An ka hakili sɔrɔ ɔridinatɛri ko la

¹ Ciden Pol ye dusu don san kɛmɛ fɔlɔ Kerecɛnw kɔnɔ, walisa fosi kana u hakili bɔ Ala ka baara kan bawo ‘waati tɔ tun tɛ bɛrɛ ye.’ (1 Kɔr. 7:29) Ikomi diɲɛ kɔrɔ in bantuma ka surun, an ka kan ka ‘Masaya ani Ala ka tilennenya fɔlɔ ɲini,’ ka ‘waati bɛnnen kunmabɔ.’ Tiɲɛ na, waati sɔngɔ ka bon cɛnni ma​—⁠Mat. 6:33; Efɛ. 5:15, 16.

² Tɛkinolozi seko n’a dɔnko kunbɛnna iko fɛn min bɛ mɔgɔ dɛmɛ ka waati kunmabɔ. Misali la, n’i y’i bolo digi ɔridinatɛri butɔn kelen kan dɔrɔn, i bɛ se ka kunnafoni camanba sɔrɔ o yɔrɔnin bɛɛ la. N’a kɛra fɛɛrɛ wɛrɛw fɛ, baara min bɛ lɛrɛ, walima dɔgɔkun caman ta, tuma caman na ɔridinatɛri bɛ se k’o baara kɛ segɔndi damadɔw dɔrɔn kɔnɔ. Baarakɛminɛnw don minnu bɛ mɔgɔ dɛmɛ kosɛbɛ, ni baara bɛ kɛ n’u ye cogo bɛnnen na.

³ Yali tiɲɛ na, a b’a to an ka waati kunmabɔ wa?: Fan wɛrɛ fɛ, o tɛkinolozi sifa tɛ sɔrɔ gansan ni musakabaw tɛ: waribɔ, ni waati. Walisa ɔridinatɛri ka baara kɛ, fo k’a bilasira. A bɛ bilasira cogo min na, fo ka lɛrɛ caman ta tuma dɔw la o kalan kama. Ka fara o kan, tɛkinolozi seko n’a dɔnko ka di mɔgɔ min ye, o tigi bɛ se ka waati caman dun o la, k’a sɔrɔ o waati tun bɛ se ka mago wɛrɛ ɲa. An ka kan ka hakilila bɛnnen sɔrɔ. Sariyakolo min bɛ ciden Pol ka kankaridakan na, an hakili ka to o la, n’o ye ka taama ‘iko hakilitigiw, ka waati bɛnnen kunmabɔ’​—⁠1 Kɔrɛntekaw 7:31 lajɛ.

⁴ Ŋaniyaɲumantigi damadɔw ye ɔridinatɛri porogaramuw kɛ jɛkulu ka fɛn sɛbɛnnenw marayɔrɔ ye. A jɛlen don ko i b’a fɛ ka min ni min kɛ n’i ka ɔridinatɛri ye, o ye i kelen tɔgɔla ko ye, nka, jɛkulu ka fɛn sɛbɛnnenw man kan ka mara ɔridinatɛri kɔnɔ, bawo denmisɛnninw, ani mɔgɔ wɛrɛ minnu yamaruyalenw tɛ k’o fɛnw dɔn, olu bɛ se ka taa bɔ u kan. Jɛkulu ka fɛn sɛbɛnnenw bɛɛ, a kɛra jatew dantigɛliw ye, walima jɛkulu weleweledalaw ka waajuli karatiw ye, walima fɛn wɛrɛw ye, olu maralen ka kan ka to u cogo la, u bɔra Société fɛ cogo min na. Kunnafoni minnu bɛ jɛkuluw kan, ni u bɛ o sɛbɛnfuraw kan, olu man kan ka mara ɔridinatɛri kɔnɔ. O cogo la, jɛkulu ka fɛn sɛbɛnnen minnu ka kan ka to gundo la, olu lakananen bɛ to.

