Ala-ka-marako Cidenyabaara Kalanso Dalafɔ-seginnkanni
Ɲininkali nataw jaabiw bɛna kɛ dalafɔ ye Ala-ka-Marako Cidenyabaara kalanso ka lajɛ la, o min bɛna kɛ Ɔkutɔburukalo tile 27nan dɔgɔkun kɔnɔna na, san 2003. Kalan lakɔlɔsibaga bɛna seginnkanni ɲɛminɛ sanga 30 kɔnɔ. O seginnkanni bɛna sinsin kalanw kan minnu kɛra k’a ta Sɛtanburukalo tile fɔlɔ la ka na a bila Ɔkutɔburukalo tile 27 la, san 2003. [Kɔlɔsili: Ni ɲininkali dɔ kɔfɛ, yɔrɔ ma fɔ tali bɛ se ka kɛ min na, i ka kan ka i yɛrɛ ka ɲinini kɛ walisa ka jaabiw sɔrɔ.— École du Ministère mafilɛ ɲ. 36-7.]
JƐMU KƐCOGO ƝUMAN
1. Ni 1 Timote 2:9 bɛ laadilikan di ko mɔgɔ k’i masiri ‘ni fini labɛnnen koɲuman’ ye, o kɔrɔ ye mun ye? O bɛ se ka nɔ jumɛn bila an yecogo la n’an bɛ ka kuma jama ɲɛ fɛ, walima ni an bɛ ka foro cidenyabaara kɛ? [be ɲ. 132 d. 4-5 la] Nin laadilikan bɛ cɛw ani musow bɛɛ de kun kan. O kɔrɔ ko an bɛ fini minnu don, olu ka kan ka kɛ fɛn saniyalenw ye minnu labɛnnen bɛ koɲuman. Ni an bɛ tugu nin laadilikan kɔ, o bɛ Kerecɛn ni Jehowa ka jɛkuluba jira cogo ɲuman na. Ni mɔgɔw b’a kɔlɔsi ko an ‘labɛnnen bɛ koɲuman,’ a bɛ se ka nɔgɔya u bolo ka sɔn ka cikan lamɛn, an bɛ cikan min weleweledala.
2. Sariyakolo minnu bɛ 1 Yuhana 2:15-17 la, ani Efɛsekaw 2:2 la, ani Romɛkaw 15:3 la, olu ka kan ka nɔ jumɛn bila an yecogo la? [bɛ ɲ. 133 d. 1-3 la] Laadilikan min dilen bɛ 1 Yuhana 2: 15-17 la, o b’an dɛmɛ an kana finiw don minnu bɛ diɲɛ kanuya jira. O kanuya bɛ sinsin kosɛbɛ farisogo dafabali negew kan, walima a bɛ sinsin yɛrɛjiranciya kan an bolofɛnw ta fan fɛ. Ni an ye Efɛsekaw 2:2 to an kɔnɔ, an bɛna an cɛsiri walisa an yecogo kana diɲɛ ka murutili hakilila jira. Romɛkaw 15:3 bɛ mɔgɔw ɲɛsin Yesu ka misali ma, o min ye Ala sago kɛ, ka mɔgɔ tɔw dɛmɛ. Bakurubafɔ la, an bɛna an yɛrɛ tanga fini doncogo ni kun dilancogow ma minnu bɛ se ka mɔgɔ wɛrɛw bali u ka an lamɛn, ni an bɛ ka u waaju.
