Jamakulu min ka nisɔndiya ɲɔgɔn tɛ dugukolo kan
1“Jehowa ye siya min ka Ala ye, o ye dubaden ye !” (Zab. 144:15) Nin kuma b’a jira ko Jehowa Seerew ye jamakulu ye min ka hɛrɛ ɲɔgɔn tɛ dugukolo kan. Jehowa kelenpe ye Ala tiɲɛma ni Ala ɲɛnama ye. Ka baara kɛ a ye, o ye nisɔndiya belebelebe ye min ɲɔgɔn tɛ. Jehowa Ala ye “hɛrɛ Ala ye.” O de y’a to mɔgɔ minnu bɛ a bato, olu fana bɛ a ka nisɔndiya ɲɔgɔn jira. (1 Tim. 1:11) Kun jumɛnw b’an bolo an ka nisɔndiya sɔrɔ an ka bato kɔnɔ?
2 An ka nisɔndiya kunw: Yesu ko an ka hɛrɛ bɛ bɔ min na, o ye k’a dɔn ko an ye ‘faantan ye alako ta fan fɛ.’ (Mat. 5:3, NW) Ka Bibulu kalan tuma bɛɛ, ka to ka na an ka Krecɛn lajɛw la tuma bɛɛ, o de bɛ an mago ɲɛ alako ta fan fɛ. Ala ka tiɲɛkuma kalanni ye an hɔrɔnya ka bɔ diinɛw ka nkalonw n’u ka filiw la. (Yuh. 8:32) Bibulu y’an dɛmɛ fana ka ɲɛnamaya taasiraw bɛɛ la ɲuman dɔn. (Esa. 48:17) O de kosɔn, an ka Krecɛn jɛkulu hɛrɛma kɔnɔ, an bɛ nisɔndiya sɔrɔ an balimaw ka jɛɲɔgɔnya la.—1 Tes. 2:20; 1 Piɛ. 2:17.
3 N’an bɛ Ala ka namuw mara ɲuman ni juguman ta fan fɛ, an bɛ nisɔndiyaba sɔrɔ, bawo an b’a dɔn ko o de b’an lakana, wa, o bɛ Jehowa nisɔndiya. (Nta. 27:11) Kunnafonidila dɔ y’a sɛbɛn ko: “Hali ni u ka sariyaw ka gɛlɛn, Jehowa Seerew bɔlen tɛ mɔgɔw fɛ minnu tɛ hɛrɛ la. Nka, u ka denmisɛnw n’u ka mɔgɔkɔrɔbaw bɔlen bɛ mɔgɔ nisɔndiyalenw fɛ. U ka nisɔndiya ɲɔgɔn man teli ka ye mɔgɔ wɛrɛw la. U ka kow bɛrɛ bɛnnen don.” An bɛ se ka mɔgɔ tɔw dɛmɛ u ka an ka hɛrɛ nɔgɔn diyabɔ cogo di?
4 Mɔgɔ wɛrɛw dɛmɛ ka hɛrɛ sɔrɔ: Diɲɛ falen bɛ hɛrɛntanya la, wa mɔgɔw fanba sigilen tɛ ni ɲuman ye sini ko la. Nka, anw sigilen bɛ ni hɛrɛ ye sini ko la, bawo an b’a dɔn ko don dɔ la dusukasikow bɛɛ bɛna kɛ ko tɛmɛnenw ye. (Jir. 21:3, 4) O la sa, an b’an seko bɛɛ kɛ waajuli la, ka dusu jɛlen tigiw ɲini walasa u ka an ka jigiya n’an ka dannayakow sɔrɔ Jehowa ko la.—Eze. 9:4.
5 An balimamuso tutigɛbaga dɔ y’a fɔ ko: “Foyi tɛ yen min bɛ na ni nisɔndiya ye ka tɛmɛ mɔgɔ wɛrɛw dɛmɛni kan ka Jehovah ni a ka tiɲɛ dɔn.” An k’an seko bɛɛ kɛ ka dusu don mɔgɔ caman kɔnɔ walasa u ka sɔn sokɔnɔ Bibulu kalan ma. An ka baara kɛ Jehovah ye, k’an seko bɛɛ kɛ ka mɔgɔ wɛrɛw dɛmɛ u fana ka se ka baara kɛ a ye. O de bɛ na ni hɛrɛ bɛɛ la belebele ye.—Kɛw. 20:35.