Yala I bɛna ye o kɛnɛ kan wa?
1 Cɛ dɔ min ye Jehowa Seere ye kabini tuma jan, o ko: “Ni i ye kafoba ka jamalajɛ don fɔlɔ jɛn, i ye fɛnba de jɛn tiɲɛ na!” Mun na a bɛ miiri o cogo la? A bɛ miiri o cogo la bawo Jehowa ka jɛkuluba ye dumuniba min labɛn an ye Ala sira la, o bɛ daminɛ jamalajɛ don fɔlɔ de la. (Es. 25:6) An ka kɛ jamalajɛ kɛyɔrɔ la kabini a don fɔlɔ la, o b’a jira ko an dusukunnata ni Zaburusɛbɛnbaga dusukunnata bɛɛ ye kelen ye. A ko: ‘A fora ne ye tuma min na ko an ka taa Jehowa ka so la, o ye ne nisɔndiya.’—Zab. 122:1.
2 Nin san laban ninnu na, kafoba ka jamalajɛ dɔw la, mɔgɔ minnu nana jumadon na, olu hakɛ tun ka dɔgɔ kosɛbɛ ka tɛmɛ Sibiridon ni karidon mɔgɔw kan. O kɔrɔ ye ko kunnafoni ɲɛnama minnu dira kirayakuma kan jamalajɛ jɛmukanw kɔnɔna na, o don na, an balima fanba ma olu mɛn. U bɛ se ka jɛɲɔgɔnya ɲuman min diyabɔ Jehowa Seere tɔw fɛ, u bɔnɛra o fana na.
3 I kana a to i ka baara k’i bali ka na: Kun min na Jehowa Seere dɔw tɛ na jumadon na, o bɛ se ka kɛ k’u bɛ jɔrɔ u ka baarako kana tiɲɛ. Nka, o n’a ta o ta, Jehowa Seere caman y’a ye ko u ka patɔrɔn bɛ sɔn ka donw di u ma ka taa jamalajɛ la, ni u kɔnna ka pɛrɛmisɔn ɲini. An balimamuso dɔ tun jɔlen bɛ a kan tigitigi ka taa jɛkulu lajɛw ni jamalajɛw bɛɛ la. O ko ye a ka patɔrɔn kabakoya fo patɔrɔn ye tile kelen mumɛ kɛ jamalajɛ kɛyɔrɔ la, an balimamuso tun bɛ min na.
4 I man kan ka a bila i kun na ko i ka patɔrɔn tɛna sɔn ka waati di i ma ka taa jamalajɛ la, walima i man kan ka miiri ko ka kafo ka jamalajɛ don kelen jɛn, o tɛ baasi ye. Ni daŋaniya jɔnjɔn ye, i k’i labɛn walisa ka taa kuma i ka patɔrɔn fɛ. I sinsin Sɛbɛnniw kan walisa ka a jira a la ni gasisigi ye, mun na ka taa jamalajɛ la, o ye i ka bato kɔnɔko dɔ ye min jɔyɔrɔ ka bon kosɛbɛ i bolo. (Heb. 10:24, 25) O kɔ fɛ, i ka da Jehowa ka layiduw la cogo dafalen na, k’a dɔn ko i magomafɛn mana kɛ fɛn o fɛn ye, Ala bɛna o nɔgɔya i ye, ni i tagara a fɛ ka Alakow bila jɔyɔrɔ fɔlɔ la i ka ɲɛnamaya kɔnɔ.—Mat. 6:33; Heb. 13:5, 6.
5 A ko belebele ye ko ‘fɛn minnu nafa ka bon kosɛbɛ,’ olu kow ka bonya an bolo. (Fil. 1:10, 11; Zab. 27:4) O b’an bila an ka labɛnw kɛ walisa Jehowa ye o ko ɲɛnamaba min sigi, n’o ye jamalajɛw ye, an ka se ka nafaba sɔrɔ olu la. Kabini sisan, i k’i ka labɛnw kɛ, wa, i jɔlen ka to a kan ko i bɛna ye kɛnɛ kan tile saba kuuru bɛɛ la.