3. Mun na jasigi nafa ka bon kosɛbɛ ani an bɛ se ka jasigi sɔrɔ cogo di walisa an ka se ka kuma jama ɲɛ fɛ, walima ka cidenyabaara kɛ? [be ɲ. 135 yɔrɔ bulama, ani ɲ. 136 d. 5 yɔrɔ bulama] Ni an jasigilen don, lamɛnbagaw bɛ se k’u ɲɛmajɔ kosɛbɛ an ka kumaw fɛ, ka tɛmɛ an yɛrɛ lajɛli kan. An bɛ se ka kɛ mɔgɔw ye minnu jasigilen don kosɛbɛ ni an b’an sinsin Jehowa kan. An ka kan ka baara min kɛ, ni an bɛ o fana labɛn ka ɲɛ, ka segin o kan siɲɛ caman an kan kɔrɔtalen. (Zab. 55:22) Ni an bɛ waajuli fana kɛ tuma bɛɛ, ka jaabiw di lajɛw kɛtuma na, ka sɔn ka kalan kɛta kɛ mɔgɔ wɛrɛ nɔ na , o fɛnw bɛɛ bɛ se k’an dɛmɛ ka kɛ mɔgɔ jasigilenw ye.
4. Fɛn min ye ka baara kɛ ni Bibulu ye an ka cidenyabaara kɔnɔ, Yesu, “seere tilennen sɛbɛma” ye misali ɲuman di an ma cogo di? (Jir. 3:14) [be ɲ. 143 d. 2-3] Ni Yesu tun bɛ mɔgɔw kalan, a tun bɛ Bibulu tɛmɛsiraw kofɔ, a tun bɛ segin a kuma yɔrɔ dɔw kan, walima a tun bɛ o kɛ a sinsinbere ye. (Mat. 4:3-10; 12:1-8; Luka 10:25-28; 17:32; 24:27, 44-47) O la sa, a tun bɛ se k’a fɔ tiɲɛ na, ko a tun bɛ mɔgɔw kalan min na, a tun tɛ o fɔ a yɛrɛ ma. (Yuhana 8:26; 14:10) An fana ka kan k’a kɛ an delinako ye ka an sinsin Bibulu kan, walisa ka ɲininkaliw jaabi.
5. An bɛ se ka mun kɛ walisa an ka se kosɛbɛ ka baara kɛ koɲuman ni Bibulu ye? (Tite 1:9) [be ɲ. 144 d. 1, yɔrɔ bulama] Walisa ‘an nɔrɔlen ka to kalan sɛbɛ la an ka mɔgɔ kalan cogo ta fan fɛ la la,’ an ka kan ka Bibulu kalan ani yɛrɛkalan bolodacogo ɲuman sɔrɔ. An ka kan fana k’a kɛ an delinako ye ka Bibulu tɛmɛsiraw don an ka jaabiw la lajɛw la. Ni mɔgɔw bɛ ɲininkaliw lase an ma, walima ni an ka kan ka ko dɔ latigɛ, an ka kan k’a lajɛ tuma bɛɛ, Bibulu bɛ min fɔ o ko la. Ni an tɛ Bibulu hakilila dɔn o ko kan, an ka sɔn ka ɲinini kɛ o kan.
KALANSEN FƆLƆ
6. Kalan tɛ taa mun ni mun kɔ? Ni an bɛ Ala ka Kuma kalan tuma bɛɛ, o nafa dɔw ye jumɛnw ye? [be ɲ. 27 d. 3; ɲ. 32 d. 3] An bɛ ka kalansen min lajɛ, kalan b’a wajibiya an ka taasi kosɛbɛ o la. An bɛ ka min kalan fo an ka o sɛgɛsɛgɛ, ka o ni an ka dɔnniyaw suma ɲɔgɔn ma. Dalilu minnu bɛ o kuma sɛbɛnnen kɔkɔrɔdon, k’olu ɲini k’a ye. Hakilila o hakilila ye kura ye, ka an hakili jakabɔ kosɛbɛ olu kan. Ni an bɛ taasi Bibulu la tuma bɛɛ, o b’an dɛmɛ an ka to mɔgɔ majiginnenw ye, ka Ala ka Kuma ɲɛnama to an dusukun na fana. O bɛna an lakana jurumu ka lafilibaanciya barika ma. O la sa, an ‘bɛna taama cogo la min bɛ bɛn Jehowa ma walisa an ko ka diya a ye, k’a sɔrɔ an bɛ t’a fɛ ka den kɛwale ɲumanw bɛɛ la.’ (Kol. 1:10; 3:5-10; Dut. 17:18-20; Heb. 2:1; 3:13)
7. Ka kɛɲɛ ni Yakuba 1:5, 6 ye, ni an ka kan ka koba dɔ latigɛ, a nafa ka bon ka mun kɛ? [w01 1/9 ɲ. 28 d. 4] O tɛ taa delili kɔ. An ka kan k’a ɲini Jehowa fɛ ni dannaya ye a k’an ɲɛminɛ sira fɛ min b’a to an bɛ ko latigɛ min ka ɲi. Tuma caman na, hakili senu b’an hakili jigin Bibulu sariyakolow la minnu bɛ se ka waleya o ko la, walima Bibulu tɛmɛsira min ɲɛsinnen bɛ o ko ma, a b’an dɛmɛ k’o faamu koɲuman.