⁵ Lakɔlɔsibaga minnu b’u jɔyɔrɔ fa ka ɲɛ, olu ka kan ka jateminɛ kɛ n’u bɛ kalansen di balimaw ma Ala-ka-Marako kalan na, ani Baara ka lajɛ la. Kalansen min ka kan ka kɛ, u ka kan ka o to u hakili la, kɛrɛnkɛrɛnnenya la. Misali la, Ala-ka-Marako kalan na, a bɛnnen tɛ kalansen sugu dɔw ka di balima dɔw ma. Jateminɛ ka kan ka kɛ nin fɛnw kan: Kalansen kun, mɔgɔ min bɛ o kɛ, o sekow, ani kalansen bɛ fɛn min kan. A man kan k’a to ɔridinatɛri ma, o k’a latigɛ mɔgɔ min bɛna baara min kɛ.

⁶ Ni kalansen dira balimakɛ dɔ ma k’a kɛ jɛkulu ka lajɛw la, o balimakɛ man kan ka da mɔgɔ wɛrɛ ka kalansen labɛnnen na, kɛrɛnkɛrɛnnenya la ni a tɛ o tigi dɔn. A man kan ka miiri k’o kalansen bɛ ɔridinatɛri kɔnɔ minkɛ intɛrnɛti la, a bɛ se ka baara kɛ ni o ye, ka a yɛrɛ doni jigin o cogo la. Kerɛcɛn minnu b’u jɔyɔrɔ ta u sɛbɛ la, olu t’a miiri ka barokun dɔw labɛn, walima ka jɛmukanw labɛn minnu sinsinnen bɛ Bibulu kan, ka tila k’olu bila ɔridinatɛri kɔnɔ intɛrnɛti fɛ, walisa mɔgɔ wɛrɛw ka baara kɛ ni o fɛnw ye. Nka, ɔridinatɛri ani Tɔn ka Watchtower Library CD-ROM bɛ se ka kɛ baarakɛminɛn nafamaw ye balima kelen-kelen bɛɛ bolo, k’u dɛmɛ u ka ɲinini nafamaw kɛ, waati surun kɔnɔ.

⁷ A ka fisa tuma caman na nin fɛnw kana dilan, k’u jɛnsɛn ɔridinatɛri fɛ, walima cogo wɛrɛw fɛ: porogaramuw, lisitiw, ani kunnafoni sɛbɛn sugu wɛrɛw. Ka Baara ka lajɛ yɔrɔw, ani Ala-ka-marako kalansenw labɛn, ka u latɛmɛ balimaw ni ɲɔgɔn cɛ, a ka fisa o kow fana kana kɛ. A ka ɲi balimakɛ yɛrɛw k’u ka baara labɛn, k’u hakili to sigida magow la, n’u bɛ k’a labɛn. (1Tim. 4:13, 15) Jɛɲɔgɔnya min bɛ anw, ani an balimaw cɛ, a man kan abada, an k’o cɛsiraw kɛ wari ɲini siraw ye.

⁸ Bibulu tɛmɛsira minnu bɛ La Tour de garde barokunw kɔnɔ, ani gafe kɔnɔ, gafe min bɛ kalan Jɛkulu ka Gafe kalan na, k’olu tɛmɛsiraw bɔ ɔridinatɛri fɛ, k’u kɛ sɛbɛnw kan, ka tila k’olu jɛnsɛn, o ko bɛ cogo di? A ka fisa weleweledala yɛrɛw k’u ka fɛnw sɛbɛn, ka taamasiyɛnw kɛ u ka Bibulu kɔnɔ, ani u ka sɛbɛnw kɔnɔ minnu ka kan ka kalan. Bibulu tɛmɛsira minnu kofɔlen bɛ sɛbɛnw kɔnɔ, k’olu kalan ɔridinatɛri ka sɛbɛn bɔlenw kan, lajɛw la, o bɛ se ka mɔgɔ caman dusu faga u ka Bibulu yɛrɛ ta, ka a tɛmɛsiraw lajɛ. Ka Bibulu tɛmɛsiraw ɲini k’a ye Bibulu kalan kɛtuma na, walima jɛkulu ka lajɛ tuma na, o ye ko ye, an degera min na, wa, an labɛnna min kama fana walisa ka baara ɲuman kɛ ni Bibulu ye, an ka foro cidenyabaara la. Tuma caman na, kɛrɛnkɛrɛnnenya la, ni Bibulu tɛmɛsiraw ka jan, k’u kalan Bibulu yɛrɛ kɔnɔ, o ka fisa kosɛbɛ, janko ni dusu donna lamɛnbagaw kɔnɔ, u k’o tɛmɛsiraw lajɛ Bibulu kɔnɔ.

