“Aw k’a jira ko aw labɛnnen don”
1 A ka dakabana kiraya kuma kɔnɔ, min ɲɛsinnen bɛ nin diɲɛ laban ma, Yesu y’an lasɔmi, ko an kana an yɛrɛ bɛɛ bila diɲɛ ka ɲɛnamaya magow ɲɛnabɔli la. (Mat. 24:36-39; Luka 21:34, 35) Tɔɔrɔba bɛ se ka poyi waati bɛɛ la, o la sa, a nafa ka bon kosɛbɛ an ka an hakili to Yesu ka lasɔmi kuma la: “Aw labɛnnen ka to, katuguni aw hakili tɛ waati min na, Mɔgɔ Denkɛ bɛ na o waati la.” (Mat. 24:44) Mun bɛ se ka an dɛmɛ a ko la?
2 An ka haminakow ni ɲɛnajɛkow kɛlɛ: An ka kan ka an janto jan minnu na alako ta fan fɛ, olu dɔ la kelen ye “nin diɲɛ haminakow ye.” (Luka 21:34, sɛbɛnni minnu bɛ Jehowa Seerew ka Bibulu belebele fura ɲɛ duguma.) Jamana dɔw la, faantanya, baarantanya, ani fɛnw sɔngɔ gɛlɛya kosɔn, ɲɛnamaya tɛ taa fɛn minnu kɔ, olu sɔrɔli bɛ gɛlɛya. Jamana wɛrɛw la, ka nafolomafɛnw ɲini ka sɔrɔ, o ye ko gansan ye mɔgɔw bolo. Ni an miiri bɛɛ taara nafolomafɛnw ɲinini fɛ ka tɛmɛ fɛn wɛrɛw kan, an bɛ kɛ farati la min bɛ se ka Masaya kow tunun an na. (Mat. 6:19-24, 31-33) Kerecɛn lajɛw b’an dɛmɛ k’an hakili to o Masaya kow la. Yala i y’a kɛ i kuntilenna ye ka na lajɛw bɛɛ la wa? —Heb. 10:24, 25.
3 Bi diɲɛ falen bɛ ɲɛnajɛ kow la minnu bɛ se ka an ka waati nafama in ta ka bɔ an bolo. Ka baara kɛ ni ɔrdinatɛri ye, o bɛ se ka kɛ mɔgɔ minɛ jan ye, ni a sɔrɔ an bɛ dantɛmɛ waati ta ka ɛntɛrinɛti lajɛ, ka imɛl (E-mail) lɛtɛrɛw kalan ani k’ u ci ɔrdinatɛri siraw fɛ, walima ka tulonkɛninw kɛ, minnu bɛ ɔrdinatɛri kɔnɔ. Lɛrɛ damadɔnbali bɛ se ka tiɲɛ tele filɛli la, sinima filɛli la, an diyanye kow kɛli la, sɛbɛn wɛrɛw kalanni na, farikolo ɲɛnajɛw la, ka waati fitinin walima barika dɔɔnin dɔrɔn de to an ye alakow kama. Hali ni lafiyɛnbɔ ani fari foni bɛ se ka barika di mɔgɔ ma waati damadɔ kɔnɔ, i ka Bibulukalan ani denbaya ka Bibulukalan bɛ badaa badaa nafa lase mɔgɔ ma. (1 Tim. 4:7, 8) Yala don o don, i bɛ i jija ka waati kunmabɔ Ala ka kumakan hakilijakabɔ kama wa?—Efɛ. 5:15-17.
4 Jehowa ka jamakulu kolabɛnnen ye alako kalan boloda, ka an dɛmɛ walisa ‘an ka se ka kisi o ko nataw bɛɛ ma, ani an ka se ka jɔ Mɔgɔ Denkɛ ɲɛkɔrɔ’! An bɛ se ka a waleɲumandɔn kosɛbɛ o la. (Luka 21:36) An bɛɛ k’a ɲini ka nafaba bɔ o alako-kalan-bolodalen in na, ka a jira ko an labɛnnen don. O la, an ka limaniya bɛ kɛ ‘Ala tanu kun ye ani a ka nɔɔrɔ jira kun ye ani a bonya kun ye, Yesu Krista jira tuma.’—1 Pi. 1:7.