Mɔgɔw bɛ ka dalajɛ ka bɔ kanw bɛɛ la

¹ Ala ka Kuma bɛ ka tiimɛ! Jamakulu ‘min bɔra siyaw ka kanw bɛɛ la’, o bɛ ka sɔn bato lakika ma. (Zak 8:23) Jehowa seerew bɛ ka kabilaw bɛɛ, ani siyaw bɛɛ, ani kanw bɛɛ mɔgɔw dɛmɛ, u ka na u jɔ, u jɛlen, Jehowa ɲɛkɔrɔ, ni jigiya ye ka kisi “tɔɔrɔba” ma. Jehowa Seerew bɛ k’o kɛ cogo di?—⁠Jir.7: 9, 14.

² Ala ka jɛkulu kolabɛnnen bɛ dɛmɛ don: Ɲɛmɔgɔ kulu ye fɛɛrɛ tigɛ walisa gafe minnu sɛbɛnna Bibulu walawalali kama, olu ka se ka sɔrɔ kan 380 hakɛ la. O kun ye, dugukolo kan mɔgɔw bɛɛ ka se ka kibaru duman nafa faamu k’a jɛya. Ka se ka gafew labɛn Bibulu walawalali kama, ani k’u dilan o ɲɔgɔnna kan hakɛ caman na, o ye baara belebeleba ye. O bɛ na ni kuluw sigili ye sen kan, minnu kɔnɔmɔgɔw bɛ kanw bayɛlɛmali ɲɛdɔn, ani ka baarakɛminɛnw fana di u ma, u mago bɛ minnu na, walisa ka an ka sɛbɛnw bayɛlɛma nin kanw bɛɛ la, k’u dilan, ka tila k’u ci. Nka, o ko bɛɛ la, Masaya waajulikɛlaw kelen–kelen de jɔyɔrɔ ka bon, katuguni olu de bɛ Bibulu ka kisili cikan lase mɔgɔw ma.

³ An ka an kun don o gɛlɛya kɔrɔ: Kanwɛrɛfɔbagaw bɛ sɔrɔ yɔrɔ caman na sisan. Walisa ka kibaru duman lase olu ma, Ala ka baarakɛla caman bɛ k’u jija ka kan wɛrɛw dege, i n’a fɔ Sinuwakan, Irisikan, Ɛsipaɲɔlikan, walima kan wɛrɛ minnu bɛ fɔ u sigiyɔrɔ la. Dɔw bɛ ka tulogerenw ka kanw dege, ni o ye Ameriki jamana, ani Faransi jamana ta ye. Kibaru duman waajuli bɛ ka kɛ kan caman na Farafinna. Mɔgɔ minnu tun ma deli ka Jehowa ko mɛn fewu, walima minnu tun tɛ fosi dɔn Bibulu ko la, olu bɛ ka sɔn Ala ka tiɲɛ Kuma la.—⁠Rom. 15:⁠21.

⁴ Yali an bɛ se ka dɔ fara an ka cɛsiri kan, walisa ka kibaru duman lase siya wɛrɛw mɔgɔw ma minnu sigilen bɛ an ka waajulikɛyɔrɔ la wa? (Kol. 1:25) Jɛkulu caman bɛ ka dunanw waaju minnu sigilen bɛ u lamini na. Waajulikɛlaw b’a daminɛ ka dunanw ka kanw daɲɛ dɔw dege, ka se ka ɲɛfɔli nɔgɔn kɛ, i n’a fɔ: “I ni yantuma. Nin ye kibaru duman ye ka ɲɛsin i ma. [O kɔ, u bɛ sɛbɛndennin, walima gafenin dɔ di o tigi ma, a ka kan na.] K’an bɛn.” Siga t’a la ko Jehowa bɛ ka barika don o waajuli daminɛcogo nɔgɔnw la!

5 Masaya ka kibaru duman ɲɛsinnen bɛ mɔgɔ sifa bɛɛ, ani kan suguya bɛɛ fɔbagaw ma. An ka fɛɛrɛ kɛ cogo bɛɛ la, walisa ka Masaya kibaru fɔ u ye.