Ala-ka-marako Cidenyabaara Kalanso Dalafɔ-seginnkanni — Watchtower BIBILIYOTƐKI INTƐRINƐTI KAN

Ala-ka-marako Cidenyabaara Kalanso Dalafɔ-seginnkanni

Ɲininkali nataw jaabiw bɛna kɛ dalafɔ ye Ala-ka-Marako Cidenyabaara kalanso ka lajɛ la, o min bɛna kɛ Awirilikalo tile 28nan dɔgɔkun kɔnɔna na, san 2003. Kalan lakɔlɔsibaga bɛna seginnkanni ɲɛminɛ sanga 30 kɔnɔ. O seginnkanni bɛna sinsin kalanw kan minnu kɛra k’a ta Marisikalo tile 3 ka na a bila Awirilikalo tile 28 la, san 2003. [Kɔlɔsili: Ni ɲininkali dɔ kɔfɛ, yɔrɔ ma fɔ tali bɛ se ka kɛ min na, i ka kan ka i yɛrɛ ka ɲinini kɛ walisa ka jaabiw sɔrɔ.—Tirez profit mafilɛ ɲɛw 36-7.]

JƐMU KƐCOGO ƝUMAN

1. Mun ni mun bɛ se k’a to mɔgɔ ka kuma fɔcogo tɛ nuguya? [be p. 93] (1) Daɲɛ minnu dɔnnen tɛ, olu bɛ mɔgɔ bila sigasiga la; (2) Ni jɔli cayara kojugu kuma senfɛ; (3) Labɛnbaliya; (4) Ni jɛmu ma kolabɛn ka ɲɛ; (5) Ni daɲɛ man ca; (6) Ni daɲɛ caman bɛ sankɔrɔta; (7) Ni kuma kankolosigi donnen tɛ ka ɲɛ.

2. Tiɲɛ don wa? walima Tiɲɛ tɛ?: Ka i jɔ kuma senfɛ, o bɛ se ka dabila, k’a masɔrɔ o bɛ lamɛnbagaw bɔ u hakili kan, jɛmu ka taa k’u dan. Aw ka ɲɛfɔli kɛ. Tiɲɛ tɛ. Kuma jɔli bɛ a kolomayɔrɔw bɔ kɛnɛ kan, k’a jɛya. O jɔli sifaw b’a jira ko fɛn b’i fɛ ka fɔ min mɛnni ni a marali nafa ka bon, wa o fana bɛ mɛn mɔgɔ hakili la. [be ɲ. 97-8]

3. Mun na jɛmukɛla walima mɔgɔ min bɛ kalanjɛ kɛ jama la, o ka nafa b’a la ka daɲɛ kolomaw sankɔrɔta kuma kɔnɔ? (Neh. 8:8) [be ɲ. 101] Kuma yɔrɔkolomaw sankɔrɔtali bɛna dɔ fara a faamuyali kan. A bɛ mɔgɔ dɛmɛ tɔw ka sɔn i ka kuma ma, u ka wale kɛ, u k’u hakili sigi kuma fɛ. (Kumakolo bɛ wasa kɛ.)

4. Mɔgɔ bɛ se ka ɲɛtaa sɔrɔ cogo di daɲɛ kolomaw sankɔrɔtali la? [be ɲ. 102-3] Kuma yɔrɔkolomaw sankɔrɔtali bɛna dɔ fara a faamuyali kan. A bɛ mɔgɔ dɛmɛ tɔw ka sɔn i ka kuma ma, u ka wale kɛ, u k’u hakili sigi kuma fɛ. (Kumakolo bɛ wasa kɛ.)

5. Hakilinata kolomaw jumɛn ka kan ka sankɔrɔta kalanjɛ senfɛ, Bibulu kalan kɛtuma na wala jɛkulu ka lajɛ kɛtuma na? [be ɲ. 105] Ɲininkali minnu sɛbɛnnen bɛ, olu jaabi ani masalakun min tɔgɔ sɛbɛnnen bɛ k’a kunbaya, miirinata minnu sirilen bɛ o la, olu sankɔrɔtali ka kan ka kɛ (Nin jaabi ɲɔgɔn bɛ wasa kɛ.)