⁹ Jan jugu wɛrɛw: Iko a ɲɛfɔlen bɛ cogo min na san 1993 Utikalo tile fɔlɔ La Tour de Garde ɲɛ 17nan na, kunnafoniɲini intɛrnɛti kan, o bɛ se ka an bila farati juguw la alako ta fan fɛ. Iko mɔgɔ hakilintan dɔ bɛ se cogo min na ka virusi don intɛrnɛti baarakɛcogo la, n’o ye ka porogaramu dɔ dilan walisa ka ɔridinatɛri fisiyew bayɛlɛma, k’u cɛn, o cogo kelen na fana, diinɛmɔgɔ murutilenw, ani diinɛ fuw ɲɛmɔgɔw, ani mɔgɔ wɛrɛw b’a ɲini ka tɔw jogo cɛn. U bɛ se fana k’u tugu k’u ka miiri juguw bila intɛrnɛti kan. O la sa, hali ni a sɛbɛnnen bɛ ko “Réservé aux T.J.” i yɛrɛ kɔlɔsi, fo n’a y’a sɔrɔ sɛrivɛri kɔlɔsilen bɛ ka ɲɛ, wa, ko Jehowa ka baarakɛla mɔlenw, ni kantigiw dɔrɔn de bɛ se ka don o yɔrɔ la, n’o tɛ, Kerecɛn bɛ se ka a yɛrɛ sɔrɔ ‘jɛɲɔgɔn juguw’ ka fanga kɔrɔ. (1 Kɔr. 15:33) Tɔn ye sɛbɛnw sɔrɔ minnu y’a jira ko erozo dɔw bɛ yen minnu ye erozo pirive tɔgɔ da u yɛrɛ la, ka alako ɲɛfɔ u yɛrɛw ka faamuyali sira fɛ, nka, u tɛ dan o ma, u bɛ laadilikan juguw di, ka nkalonw tigɛ, ka kunnafoniw jɛnsɛn minnu tɛ tiɲɛ ye, ka miiri juguw don mɔgɔ kɔnɔ, ka ɲininkaliw lawuli, ani siga minnu bɛ dɔw ka limaniya barika dɔgɔya, ka Bibulu tɛmɛsiraw kɔrɔ ɲɛfɔ olu yɛrɛw ka faamuli cogo la, ka tila k’olu jɛnsɛn. O kuma dɔw bɛ iko fɛn ɲumanw, ani fɛn nafama minnu bɛ dɔnniya di mɔgɔ ma, nka, fɛn juguw bɛ se ka sɔrɔ u la, minnu bɛ se ka mɔgɔ ta cɛn. Kerecɛnw b’u ɲɛsin “jɔnkɛ dannamɔgɔ ma, min ye hakilima ye’ walisa ka dumuni ni faamuyali jɛlen sɔrɔ hakili ta fan fɛ, a waati la. (San 1994, Zuluyekalo tile fɔlɔ La Tour de Garde, ɲɛw 9-11 lajɛ.) K’an ka limaniya lakana, k’a kisi hakilila jugu tolilenw bɛɛ ma, o baara ye Kerecɛn kelen-kelen bɛɛ kunko ye sɛbɛ la. Kerecɛn ka kan fana k’a dɔn tuma bɛɛ, a bɛ jɛɲɔgɔnya sirataama mɔgɔ minnu fɛ​—⁠ Mat. 24:45-47; 2 Yuh. 10, 11.

¹⁰ OTour de Garde barokun kelen in y’i sinsin a kan, ko wajibi don ka ‘copyright’ sariya labato. Jagokɛda caman minnu bɛ ɔridinatɛri porogaramuw dilan, k’u feere, ka u ka ‘copyright’ da o porogaramuw kan, ka ‘lisansi’ di k’a fɔ baara bɛ se ka kɛ ni porogaramuw ye cogo min na ka bɛn ni sariya ye. O lisansi b’a jira tuma caman na ko porogaramuw bɛ mɔgɔ min bolo, yamaruya tɛ o tigi bolo ka o porogaramu ɲɔgɔn kopiye ka a di mɔgɔ wɛrɛw ma. Tiɲɛ yɛrɛ la, diɲɛ bɛɛ bɛnkan sariya sɛbɛn ‘copyright’ kan, a jiralen bɛ k’o dagalen tɛ yɛrɛ. Nataba caman bɛ yen minnu tɛ siga ka sariya cɛn. Nka, Kerecɛnw ye mɔgɔ laadiriw ye sariyako kan, u bɛ Sesar ta segin Sesar ma​—⁠ Mat. 22:21; Rom. 13:1. San 2001 Feburuyekalo tile 15 La Tour de Garde ɲɛw 28-9 lajɛ, “Questions de lecteurs” yɔrɔ la.

