Ala ka kuma ye tiɲɛ ye
1 Zaburu sɛbɛnbaga y’a sɛbɛn, ko “I ka kuma bɛɛ lajɛlen ye tiɲɛ de ye.” (Zab. 119:160) A ka kuma fiyɛlen fɛ, Jehowa bɛ dususuma jaabi di diɲɛlatigɛ ɲininkalibaw ko la. A bɛ jigiya ni dususalo di mɔgɔw ma gɛlɛya bɛ mɔgɔ minnu kan. Ka fara o kan, a bɛ a jira an na cogoya min na an bɛ se ka gɛrɛ ale la. Muso dɔ waleɲumandɔn jiratɔ y’a fɔ ko: “Ka tiɲɛ kalan ka bɔ Bibulu kɔnɔ o bɛ i n’a fɔ ni i bɔra dibimayɔrɔ dɔ la, dusukasi bɛ yɔrɔ min na, ka don so kɔnɔ min jɛlen bɛ, ni yeelen bɛ a kɔnɔ ani a ko ka di mɔgɔ ye.” Tiɲɛ min bɛ Ala ka kuma kɔnɔ, yali i bɛ i seko bɛɛ kɛ ka o jɛnsɛn tuma o tuma n’a se bɛ i ye wa?
2 Bibulu ka mɔgɔ-yɛlɛma-fanga ani a ka mɔgɔ-sama-fanga: Tiɲɛ min bɛ Bibulu kɔnɔ, barika bɛ o la ka dusukun minɛ, ani ka yɛlɛma don mɔgɔw ka ɲɛnamaya la. (Heb. 4:12) Roza tun ye musomisɛn dɔ ye. A tun bɛ sungurubaya kɛ, a tun bɛ alikɔli min, ka dɔrɔgu ta k’a damatɛmɛ. A ye nin fɔ: “Don dɔ, k’a to ne bɛ jigitigɛ dan na Jehowa Seere furucɛ dɔ ni a furumuso kumana ne fɛ, k’a ɲɛfɔ ne ye cogo min na Bibulu bɛ se k’an dɛmɛ k’an ka gɛlɛyaw ɲɛnabɔ. Ne y’a daminɛ ka Ala ka kuma kalan; Ne y’a ye k’o a ka di kosɛbɛ. Kalo kelen kɔnɔ ne ye fanga sɔrɔ ka ne ka ɲɛnamaya jɛya, ka a kuraya. Sisan, ne kɛlen ka kun sɔrɔ ne ka ɲɛnamaya la, ne mago tɛ ka alikɔli walima dɔrɔgu kɛ ka ne yɛrɛ dɛmɛ tun. Kabini o tuma na ne tun b’a fɛ kosɛbɛ, ka kɛ Jehowa teri ye. Ne tun jijalen don ka ne ka ɲɛnamaya kɛ ka kɛɲɛ ni a ka sariya sigilenw ye. Ni Ala ka kuma hakilitigiya tun tɛ, ne kɔni dalen bɛ a la ko bi tun n’a sɔrɔ ko ne ye dan bila ne ka ɲɛnamaya la.”—Zab. 119:92.
3 Ka tɛmɛ kitabu bɛɛ kan bi, Bibulu bɛ a kan bila mɔgɔw ma ka bɔ ‘siyaw bɛɛ la ani bɔnsɔnw bɛɛ, ni mɔgɔ sifaw bɛɛ ani kanw bɛɛ la.’ (Jir. 7:9) Ala sago ye ko ‘mɔgɔ sifa bɛɛ ka kisi, ka se ka tiɲɛ dɔnniya jɔnjɔn sɔrɔ.’ (1 Tim. 2:4) O de kosɔn, an man kan ka a bisigi ko mɔgɔ dɔ tɛna sɔn ka kibaru duman lamɛn k’a sabu kɛ, a siya ye walima a jɔyɔrɔ walima a ka ko kɛlenw ɲɛnamaya kɔnɔ. Yanni an k’o kɛ, an ka Masaya kibaru fɔ bɛɛ ye, an ka sin ka kunnafoniw bɔ Bibulu de kɔnɔ ni o se bɛ an ye tuma o tuma.
4 A jira mɔgɔw la ni sɛbɛ ye ko nafa bɛ Sɛbɛnniw la: Tuma caman na, an bɛ se ka Bibulu jira an ka cidenyabaara kɔnɔ. Ni i bɛ Sɔn-ni-sɔn gafeniw jira, a ɲini ka sɛbɛnni tɛmɛsira kalan, tɛmɛsira min dilen bɛ jiracogo kɔnɔ. Ni an bɛ ni gafew ye minnu bɛ jira kalo kɔnɔ, dɔw y’a ye, ko ka kuma daminɛ ni Bibulu tɛmɛsira ɲɛnatɔmɔlen ɲuman dɔw ye, o bɛ nɔ ɲuman bɔ. Ni an bɛ segin-ka-bɔnye kɛ, an k’a ɲini ka Bibulu tɛmɛsira kelen wala damadɔw kalan tuma bɛɛ, walisa k’an kumaɲɔgɔn dɛmɛ a ka dɔnniya lakika sɔrɔ. Ni an bɛ Bibulu kalan kɛ tuma min na, an ka an ka kuma sinsin Bibulu tɛmɛsira kolomaw kan. Ni an tɛ waajuli la tuma min na, Bibulu ka kɛ an bolo kɔrɔ walisa an ka se ka senfɛ-seereya kɛ ni a tuma nana.—2 Tim. 2:15.
5 A se mana kɛ an ye tuma o tuma, an ka baara kɛ ni Bibulu ye, ka mɔgɔ tɔw dɛmɛ u ka nafa sɔrɔ Ala ka tiɲɛ kuma barika la, min bɛ dusu don mɔgɔ kɔnɔ.—1 Tes. 2:13.
[Study Questions]
1. Kunnafoni nafaman jumɛnw bɛ sɔrɔ Bibulu kɔnɔ?
2. Bibulu bɛ mɔgɔw ka ɲɛnamaya ɲɛ cogo di?
3. Mun na an mankan ka an yɛrɛ minɛ Bibulu ka cikan fɔli la mɔgɔ wɛrɛw ye?
4. An bɛ se ka baara kɛ ni Bibulu ye cogo di ni an bɛ seereya kɛ?
5. Mun na an ka kan ka an jija ka baara kɛ ni Bibulu ye an ka cidenyabaara kɔnɔ?