KALANSEN FƆLƆ

6. Cogo jumɛn na bangebagaw bɛ se ka denw kalan ‘walisa u ka se ka lamɛni kɛ, ka degeli kɛ’ jɛkulu ka lajɛw la? (Deut. 31:12) [be ɲ. 16] (1) Bangebagaw bɛ se ka na ni u denw ye jɛkulu ka lajɛw la, kafo ni kafoba ka jamalajɛw la. (2) So kɔnɔ u bɛ se ka waati labɛn cogo la, walisa denw ka sigi ka jaw lajɛ, wala ka kalan dɔ kɛ. (3) Ni a bɛ bɛn, denmisɛn bɛɛ ka kan k’u tɔgɔla sɛbɛn sɔrɔ, minnu bɛ kalan jɛkulu kɔnɔ. Bangebagaw bɛ denmisɛnw dɛmɛ fana u ka labɛn walisa u ka se k’u sen don lajɛw la. (Kumakolo bɛ wasa kɛ.)

7. Alijana hakili ta fan fɛ, o ye mun ye? [w01 3/1 ɲ. 8-10] Halijana Hakili ta fan fɛ, o ye cogoya ye an bɛ min kɔnɔ ni o dɔ ye dɔnniya cayali ye Jehowa ko la, ani ka a ka hakili senu jiridenw jogo yiriwa an na, an bɛ lafiya min sɔrɔ an ka jɛɲɔngɔnya kɔnɔ ni Ala ani an batoɲɔgɔnw ye.—Esayi 11:9; Gal. 5:22, 23. (Kumakolo bɛ wasa kɛ.)

8. Ntalenw 8:1-3 b’a jira cogo di ko mɔgɔ bɛɛ bɛ se ka dɔ sɔrɔ Ala ka hakilitigiya la, wa Kolosekaw 2:3 ka fɔ la, o hakilitigiya bɛ se ka sɔrɔ min? [w01 3/15 ɲ. 25, 28] A fɔra Ala ka hakilitigiya ko la, ko a bɛ “pɛrɛn”, ko a “jɔlen bɛ” yɔrɔ bɛɛ, mɔgɔ bɛ se ka sɔrɔ yɔrɔ min, jama fana bɛ sɔrɔ yɔrɔ min na i n’a fɔ dugu dondaw la. An mago bɛ fɛn o fɛn na walasa ka Ala ka hakilitigiya sɔrɔ, o bɛɛ nɔrɔlen bɛ Yesu la.—Kewalew 4:12. (Kumakolo bɛ wasa kɛ.)

9. An bɛ se ka mun kɛ walisa Ala tɔgɔ ka dɔn? (Yuhana 17:6) [be ɲ. 273-5] An bɛ se ka Ala lakika woloma ka bɔ tɔw la, a tɔgɔ fɔli fɛ, an ka barow sen fɛ. K’a fɔ ten dɔrɔn “Ala” wala “Matigi”, o tɛ a jira ko an kan bɛ Ala lakika de ma. An bɛ se ka Ala tɔgɔ jira mɔgɔw la Bibulu kɔnɔ, ani yɔrɔ wɛrɛw la, i n’a fɔ sɛbɛnni minnu bɛ foroba so dɔw kan. Min nafa ka bon ɲɛnamaya kɔnɔ, o ye ka an janto Ala ka masabaya la, ani a sago, a mankutuw ni a ka sariyaw la. (Kumakolo bɛ wasa kɛ.)

10. Mɔgɔw mago b’a la ka “Masaya kibaru duman” kolomayɔrɔw jumɛn dɔn? (Matiyu 24:14) [be ɲ. 279-80] Mɔgɔw ka kan k’a dɔn ko san 1914 la, Yesu sigira ka kɛ Ala ka Masaya Masakɛ ye. O tɛmɛnen kɔ, Sendonbaga ni a ka jinɛw filila ka bɔ sankolo la ka jigin dugukolo kan. An bɛ nin diɲɛ sigicogoya donw laban na. Sɔɔni Ala ka masaya bɛna baara kɛ walisa ka Ala ka Masayaba juguw bɛɛ furan ka bɔ dugukolo kan. A bɛna tilennenya sigi diɲɛ kura kɔnɔ.—Dan. 2:44; 7:13, 14; Jir. 12:7-10; 21:2-4. (Kumakolo bɛ wasa kɛ.)

