Aw bɛna mun fɔ Budadiinɛ mɔgɔ ye?
1 Jamana dɔw la, mɔgɔw minnu bɛ batɛmu ta, olu tila fanba bɛ bɔ Budadiinɛ na. Mun de b’u sama ka na tiɲɛ fan fɛ? Aw bɛ se ka kibaru duman kofɔ Budadiinɛ mɔgɔ ye cogo di?
2 Aw k’aw mago don a la ni kɔnɔnajɛya ye: Budadiinɛ mɔgɔ kɔrɔ caman y’a fɔ ko fɛn min y’u sama ka na tiɲɛ fan fɛ, k’o tɛ hakilijakabɔ dunba nɔ ye. Nka, fɛn min y’u dusukun sɔrɔ, o ye mago ye min donna u kelen-kelen bɛɛ la ni kɔnɔnajɛya ye. Asi jamana muso dɔ min sigilen don Etazuni, o kabakoyara balimamuso dɔ ka teriya fɛ, balimamuso min tun taara bɔ a ye. O sababu la, a sɔnna kalan ma. A tun tɛ se ka Angilɛkan fɔ ka ɲɛ, nka balimamuso tun bɛ muɲu a kɔrɔ. Ni muso sɛgɛnnen don walima n’a tɛ se ka kalan kɛ, balimamuso tun bɛ taa bɔ a ye teriya sira fɛ ani ka siɲɛ wɛrɛ kalan dɔgɔ da n’a ye. A laban na, muso n’a denkɛ fila n’a woloba kɔrɔba ye batɛmu ta. A seginna a faso la ka mɔgɔ caman dɛmɛ ka tiɲɛ kalan. Sisan, a denkɛ kelen bɛ baara kɛ tɔn bolofara la. Jehowa ka ‘ɲumanya n’a ka kanuya mɔgɔw ta fan fɛ’, n’an b’o jira an ka kɛwalew la, duba caman na sɔrɔ o la dɛ!—Tite 3:4.
3 Budadiinɛ mɔgɔw ka hakilina: Tuma caman na, mɔgɔ wɛrɛw ka hakilinaw bɛ kun Budadiinɛ mɔgɔw fɛ, nka u ka jate la, wajibi tɛ mɔgɔ ka nɔrɔ dannako kɛrɛnkɛrɛnnen dɔ la. O de kosɔn u bɛɛ kelen-kelen ka dannakow ka ca. Budadiinɛ bolofara dɔ ka kalansira kumakun ye ko ɲɛnamaya falen bɛ tɔɔrɔw la, nka kunnafoni dɔw sababu la, mɔgɔ bɛ se ka dan sigi tuma bɛɛ bangeli kuraw koori la, bangeli kura minnu tɛ na ni wasa ye ɲɛnamaya kɔnɔ. A fɔlen bɛ ko walasa mɔgɔ ka hɔrɔnya ka bɔ o koori in na, o tigi ka kan ka Nirvana sɔrɔ, cogoya min tɛ se ka ɲɛfɔ bawo yɔrɔ tɛ, ko fana tɛ, nka yɔrɔ lankolon don, tɔɔrɔ ni kojugu tɛ min na. (Que devient-on quand on meurt? lajɛ, ɲɛ 9-10.) Nin bɛ mun jira an na? Nafa t’a la ka don kɔrɔfɔbaw la ni mɔgɔw ye Budadiinɛ ka hakilitigiya kalan ko la. O nɔ na, an n’u ka baro kɛ mɔgɔw bɛɛ kunkankow kan.
4 Aw k’aw sinsi bɛɛ kun kan magow kan: Budadiinɛ mɔgɔ caman bolo, dugukolo kan ɲɛnamaya kɛra tɔɔrɔ kama. O kosɔn, ɲɛnamaya banbali ko dugukolo kan, o miiriya bɛ se ka kɛ hakilintanya ye u ɲɛ na. Nka, a ka di an caman ye ka kɛ ni hɛrɛ ye an ka denbayaw kɔnɔ, tɔɔrɔw dabilali ka d’an ye, wa an b’a fɛ ka ɲɛnamaya sɔrɔ kɔrɔ bɛ min na. Aw k’a lajɛ ka bɛɛ kun kan mago ninnu ɲɔgɔnnaw sankɔrɔta.
