Bibulu kalan ɲɛminɛ cogo
1 Bibulu kalan min bɛ kɛ an sago ye, ni ɲɛtaa bɛ sɔrɔ a la, o bɛ kɛ cogo di? Ɲɛjiralan jumɛn bɛ yen n’an bɛ an sinsin o kan? Bibulu tɛmɛsiraw minnu bɛ yɔrɔ kalantaw kɔnɔ, olu ka kan ka minɛ cogo di? Jɔnni de ka kan ka dakunw kalan? Kalan min ye an sinsin bere ye, ka fara o kan, mun bɛ se ka kɛ walisa kalanden ka tiɲɛ minɛ ni sɛbɛ ye? An man kan ka bin jan jumɛnw kɔnɔ?
2 Kalan bɛ ɲɛminɛ cogo min na: An bɛ deli ka du Bibulu kalan kɛ i na fɔ La Tour de Garde ta bɛ kɛ cogo min na. An bɛna dakun min lajɛ, an bɛ fɔlɔ ka o kalan. O kɔ, kalan ɲɛminɛbaga bɛ ɲininkali kɛ, min sɛbɛnnen bɛ. A bɛ sɔrɔ k’a ɲini kalanden fɛ, a ka jaabi di. Ni kalanden bɛ ka sigasiga, kalan ɲɛminɛbaga ka kan ka ɲininkaliw kɛ cogo wɛrɛ la, minnu bɛ kalanden dɛmɛ a ka se ka hakili jagabɔ barokun kan, ka jaabi ɲuman sɔrɔ.
3 Bibulu tɛmɛsiraw ni dakun kɔnɔ kuma bɛ ɲɔgɔn ta cogo min na, aw ye o lajɛ. A jira kalanden na, Bibulu tɛmɛsira sɛbɛnnenw bɛ dɔn cogo min na. I hakili jagabɔ ni a ye u bɛ se ka waleya cogo min na ! Ni Bibulu tɛmɛsiraw dira, ka sɔrɔ kuma min bɛ o tɛmɛsira kɔnɔ o ma sɛbɛn, a ka ɲi aw k’o yɔrɔw mafilɛ Bibulu kɔnɔ, ni u man jan. A ɲini kalanden fɛ a k’u kalan, a k’a jira cogoya min na u bɛ dakun kumaw sinsin walima k’u faamuyali diya.
4 Kalanden dɛmɛ a ka tiɲɛ minɛ ni sɛbɛ ye : Dusu don kalandenw na u ka kalan labɛn koɲuman. A fɔ ka gɛlɛya, ko kalanjɛ nafa ka bon kosɛbɛ kalan kɔnɔ. Min ka ɲi kosɛbɛ, o ye kalanden ka taa a fɛ, ka kalan caman kɛ, k’a hakili jakabɔ o kalanw kan. Kalan ɲɛminɛbaga dɔw b’a to, kalanden ka dakun bɛɛ kalan. Dɔw ni u ka kalandenw bɛ dakun kalan bɔ ɲɔgɔn kɔrɔ. An ka a ko latigɛ ka ɲɛ, an kana ɲinɛ ko an bɛ kalanden de ka nafa ɲinina.
5 Ni kalan bɛ durusi ten dɔrɔn, i na a fɔ lakɔli la, o bɛ se ka dɔ fara kalanden ka dɔnniya kan, nka yali a bɛ ka min kalan, a dalen bɛ o la wa? Ni a ye tiɲɛ minɛ ni sɛbɛ ye, a yɛrɛ ka kan k’a ɲi yɔrɔ ye a ka kalanta la. A bɛ ka min kalan o bɛ nɔ jumɛn bila a yɛrɛ la ? A bɛ ka min kalan a bɛ se ka baara kɛ ni o ye cogo di? Ɲininkaliw minnu bɛ na ni hakili jagabɔli ye to ka olu kɛ walisa ka kalanden dusu lamin.
6 I yɛrɛ kɔlɔsi janw na : Jan dɔw bɛ, an ka kan ka an yɛrɛ tanga minnu ma, ni an bɛ Bibulu kalan ɲɛminɛ. Ni ɲininkaliw lawuli la, minnu tɛ kalan kɔnɔ, a ka ɲi tuma caman, ka o jaabi bila kalan laban na, walima ka a bila tuma wɛrɛ la. Min fana ka ɲi, o ye ka kalanden bila a ka jaabi di, a yɛrɛ ka fɔcogo la, a kana to ka jaabi kalan gafe kɔnɔ. O b’i dɛmɛ, k’a dɔn ko kalanden bɛ min kalan a bɛ o faamuya ka ɲɛ.
7 Munna i t’a kɛ i kuntilenna ye ka Bibulu kalan ɲɛminɛ, hali ni a kɛra kelen ye. Ko gɛlɛn tɛ o ye, ni i ye i jigi sɛmɛ Jehowa la, ka tugu “La Tour de Garde” kalan kɛcogo kɔ. Sira min ka ɲi ni a bɛɛ ye, n’i b’a fɛ ka mɔgɔw kalan tiɲɛ ko la, ka u kɛ kalandenw ye, o ye ka Bibulu kalan ɲɛminɛ ni u ye. Ni i b’o kɛ, i fana na nisɔndiya sɔrɔ, nisɔndiya min bɛ Yesu ka cikan matarafa ko ɲuman na. O cikan bɛ Mat.28:19, 20 kɔnɔ.