Aw b’aw seko kɛ walisa kalo baara dantigɛli ka kɛ tiɲɛ ye wa?

¹ Bibulu maana caman bɛ kuma jateden kɛrɛnkɛrɛnnenw kan. Olu b’an dɛmɛ ka faamuyali jɛlen sɔrɔ ko kɛlen kan. Misali la, Jedeɔn ye se sɔrɔ Madiyankaw kan ni cɛ 300 dɔrɔn ye. (Kir. 7:⁠7) Jehowa ka mɛlɛkɛ ye Asiri sɔrɔdasi 185000 faga. (2 Mas. 19:35) San 33 Krista tile la, Pantekɔti don na, mɔgɔ 3000 ɲɔgɔn batisera. Waati dɔɔnin dɔrɔn o kɔfɛ, dannabagaw hakɛ bonyara ka se mɔgɔ 5000 ɲɔgɔn ma (Kɛw. 2:41; 4:⁠4). Nin maanaw b’a jira k’a jɛya ko Ala ka fɔlɔ baarakɛlaw tun ye u cɛsiri kosɛbɛ walisa ka kow sɛbɛn iko u kɛra cogo min na, wa, k’u sɛbɛn ka dafa fana.

² Bi fana, Jehowa ka jɛkuluba b’a ɲini an fɛ an ye baara hakɛ min kɛ foro la, an ka o sɛbɛn kalo o kalo. N’an sɔnna ka tugu o ko sigilen na ni kantigiya ye, o b’a to waajuli baara bɛ kɔlɔsi ka ɲɛ. Cɛsiri ka kan ka kɛ cidenyabaara ɲɛ min na, walima waajulikɛyɔrɔ min mago bɛ baarakɛlaw la kosɛbɛ, foro baara-dantigɛli-sɛbɛnw bɛ se k’o fɛnw jira. Jɛkulu kɔnɔ, mɔgɔ minnu bɛ se ka dɔ fara u ka cidenyabaara kan, ani mɔgɔ minnu mago bɛ se ka kɛ dɛmɛ na, foro baara-dantigɛli-sɛbɛnw bɛ maakɔrɔw dɛmɛ olu fana ka o ye. Foro baara-dantigɛli-sɛbɛn minnu bɛ Masaya waajuli baara ɲɛtaaw kan, olu bɛ dusu don an balimaw bɛɛ lajɛlen kɔnɔ. Yali e b’i niyɔrɔ kɛ walisa baara hakɛ min bɛ kɛ waajuli la, o jate jɔnjɔn ka dɔn wa?

³ E yɛrɛ jɔyɔrɔ ye min ye: I ye baara min kɛ cidenyabaara la, ni kalo sara, yali a ka gɛlɛn i bolo i hakili ka jigin o la wa? N’a bɛ o cogo la, ni i ye baara kɛ tuma o tuma foro baara la, mun na i tɛna o sɛbɛn? Dɔw bɛ o sɛbɛn donjatelan kan, walima azanda kɔnɔ. Dɔw yɛrɛ bɛ foro baara-dantigɛli-sɛbɛn ta u bolo. Ni kalo sara dɔrɔn, i teliya k’i ka foro baara-dantigɛli-sɛbɛn di gafe kalan lakɔlɔsibaga ma. Walima, ni a ka di i ye, i bɛ se k’a bila foro baara-dantigɛli-sɛbɛnw buwati kɔnɔ, Masaya so la. Ni i ɲinɛna k’i ta di, i teliya ka gafe kalan lakɔlɔsibaga sɛgɛrɛ, k’o di a ma. I kana a kɔnɔ ale yɛrɛ ka na ka kuma i fɛ o ko la. I bɛ baara min kɛ foro la, n’i bɛ o jateminɛ koɲuman, i sɛbɛ la, o b’a jira k’i bɛ bonya da Jehowa ka o ko sigilen kan. O b’a jira fana ko i bɛ balimaw bonya minnu sugandira foro baara-dantigɛli-sɛbɛnw kafoli ni u sɛbɛnni kama.​—⁠ Luk. 16:⁠10.

⁴ Gafe kalan lakɔlɔsibaga jɔyɔrɔ: Iko bagangɛnna min ɲɛmajɔlen don, ni a b’a jan to tuma bɛɛ a ka baganw na, gafe kalan lakɔlɔsibaga fana bɛ a mago don a ka kulu mɔgɔ kelen-kelen bɛɛ ka baara la, kalo kɔnɔna bɛɛ la. (Nt. 27:23) A b’a dɔn ni weleweledala kelen-kelen bɛɛ bɛ baara kɛ tuma bɛɛ, nisɔndiya la, ani kɛcogo la min nafa ka bon. Ni weleweledala dɔ ma waajuli kɛ kalo kɔnɔna na, a b’i teliya k’o tigi dɛmɛ. Tuma caman na, i b’a sɔrɔ o weleweledala mago bɛ min na dɔrɔn, o ye ko gafe kalan lakɔsɔsibaga ka kuma dɔ fɔ a ye min bɛ dusu don a kɔnɔ, walima a ka hakilila dɔ di a ma, a bɛ se ka baara kɛ ni min ye, walima a k’a ɲini o weleweledala fɛ, o ka a bilasira foro baara la.

⁵ Ni kalo sara, gafe kalan lakɔlɔsibaga b’a sɛgɛsɛgɛ ni a ka kulu mɔgɔw bɛɛ ye u jɔyɔrɔ fa, k’u ka foro baara-dantigɛli-sɛbɛn di. O la sa, waajuli baara mumɛ min kɛra jɛkulu fɛ, sɛbɛnnikɛla bɛ se k’o hakɛ dɔn, k’o ci kalo kura tile wɔɔrɔ. Ni kalosa surunyara tuma min na, a nafa ka bon gafe lakɔlɔsibaga ka a ka kulu hakili jigin o la, ka foro baara-dantigɛli-sɛbɛnw mara gafe kalan kɛyɔrɔ la. Ni weleweledala dɔw bɛ ɲinɛ tuma bɛɛ k’u ka foro baara-dantigɛli-sɛbɛnw lafa, a bɛ se k’olu hakili jigin cogo bɛnnen na, ka dusu don u kɔnɔ o sira la.

⁶ Ni an bɛ an ka foro baara-dantigɛli-sɛbɛn di joona, o b’a to baara hakɛ min jate kɛra, o ni baara min kɛra tigitigi, olu bɛɛ ka kɛ kelen ye. Yali i bɛna i niyɔrɔ kɛ, ka teliya k’i ka foro baara-dantigɛli-sɛbɛn di kalo o kalo wa?