8. Bibulu kɔnɔkow ka waati jate bɛ sinsin san jumɛnw kan? Mun na o sanw jɔyɔrɔ ka bon kosɛbɛ? [si ɲ. 282 d. 27] Bibulu kɔnɔkow ka waati jate bɛ sinsin san min kan, o ye san dɔnnen ye, tariku sɔnna min na, ni o san bɛ bɛn ni ko kɛrɛnkɛrɛnnen dɔ ye min sɛbɛnnen bɛ Bibulu kɔnɔ. O san bɛ se ka kɛ fɛn ye, sinsin bɛ kɛ min kan walisa ka se ka ko wɛrɛw kɛtuma jɔnjɔn dɔn donjatelan kan.
9. Sira jumɛn fɛ “min bɛ tɔgɔ tiɲɛni kuma fɔ, o ye hakilintan ye”? (Nt. 10:18) [w01 15/9 ɲ. 25 d. 3] Ni nkalon tigɛra ka da mɔgɔ dɔ la, o tigi ye mɔgɔ sugu min ye tigitigi, kuma juguw tɛ fosi yɛlɛma o tigi cogoya la. Kɔlɔsikɛla bɛna a dɔn ko kɔnɔnajuguya kuma de fɔra o tigi kan. O la sa, mɔgɔ min ye o kuma juguw fɔ, o tigi na mangoya o kɔlɔsikɛla bolo. O de la, mɔgɔ min bɛ kuma juguw fɔ a mɔgɔɲɔgɔn ma, a bɛ bɔnɛ lase a yɛrɛ de ma
10. Ala hakilila ye min ye waati kan, hadamadenw bɛna o faamu kosɛbɛ diɲɛ kura kɔnɔ, cogo jumɛn na? [si ɲ. 283 d. 32] Bana, saya, baarantanya, ɲɛnafin, ani waso bɛna ban pewu diɲɛ kura kɔnɔ. Baara bɛna nisɔndiya lase mɔgɔ ma. San ba caman sen fɛ, hadamaden minnu bɛna balo dugukolo kan, olu bɛna Ala hakilila faamu waati kan, o min bolo ‘San ba kelen bɛ iko kunun, tile min tɛmɛna.’ (Zab. 90:4; Jir. 21:4).
