An ka mɔgɔ ladɔnniya Jehowa tɔgɔ n’a ka kɛwalew la
1 “Aw ka barika da Jehowa ye, a’ ye a tɔgɔ wele. Aw ka a ka kɛwalew jira siyaw cɛma. . . . Jehowa ɲinibagaw dusukun ka ɲagali.” (Zab. 105:1, 3) Zaburu sɛbɛnbaga min y’o sɛbɛn, a ye nisɔndiyaba sɔrɔ ka Jehowa n’a ka “kɛwalew” kuma fɔ tɔw ye. Kɛwale jumɛnw? Siga si t’a la k’o sirilen bɛ a ka masaya nɔrɔ la, ani ‘kisili kibaru duman na ka bɔ ale yɔrɔ’.—Zab. 96:2, 3; 145:11, 12.
2 Ikomi an bɛ ka gɛrɛ san 2001Hakilijigin don waati la, kun caman b’an bolo k’an nisɔndiya Jehowa ka kɛwalew la ka ɲɛsin an ma. Cogo di? Siga si t’a la ko Krecɛn lakikaw fɛ, Matigi ka surɔfana ye san ko bɛɛ la belebele ye. Ko si wɛrɛ tɛ yen min bɛ iko o ko, n’i y’a nafa, a kɛkun, ani a kɛcogo lajɛ. Jehowa ni Yesu ye fɛɛrɛ min kɛ an ye walasa k’an kisi, nin y’a waati ye an bɛɛ bolo k’an hakili jigin o la. Balannako tɛ ko Hakilijigin don waati la, an bɛ sigi n’a ye k’a ye k’an bɛna caman kɛ “kisili kibaru duman” fɔli la foro baara la!
3 Yali i bɛna kɛ tutigɛbaga farankan ye wa? Awirilikalo tɛmɛnnen na, balima 153774 kɛra tutigɛbaga farankanw ye. O hakɛ tun ma deli ka sɔrɔ fɔlɔ. Ɲinan fana, yali an bɛ se ka dɔ fara cidenyabaara kan Marisi ni Awirili kalow la kɛrɛnkɛrɛnnenya la wa? Sibiri duuru de bɛ Marisikalo la, ani Kari duuru bɛ Awirilikalo la. U kɛtɔ k’a boloda ka tile dafalen baara kɛ dɔgɔkun don labanw na, weleweledala caman minnu bɛ waati dafalen baara la, u y’a ye k’u bɛ se ka kɛ tutigɛbaga farankanw ye. Walasa ka se ka lɛrɛ 50 wajibiyalen sɔrɔ kalo la, tutigɛbaga farankan ka kan ka lɛrɛ 12 ɲɔgɔn kɛ dɔgɔkun o dɔgɔkun. Baara bolodasira minnu jiralen bɛ ɲɛ 4 na, i k’olu lajɛ koɲuman. Yali olu dɔ la kelen bɛ bɛn i ma wa? N’o si tɛ bɛn i ma, i bɛ se ka dɔ cogo yɛlɛma ka kɛɲɛ n’i ka ko ye walasa i ka kɛ tutigɛbaga farankan ye Marisi ni Awirili kalow la.
4 Maakɔrɔw ka kan ka daminɛ kabini sisan ka wajuli baara kɛli dusu don tɔw kɔnɔ walasa u ka dɔ fara o baara kan, ka tɔw bila k’o baara kɔkɔrɔdon. Salon, jɛkulu min dɔ la maakɔrɔw ni cidenyabaara maganna bɛɛ kɛra tutigɛbaga farankanw ye, o weleweledalaw 121 na, 64 kɛra tutigɛbagaw farankanw ye Awirilikalo la. Jɛkulu fana nisɔndiyara ka weleweledala batisebaliw wɔɔrɔ ye k’u ka baara dantigɛli sɛbɛn fɔlɔw di Marisi ni Awirili kalow la. Tiɲɛ na, o waati de ye waati bɛɛ la ɲuman ye denmisɛnninw ni mɔgɔ kuraw bolo ka jɛkulu maakɔrɔw ɲininka n’u bɛ cogow dafa walasa ka kɛnɛkan seereya baara daminɛ.
