 3) Sankolola-kuntigiw ninnu bɔra jurumutɔ kulu fila la min kɛ, yahutuw ani siya wɛrɛw, o de bɛ jira nburukun fununen fila fɛ.

13. Ni jɛnɛya wale kɛra, i na a fɔ min ɲɔgɔn kofɔra Nɔnburuw 5 kɔnɔ, kɔrɔ jumɛn na muso jalakibaatɔ ‘woro’ na ‘fasa’? (Nɔn. 5:​27) [w84 15/7 ɲ. 29] A jɛlen bɛ ko ‘woro’ bɛ cɛya ani musoya minɛnw de ko fɔ. ‘Ka fasa,’ o kɔrɔ ye ko musoya minɛnw bɛ mɔsɔn, fo bange tɛ se ka kɛ tun. O ɲɛfɔ-cogo bɛ bɛn ni kow kɛcogo ye. Ni jalaki tun tɛ muso la, a tun bɛ kɔnɔ ta a cɛ fɛ.

14. Mun na Mariama ni Arɔn ye Musa kɔrɔfɔ a ka Etiopikamuso kosɔn? (Nɔn. 12:1) Jɔyɔrɔba ani fanga nege tun bɛ Mariama na. A tun sirannen bɛ sɔrɔ fu, ko ale jɔyɔrɔ ni a tɔgɔ na dɔgɔya ka o sabu kɛ muso wɛrɛ ye. A sera ka Arɔn nɛgɛn ka sɔrɔ u ka jɛ ka Musa kɔrɔfɔ, ka sɔsɔli kɛ a jɔyɔrɔ ko la Ala ɲɛkɔrɔ, ka o kun kɛ a ka Etiopikamuso ye. O de kosɔn Jehowa ye u fila jalaki, Mariama fara Arɔn kan. Nka kuna ye Mariama de minɛ, o bɛ a jira ko ale de ye a ko kotigi ye. [7, w02 15/10 ɲ. 29; w84 15/7 ɲ. 29-​30]

15. Mun de tun ye “Jehowa ka kɛlɛ kow kitabu” ye? (Nɔn. 21:14) O tun ye Jehowa ka jama ka kɛlɛw tariku kitabu ye, dannaya tun bɛ kitabu min kan. O tun bɛ daminɛ ni I­brahima ka se-sɔrɔ ye masakɛ naani kan minnu tun ye Lɔti ni a ka denbaya minɛ. (Jen. 14:​1-​16) A tun bɛ se ka kɛ fana ko kɛlɛ-kow bɛ a kɔnɔ minnu ma sɛbɛn Bibulu kɔnɔ. [9, cl ɲ. 64; w90 1/7 ɲ. 20, 23; it-2 ɲ. 149]