BIBULU KALAN MIN BƐ KƐ DƆGƆKUN O DƆGƆKUN
11. Tiɲɛ don wa walima tiɲɛ tɛ?: 1 Kɔrɛntekaw 2:9 la, ciden Paul bɛ bɛ kuma fɛnw kan minnu labɛnna Jehowa fɛ walisa k’olu kɛ a ka jamakulu kantigi ka ciyɛn ye. A ɲɛfɔ. [ip-2 ɲ. 366 tiiri kɛlen bɛ ka sɛbɛnni minnu lamini] Tiɲɛ tɛ. Paul ye o kumaw fɔ hukumu min kɔnɔ, o b’a jira ko a tun bɛ ka kuma Jehowa ka hakilitigiya dogolen de kan ka ɲɛsin a sagonata ma, n’o ye ka bɛn ni kelenya sigi dunuya bɛɛ kɔnɔ. (1 Kɔr. 2:7) Mɔgɔ minnu ka alako man bon, walima mɔgɔ minnu tɛ miiri alako yɛrɛ la fewu, olu tɛ se k’a faamu o hakilitigiya ka dun ka se hakɛ min ma. O hakilitigiya bɛ jira mɔgɔ minnu dɔrɔn na, o ye mɔgɔw ye minnu bɛ ni Ala ka hakili senu ye. (1 Kɔr. 2:10)
12. 1 Kɔrɛntekaw 10:13 bɛ kuma kɔrɔbɔli sugu jumɛnw de kan? Jehowa bɛ ‘bɔcogo jira’ cogo di? [w91 1/10 ɲ. 10-11 d. 11-14] Nin kuma minnu fiyɛra ka bɔ Ala yɔrɔ, olu bɛ kow kan, hadamadenw bɛ minnu dɔn ka kɔrɔ, ni o kow bɛ se ka mɔgɔ bɔ a ka kantigiya kan Ala fan fɛ. (1 Kɔr. 10:6-11) Jehowa bɛ bɔ yɔrɔ jira a kɛtɔ ka fɛɛrɛ tigɛ minnu bɛ barika don an na alako ta fan fɛ. Ni an bɛ tugu o kow la, an bɛna se ka an kologɛlɛya kɔrɔbɔli la, ka an ka kantigiya maara, fo ka se saya yɛrɛ ma.
13. Yesu ka bololabila ka kan ka nɔ jumɛn bila Kerecɛnw na? (2 Kɔr. 8:9) [w92 15/1 ɲ. 16 d. 10] K’a sɔrɔ Yesu tun ye nafolotigi ye sankolow la, a sɔnna ka jɛn a ka nafolo kɔ. A sɔnna fana ka kɛ hadamaden ye min y’a ka ɲɛnamaya kɛ faantanya kɔnɔ, mɔgɔw ka hɛrɛ kama, mɔgɔ minnu tun bɛ na sɔn a ka kunmabɔ saraka la. Ikomi an ye Yesu ka kalandenw ye, o ka kan ka an fana bila ka bololabilali walew kɛ, ka an ka nafolo don Jehowa sago kɛli la ani fana ka mɔgɔ wɛrɛw dɛmɛ u ka ɲɛnamaya banbali sɔrɔ.
14. Sariya kɛra ‘bilasirabaga ye ka an lase Krista ma’ cogo di? (Gal. 3:24) [w02 1/6 ɲ. 15 d. 11] Ciden Paul ka waati la, bilasirabaga tun ye jɔn walima baarakɛla ye, duba dɔ kɔnɔ, min ka baara tun ye ka denmisɛnninw lakana, ka taa ni u ye lakɔli la. O cogo kelen na fana, Tɔn y’a kɛ Israyɛldenw y’a dɔn tiɲɛ na k’u ye jurumutɔ ye. O kɛra sababu ye, Tɔn k’u lakana kɛcogow ma minnu bɛ mɔgɔ tiɲɛ jogo ta fan fɛ, ani diinɛ ta fan fɛ. Tɔn ye u lase Masiya ma, ale min tun bɛ na u kalan kisili sira la. (Gal. 3:19)
15. An ka kan ka an yɛrɛ kɔlɔsi “diɲɛ kow” jumɛnw ma walasa an kana lafili? (Kol. 2:8) O ko dɔw ye hadamadenw ka hakilitigiya siraw ye minnu bɛ mɔgɔw lafili, hakiligitiya min sinsinnen bɛ farisogo ni diɲɛ hakililaw kan. Mɔgɔ minnu tɛ Kerecɛn lakikaw ye, o kow de bɛ olu ɲɛminɛ u ka ɲɛnamaya kɛcogo la. O fɛnw ye farati ye ka ɲɛsin an ka alamɔgɔya ma, wa u bɛ Kerecɛn miiricogo tiɲɛ. [w94 15/12 ɲ. 16 d. 12-13]