¹¹ Jagokɛdaba dɔw bɛ ɔridinatɛri feere ni porogaramu dilannen ni u lisansi ye. Nka, ɔridinatɛri bɛ feere bitiki minnu na, olu dɔw tɛ lisansiw di, bawo, u ye porogaramu minnu sigi o ɔridinatɛriw kɔnɔ, olu ye “kopiw” ye minnu ma daga. O la sa, mɔgɔ min bɛ o ɔridinatɛri sugu san, ka baara kɛ ni o porogaramuw ye, o tigi bɛ sariya sɔsɔ. Ka ɲɛsin o ko ma, ‘copyright’ bɛ minɛn o minɛn kan, (iko a bɛ Tɔn ka sɛbɛnw kan cogo min na), Kerecen man kan ka o fisiye suguw don erezo dɔ la, walima k’olu ta ka bɔ erezo la, ka u mara. Kerecɛn man kan fana ka fɛn fosi kopiye, k’a sɔrɔ fɛntigi ma yamaruya di a ma​—⁠Heb. 13:18.

¹² Nafa min bɛ sɔrɔ ɔridinatɛri baara la, ani farati min b’o la, an ka kan ka jateminɛ kɛ olu kan. Baara ɲuman bɛ se ka kɛ ni telewisiɔn ye cogo min na, o cogo kelen na, telewisiɔn bɛ se ka nɔ jugubaw bila hadamadenya kɔnɔ bi, diɲɛ dɔnnikɛlaw bɛɛ bɛ ka jɔɔrɔ ni min ye. Ɔridinatɛri baara bonyara ka se diɲɛ yɔrɔ bɛɛ ma. A bɛ se ka kunnafoni nafamaw di an ma, dan tɛ minnu na, k’an to an ka so, walima an ka baarakɛyɔrɔ la. An bɛ diɲɛ min kɔnɔ, bɛɛ bɛ girin min na, ɔridinatɛri bɛ mago caman ɲɛ jagokɛtɔnw ni kɛnyɛrɛyew ye, a bɛ kunnafoniw di mɔgɔw ma, walisa u k’u tɔnɔ sɔrɔsiraw dɔn, ani u k’a dɔn jagokɛtɔnw tɔnɔ sɔrɔsiraw bɛ bolo min kan. O waati kelen na, intɛrinɛti ni ɔridinatɛri ko falen bɛ kunkow la, i n’a fɔ kakalayakow jaw, ani kɔniya bɛ porobagandi minnu na, mɔgɔw farafarali kama, ani kunnafoni walanwalannen wɛrɛ minnu bɛ wale jugubaw kɛcogo jira.

¹³ O kosɔn, dalilu sɛbɛma caman b’an bolo, minnu b’a to Kerecɛn ka kan ka hakili sɔrɔ n’a bɛ baara kɛ ni ɔridinatɛri ye. Mɔgɔ caman ye nafa sɔrɔ ka baara kɛ ni Watchtower Library CD-ROM, ye ɲinini cogo caman bɛ sɔrɔ min kɔnɔ. Mɔgɔ min bɛ baara kɛ ni ɔridinatɛri ye, kuntilenna nafamaw kama, o tigi b’a dɔn ko nafaba bɛ o la. Nka, o tigi b’a dɔn fana ko a ka kan k’a yɛrɛ kɔlɔsi walisa ka a yɛrɛ, ani mɔgɔ wɛrɛw lakana ɔridinatɛri masibakow bɛɛ ma. An ka kan ka hakili sɔrɔ walisa hali ni kojugu tɛ ka baara kɛ ni ɔridinatɛri ye, an kan’a to a k’an ka waati fanba ta, bawo an y’an ka waati bila Ala ka baara kama. An kan’a to fana o k’an hakili ta ka bɔ an ka baara ni an kuntilenna fɔlɔw kan.​—⁠ Mat. 6:22; 28:19, 20.