BIBULU KALAN MIN BƐ KƐ DƆGƆKUN O DƆGƆKUN

11. (a) An tile san kɛmɛ fɔlɔ la, “fɛn haramulen” min kofɔlen bɛ Marka 13:14 la, o kɛra mun ye? Romekaw ka kɛlɛbolo ni u ka darapow. O jɔnjɔnw tun bɛ iko boliw, Yahutuw tun bɛ o fɛnw haramu. (Kumakolo bɛ wasa kɛ.) (b) “A y’a jɔ yɔrɔ la min tun tɛ a jɔyɔrɔ ye,” o ye yɔrɔ jumɛn ko ye? A ye kɛlɛ daga sigi Jerusalɛm n’a ka Alabatoso da la san 66 KTL. [2, w99 1/5 ɲ. 15 d. 6]

12. Luka ka linjili b’a jira cogo di ko Yesu tun ye Dawuda ka masasigilan ciyɛntabaga ye bɔnsɔn sira fɛ? (Luka 3:23-38) [w92 10/1 ɲ. 9 d. 3] Luka ye Yesu ka burujusɛbɛn kɛ, Yesu ba yanfan fɛ, Mariyama, ka se Dawuda ma. Fan dɔ fɛ, Matiyu ye Yesu burujusɛbɛn kɛ min bɛ daminɛ a lamɔfa Yusufu la ka se Dawuda ma. A b’a jira o cogo la ko sariya sira fɛ, Yesu tun ye masasigilan ciyɛntabaga ye Dawuda ka kabila kɔnɔ. (Kumakolo bɛ wasa kɛ.)

13. Yesu tun b’a fɛ ka mun fɔ Luka 12:2 la? Hali ni Farisyɛnw ka juguya tun bɛ dogo la alaɲyɛsiranya bisigi dɔ jukɔrɔ, a mɛn o mɛn a ko tun bɛna bɔ kɛnɛ kan. Kɔsafɛ, Yesu ka kalandenw tun bɛna u yɛrɛ niw bila farati la, ka Farisyɛnw ka filankafɔya jugu da kɛnɛ kan bɛɛ ɲɛ na, ni jagɛlɛya ye. [6, gt 77; Luka 12:3-5] (Kumakolo bɛ wasa kɛ.)

14. Yesu ye misali min ta, warijɛ burunnen ko la, o misali kɔnɔ, mun na mɛlɛkɛw ye min kɛ o ye dakabana ko ye? (Luka 15:10) O b’an sɔn hakili la cogo di? Jurumukɛla gansan minnu bɛ o misali la, olu bɛna laban ka kɛ Ala ka sankolola Masaya mɔgɔ dɔw ye. O kɔrɔ ye ko u bɛna jɔyɔrɔ sɔrɔ sankolo la min ka bon ka tɛmɛ mɛlɛkɛw tɔw ta kan! O bɛɛ n’a ta, o keleya tɛ mɛlɛkɛw la, o t’u jɔ u yɛrɛ la fana, nka ni majiginnenya ye, mɛlɛkɛw nisɔndiyalen bɛ, k’a dɔn k’o jurumukɛla ninnu ye gɛlɛya caman kɛlɛ minnu sera ka u labɛn walisa u ka se ka baara kɛ sankolo la iko masakɛw ani sarakalasebagaw, hinɛ ni makariba bɛ minnu na. [gt 85] (Kumakolo bɛ wasa kɛ.)

15. Layidu fila jumɛn kofɔlen bɛ Luka 22:29 la? Yesu ye kuma min fɔ ko: ‘Ne bɛ layidu ta aw ye,’ o tun ye Masaya layidu de ko ye, Yesu ye o min layidu ta a ka kalandenw ye. A ko minkɛ ‘iko ne Fa ye layidu ta ne ye’, a dɔ rɔ, Yesu tun miiri bɛ layidu la, Jehowa ye layidu min ta a ye, ko a bɛna a kɛ sarakalasebaga ye iko Mɛlkisedɛk, i n’a fɔ a sɛbɛnnen bɛ cogo min na Zaburu 110:4 la. [w98 1/2 ɲ. 17 d. 18; it-1 ɲ. 524] (Kumakolo bɛ wasa kɛ.)