5 Ka dɔ fara cɛsiri kan, o de bɛ na ni dubaw ye: Jɛkulu minnu bɛ kuntilenna kɛrɛnkɛrɛnnenw sigi, ka tila ka dɔ fara cɛsiri kan, olu bɛ duba caman sɔrɔ. Jɛkulu dɔw bɛ se k’u sinsin a kan kɛrɛnkɛrɛnnenya la ka baara kɛ wajulikɛyɔrɔw la minnu tɛ baara ka caya, walima k’u kunsin seereya kɛcogo wɛrɛw ma, walima ka seereya kɛ telefɔni fɛ, n’o ye mɔgɔw lasɔrɔcogo nafama dɔ ye, mɔgɔ minnu t’u ka so, ani minnu tɛ se ka lasɔrɔ cogo wɛrɛ la.
6 Yali diyagoya don bana, walima kɔrɔya ka mɔgɔ bali k’a seko damajira kɛ wajuli baara la wa? O tɛ tuma bɛɛ ye. Misali la, an balimamuso dɔ min si ye san 86 ye, kansɛri tun b’a la, a sen tun fununnen don, nka o n’a ta o ta, a kɛra tutigɛbaga farankan ye Awirilikalo la. Telefɔni seereya y’a to a sera k’a niyɔrɔ dafalen kɛ baara la; o cogo la a ye dɔ fara a ka tanuni kan Jehowa ye. O ko ye dusu don a yɛrɛ kɔnɔ, ani jɛkulu mɔgɔw kɔnɔ.
7 I labɛn koɲuman Hakilijigin don kama: Ɲinan Hakilijigin don bɛ bɛn Awirilikalo tile 8 don ma. Ikomi o bɛ bɛn Karidon ma, o ka kan k’a to mɔgɔ camanba ka se ka na ka tɛmɛ fɔlɔ kan. A bɛ se ka kɛ ko mɔgɔ nataw hakɛ bɛna caya fo ka se hakɛ ma an ma deli ka min ye fɔlɔ n’an b’an niyɔrɔ kɛ: fɔlɔ, n’anw bɛ ye a kɛnɛ kan ani filanan, n’an bɛ mɔgɔw wele u ka na ka fara an kan Hakilijigin don na. An ka kan ka jɔn wele?
8 I k’i ka foro baara kaye lajɛ walasa ka mɔgɔw tɔgɔw ye, mɔgɔ minnu ye magojira kɛ tiɲɛ ko la, hali n’a y’a sɔrɔ i ma se ka taa bɔ u ye tuma bɛɛ. Dɔgɔkun fila, walima saba, sanni Hakilijigin don ka se, a kɛ i kuntilenna ye ka taa bɔ o mɔgɔw ye ni Hakilijigin don welesɛbɛn ye. Ni cogo b’i bolo, i k’a fɔ u ye ko n’u b’a fɛ ka na, i bɛ se k’u dɛmɛ u taaliko la.
9 Jɛkulu dɔw kɔnɔ, Hakilijigin don welesɛbɛn bɛɛ tɛ tila. Jɛkuluw sɛbɛnnikɛlaw ka kan k’u jan to a la ko welesɛbɛn bɛna se ka sɔrɔ joona walasa o bɛɛ ka se ka tila ka ban. I bɛ se ka Hakilijigin don kɛwaati n’a kɛyɔrɔ sɛbɛn ka ɲɛ bolo la walima mansin na welesɛbɛn kɔ kan. Walima kunnafonisɛbɛn min bɛ Masaya So yɔrɔ jira, i bɛ se k’o far’a kan n’a y’a sɔrɔ Hakilijigin don ko bɛ kɛ o yɔrɔ la. An ka nin to an hakili la ko tuma caman na, an de ka kan ka Hakilijigin don welesɛbɛn di mɔgɔ yɛrɛ ma.
