Masaya So jɔliko diɲɛ bɛɛ kɔnɔ Min kɛra Tubabu jamana dɔw la
1 Tubabu jamana damadɔw kɔnɔ, kɛrɛnkɛrɛnnenya la Tubabu jamana kɔrɔn fɛ jamanaw la, san tan damadɔw minnu tɛmɛna, u ye Jehowa Seerew ka baara bali a ka kɛ a ɲɛ ma. A yɔrɔ caman na, waajulibaara kɛli tun ka gɛlɛn kosɛbɛ. A tun ka gɛlɛn ka lajɛw kɛ, k’a sɔrɔ a ma kɛ dogo la. Ka kɛ fana ni u tɔgɔla Masaya So ye o tun bɛ iko fɛn min tɛ se ka kɛ. Nka sisan nin san damadɔw kɔnɔ “Jehowa ye kobaw kɛ an ye, an nisɔndiyara.”—Zab. 126:3.
2 K’a daminɛ san 1983 la, gɛlɛya min tun bɛ Jehowa Seerew kan, dɔ bɔra o la. San 1989, Polɔɲi jamana ani Hɔngiri jamana sɔnna Jehowa Seerew la u ka sariya sɛbɛnw kɔnɔ. San 1991 la, Irisi jamana fana sɔnna Jehowa Seerew la u ka sariya sɛbɛnw kɔnɔ. Kabini sa, waajuli baara bɛ ka taa ɲɛ Irisi jamana na ani jamana wɛrɛw la minnu tun bɛ Uɲɔn Sowuyetiki jamana kan. San 1996 marisikalo la ani san 1998 ɔkutɔburukalo la, Ɲɛmɔgɔ Kulu ye yamaruya di tɔn bolofaraw ma minnu bɛ Tubabu jamana 11 kɔlɔsi, wari juru ka se ka don u la walisa ka Masaya Sow 359 jɔ.
3 Nin farankan kɔnɔ, tuma min an bɛ jaw filɛ, an ka miiri a la ko Jehowa ye kobaw ni dakabanakow kɛ a ka jamakulu ye. (Zab. 136:4) An nisɔndiyalen k’a dɔn ko bolomafara minnu bɔra an balimaw fɛ diɲɛ bɛɛ kɔnɔ o donna da ɲuman fɛ, i n’a fɔ Yesu ye a jira cogo min Yuhana 13:35 na: “Mɔgɔw bɛɛ n’a dɔn ko aw ye ne ka kalandenw ye nin de la, ni aw bɛ ɲɔgɔn kanu.”
4 Jamanaw dɔ la kelen min ye nin kolabɛnnen tɔnɔ sɔrɔ o kɛra Rumani jamana ye, o yɔrɔ min na Masaya So 36 jɔra kabini san 2000 zuluyekalo la. Masaya So jɔcogo bɛ kɛ ni pilan kelen de ye. O de kɛra Ukirɛni jamana na, ka Masaya So 61 jɔ san 2001 na ani Masaya So 76 san 2002 la. Masaya So jɔ wari kɛsu kɛrɛnkɛrɛnnen ka dɛmɛ y’a to Masaya So kɛmɛ sigiyɔrɔma caman sera ka jɔ Bulgari jamana na, Irisi jamana na, Korowasi jamana na, Maseduwanɛ, Mɔldawi jamana, ani Sɛrbi ni Mɔntenegoro.
5 Ka Masaya Sow jɔ jamana dɔw la, o ma kɛ ko nɔgɔn ye, jijali ko caman de kɛra fɔlɔ yanni bi so jɔlenw ka daminɛ. Tuma caman na o baara bɛ waatiba de ta. Ka fara o kan wari hakɛ min bɛ bɔ ka Masaya So jɔ nin Tubabu jamana kofɔlenw na o ka ca ka tɛmɛ Afiriki ani Ameriki worodugu yanfan taw kan. O bɛɛ n’a ta, k’a sabu kɛ Jehowa batobagaw cayali ye, hali bi mɔgɔw mago bɛ Masaya So kɛmɛ caman de la Tubabu jamana la, yɔrɔ minnu na wari bɛrɛ tɛ yen.
6 Aw y’a dɔn kɔni, ko a cɛ ka ɲi dɛ, k’a ye ko Masaya Sow bɛ ka jɔ ka caya fan bɛɛ! An bɛ ka kibaruya minnu mɛn, olu bɛ a jira ko seereya ɲumanba bɛ ka di an sigiɲɔgɔnw ma, yɔrɔ minnu na Masaya So bɛ ka jɔ. Yɔrɔ dɔw la faamaw kabakoyara Jehowa Seerew ko la, k’a ye k’u b’a kɛ cogo bɛɛ la ka sojɔsariya sira bɛɛ taama u ka baaraw la.
7 Esayi ye kiraya kuma fɔ ka bɛn nin waati ma, waati min na bato sɛbɛ bɛ yiriwa. Ala ye kira bila a ka nin fɔ: “Ne Jehowa na o kɛ k’a teliya a waati la.” (Esa. 60:22) Tiɲɛ yɛrɛ la, nin san tan damadɔw kɔnɔ, a yera ko nin ye Jehowa ka waati ɲɛnatɔmɔnnen ye walisa ka kow yiriwa Tubabu jamana kɔrɔn yanfan fɛ. An bɛ Jehowa deli a ka taa a fɛ ka dubaw lase an ka cɛsiriw ma minnu kosɔn Masaya So jɔliw bɛ teliya jamana caman na, k’a sabu kɛ Masaya Sow jɔliko wari kɛsu kɛrɛnkɛrɛnnen kɔkɔrɔdonni ye. Wa o cogo la, Masaya Sow na jɔ yɔrɔw la yɔrɔ minnu na wari bɛrɛ tɛ yen. O bɛna dɔ fara bato sɛbɛ ka ɲɛtaa kan Tubabu jamana yɔrɔ caman na ani fana o b’a to seereyaba ka kɛ “dugukolo dan bɛɛ la.”—Kɛw. 13:47
[Pictures on page 3]
Masaya So min bɛ Mɔsuku, Irisi jamana
[Pictures on page 4-6]
Masaya So kuraw kɔrɔnfɛ Tubabu jamanaw na
Siturumika, Maseduwanɛ jamana
Daruwar, Korowasi jamana
Bitola, Maseduwanɛ
Sokal, Luwɔwu kafoba la, Ukirɛni
Sofia, Bilgari jamana
Kurdzipsikoye, Mayikɔp, Irisi jamana
Backi Petorowaci, Sɛrbi ani Mɔntenegoro
Pulɔfdifu, Bilgari jamana
Tulumaci, Iwanɔ-Farankɔfski kafoba, Ukirɛni
Arawa-Ruska, Luwɔwu kafoba, Ukirɛni
Stara-Pazɔwa, Sɛrbi ani Mɔntenegɔrɔ
Zenika, Bɔsni-Hɛrzegowini
Sokal, Luwɔwu kafoba la, Ukirɛni
Zidacifu, Luwɔwu kafoba la, Ukirɛni