5 Aw bɛ se ka nin dantigɛli kuma sifilɛ:
◼ “An bɛ diɲɛ min na bi, mɔgɔ jalakintan caman bɛ tɔɔrɔ. E ɲɛ na, mun bɛ se ka tɔɔrɔw ni ɲɛni ban ka bɔ bɛɛ kun na? [Aw ka jaabi makɔnɔ.] Nin ye layidu kɔrɔ ye min ye ne dusu saalo kosɛbɛ. [Aw ka Jirali 21:4 kalan.] Tiɲɛ don, o waati ma se fɔlɔ, nka a bɛna kɛ tuma min na, an b’a fɛ a ka kɛ an ɲɛ na, tiɲɛ tɛ?” O kɔfɛ, an ka gafe dɔ jira min bɛ tɔɔrɔw dabilali ɲɛfɔ.
6 Aw bɛ se k’a fɔ mɔgɔkɔrɔba dɔ ye ko:
◼ “Jɔrɛ min bɛ ne na miiriya jugu kuraw kosɔn, ani u bɛ nɔ min bila an denw na, i b’a sɔrɔ o ɲɔgɔnna b’i la. Mun na o ko suguw bɛ kakalaya caya denmisɛnw na? [Aw ka jaabi makɔnɔ.] Yali i b’a dɔn ko nin kofɔra kitabu dɔ la min sɛbɛnni daminɛna kabini tuma jan ka kɔn Silamɛya ni Krecɛnya ni Ɛndu diinɛw ɲɛ wa? [Aw ka 2 Timote 3:1-3 kalan.] I k’a jateminɛ ko nin cogoyaw bɛ sen na ka t’a fɛ, hali k’a sɔrɔ mɔgɔw ye ko caman dɔn. [Aw ka tilayɔrɔdennin 7nan kalan.] Nin sɛbɛn ye ne dɛmɛ ka tiɲɛ faamu, mɔgɔ caman tɛ min kala ma fewu. Yali i b’a fɛ k’a kalan wa?” Gafe walima gafenin min bɛnnen don, aw ka o jira.
7 Tuma caman na, Budadiinɛ mɔgɔw bɛ bonya da Bibulu kan iko kitabu senuma. O de kosɔn aw k’aw sin k’a kalan. (Heb. 4:12) Ni mɔgɔ min tɛ sɔn Bibulu la k’a masɔrɔ a ka miiri la o ye tilebin yanfan jamanaw dɔnko fɛn ye, aw k’a fɔ a ye ko Bibulu ka kitabuw bɛɛ sɛbɛnna Asikaw de fɛ.
8 Sɛbɛn jumɛnw ka fisa? Sɛbɛndennin min labɔra Budadiinɛ mɔgɔw tɔgɔ la kɛrɛnkɛrɛnnenya la, n’o ye Yali tɔɔrɔw na ban abada wa?, o bɛ sɔrɔ nin kan ninnu na: Sinuwa, Japɔnɛ, Singalɛ ni Tayi. Ka fara o kan, weleweledala caman bɛ sanga sɔrɔ ni sɛbɛn ninnu ye: Le secret du bonheur familial, L’humanité à la recherche de Dieu, ani Les jeunes s’interrogent—Réponses pratiques gafew; “Voici! Je fais toutes choses nouvelles”, ani Quel est le but de la vie?—Comment le découvrir? gafeninw; ani n’a bɛ sɔrɔ, Les nouvelles du Royaume n° 35, Les hommes apprendront-ils un jour à aimer leur prochain? Budadiinɛ mɔgɔ minnu bɛ tiɲɛ kalan sisan, u b’o daminɛ ni Wajibiya gafenin ye, ka tila ka Dɔnniya gafe tugu o la.
9 Hali n’a fɔra ko Budadiinɛ ka cidenw sera Atɛne dugu la a bɛ san 400 ɲɔgɔn bɔ sanni Pol ka wajuli kɛ yen, an jɛyalen t’a la ni Pol ye mɔgɔw sɔrɔ yen Budadiinɛ ye nɔ bila minnu na. Nka, an b’a dɔn Pol tun bɛ min miiri wajuli ko la ka ɲɛsin mɔgɔ suguw bɛɛ ma. A y’a yɛrɛ kɛ “bɛɛ ka jɔn” ye walasa cogo o cogo a ka “u dɔw kisi.” (1 Kɔr. 9:19-23) An bɛ se ka o ɲɔgɔnna kɛ n’an b’an mago don mɔgɔw bɛɛ kelen-kelen na, k’an jigi dalen to a la, k’an ni mɔgɔ fɛn o fɛn mana bɛn, an na seereya kɛ o ye.