10 An k’an hakili to walekɛbaliw la: Nisɔndiyako don ni Bibulu kalanden dɔ y’i yɛrɛbakun di Jehowa ma, k’o jira batɛmu sababu fɛ. Nka, san o san, dɔw b’an cɛla minnu b’an ka jɛɲɔgɔnya bila, ka Jehowa tɔgɔ n’a ka kɛwalew kuma fɔli dabila mɔgɔ wɛrɛw ye. O la sa, kun sɛbɛ b’an bolo ka jɔrɔ o la. Hali n’a y’a sɔrɔ walekɛbaliw fanba ma tiɲɛ bila, i b’a sɔrɔ u ye wajuli dabila k’a sababu kɛ dusutiɲɛ ye, walima u yɛrɛ ka kunkow, walima diɲɛ jɔrɔnanko wɛrɛw ye. (Mat. 13:20-22) Mɔgɔ minnu barika dɔgɔyara alako ta fan fɛ, u mago bɛ dɛmɛ na walasa ka segin ka na jɛkulu kɔnɔ sanni u ka tunun Sitanɛ ka diɲɛ kɔnɔ. (1 Piɛ. 5:8) Nin Hakilijigin don waati la, an b’a fɛ ka cɛsiri kɛrɛnkɛrɛnnen kɛ walasa walekɛbali minnu bɛɛ bɛ cogow dafa, an k’u dɛmɛ u ka se k’u sen don ko kura kibaru duman wajuli la.
11 Gafe kalan ɲɛminɛbaga minnu ka kulu kɔnɔmɔgɔ o kɔnɔmɔgɔ kɛra walekɛbali ye, jɛkulu sɛbɛnnikɛla ka kan k’o fɔ u ye. Jɛkulu ka baara kulunin de bɛna kow labɛn walasa maakɔrɔw ka taa bɔ walekɛbaliw ye. N’a nana ye ko Bibulu kalan ka kan ka kɛ dɔ kun, baara kulunin de ka kan ka mɔgɔ bɛnnen sugandi k’o kɛ. Hali n’a y’a sɔrɔ a kun tɛ kalan ka kɛ waati kuntaala jan kɔnɔ, mɔgɔ min sugandira k’o kalan kɛ, o tigi bɛ se ka waati, bɔnyew, ni Bibulu kalan jate.
12 Awirilikalo tɛmɛnnen na, an balimamuso dɔ tun bɛ ka du-ni-du baara kɛ. A ye sɔn-ni-sɔn gafeninw di kamalennin dɔ ma sira kan. A y’a fɔ a ye k’a muso ye Seere walekɛbali ye. A y’a ɲininka Masaya So yɔrɔ la, ka tila k’a ɲini a fɛ a ka na bɔ ale n’a muso ye. O kɔ kɛra min ye, o ye ko cɛ n’a muso taara lajɛ nata la, ka sɔn Bibulu kalan ma.
13 I k’i labɛn ka dɔ fara i ka baara kan! Zaburu sɛbɛnbaga min y’a fɔ k’an ka kan ka Jehowa tɔgɔ n’a ka kɛwalew jira, a ye nin fɔ ka fara a kan: “Aw ka dɔnkili da a ye, a’ ye a tanuli dɔnkili da. A’ ye a ka kabako kɛlenw lakali. A’ ye ɲagali a tɔgɔ senuma na.” (Zab. 105:2, 3) An bɛɛ kɛtɔ ka dɔ fara an ka cɛsiri kan cidenyabaara la, an b’a jira k’an bɛ hami Jehowa tɔgɔba n’a ka “kɛwale ɲumanw” na. O cogo la, ɲinan Hakilijigin don waati na kɛ Hakilijigin don waati bɛɛ la waatiba ye.
[Box on page 4]
Lɛrɛ 12 bɛ se ka boloda dɔgɔkun na cogo minnu na tutigɛbagaya farankan kama
Don Lɛrɛw
Ntɛnɛn 1 2 − −
Tarata 1 − 3 −
Araba 1 2 − 5
Alamisa 1 − 3 −
Juma 1 2 − −
Sibiri 5 4 3 5
Kari 2 2 3 2
Mumɛ: 12 12 12 12
Nin bolodasiraw la jumɛn bɛ bɛn i ma? N’a si tɛ bɛn i ma, yali i tɛ se k’i yɛrɛ ta kɛ wa?