Kelenya lakika Kerecɛnw ni ɲɔgɔn cɛ, o bɛ kɛ cogo di?
1 Mɔgɔ miliyɔn wɔɔrɔ ni kɔ, ka bɔ jamana 234 na, minnu ka kanw bɛ taa 380 ɲɔgɔn na, fɛn jumɛn tun bɛ se ka kelenya don olu ni ɲɔgɔn cɛ? Jehowa Ala ka bato kelenpe dɔrɔn de tun bɛ se k’o kɛ. (Mi. 2:12; 4:1-3) Jehowa Seerew kelen-kelen bɛɛ b’a dɔn, ko kelenya lakika min bɛ Kerecɛnw ni ɲɔgɔn cɛ, o ye ko ye min ye tiɲɛ ye tigitigi bi. Ikomi an ye “kulu kelen” ye an ka “sagagɛnna kelen” ka mara kɔnɔ, an tɛ sɔn cogo si la k’a to bɛnbaliya hakili min bɛ diɲɛ kɔnɔ, o ka don an cɛma, wa an jɔlen bɛ o de kan.—Yuh. 10:16; Efɛ. 2:2.
2 Ala sagonata ye ka mɛlɛkɛw bɛɛ ani hadamadenw bɛɛ jɛ bato lakika kelen na. Fɛn fosi tɛna o bali. (Jir. 5:13) Ikomi Yesu tun b’a dɔn ko o nafa ka bon kosɛbɛ, a ye Ala sɛbɛkɔrɔ deli walisa kelenya ka kɛ a ka kalandenw ni ɲɔgɔn cɛ. (Yuh 17:20, 21) An kelen-kelen bɛɛ bɛ se ka mun kɛ walisa ka dɔ fara Kerecɛn jɛkulu ka kelenya kan?
3 Kelenya sera ka kɛ cogo min na: Ni Ala ka kuma ani a ka hakili senu barika tɛ, kelenya min bɛ kerecɛnw ni ɲɔgɔn cɛ, o tun tɛna se ka kɛ abada. An bɛ fɛn minnu kalan Bibulu kɔnɔ, olu waleyali de b’a to Ala ka hakili senu bɛ baara kɛ a sago la an ka ɲɛnamaya kɔnɔ. O b’an dɛmɛ ‘hakilikelenya ka to hɛrɛ barika la.’ (Efɛ. 4:3) O b’an bila an ka muɲu ɲɔgɔn kɔrɔ ni kanuya ye. (Kol. 3:13, 14; 1 Pi. 4:8) Yali an bɛ dɔ fara kelenya kan an kɛtɔ ka taasi Ala ka kuma na don o don wa?
4 Ci min b’an bolo ka waajuli kɛ, ka mɔgɔw kɛ kalandenw ye, o fana b’an dɛmɛ kelenya ka don an ni ɲɔgɔn cɛ. Ni an bɛ baara kɛ ɲɔgɔn fɛ Kerecɛn ka cidenyabaara la, ni ‘an bɛ ka kɛlɛ kɛ ɲɔgɔn fɛ kibaru duman dannaya kosɔn,’ an bɛ kɛ ‘baarakɛɲɔgɔnw ye tiɲɛ kɔnɔ.’ (Fil. 1:27; 3 Yuh. 8) O cogo la, kanuya barika min bɛ kelenya don jɛkulu kɔnɔ, dɔ bɛ fara o kanuya barika kan. Mun na i tɛna a ɲini mɔgɔ dɔ fɛ e ni min famana ka baara kɛ ɲɔgɔn fɛ, a k’i bilasira foro cidenyabaara la, nin dɔgɔkun in na?
5 Balimaya lakika kelenpe min bɛ dugukolo mumɛ kan bi, dugawuba don an bolo dɛ, ka a ye ko an sen bɛ o balimaya la! (1 Pi. 5:9) Kɔsa in na, mɔgɔ ba caman ye o kelenyaba in diya bɔ jamana ni ɲɔgɔn cɛ jamalajɛw la ko: “An ka nɔɔrɔ da Ala kan.” An kelen-kelen bɛɛ ka dɔ fara kelenya nafamaba in kan, an kɛtɔ ka Ala ka Kuma kalan don o don, ka an ka bɛnbaliyakow ɲɛnabɔ kanuya kɔnɔ, ka kibaru duman waajuli kɛ an ‘bɛnnen ko kelen na.’—Rom. 15:6.