Cogo minnu bɛ yen walisa ka dɔ fara i ka cidenyabaara kan
1 A ka ca ni san 40 ye, san 1955 Zuwɛnkalo tile fɔlɔ La Tour de Garde kɔnɔ, barokun dɔ bɔra ko: “Vous faites de votre mieux. Est-ce suffisant?” (I b’i seko kɛ, yali o bɛ wasa kɛ wa?) A tun b’a jira ni kanuya ye, Jehowa ka jamakulu mɔgɔ kelen-kelen bɛɛ bɛ se ka dɔ fara a ka cɛsiri kan cidenyabaara la cogo min na walisa ka se ka dɔ fara a ka Masaya baara kan. O laadilikan ɲuman bɛ sirataama bi fana n’an bɛ taa’ fɛ k’an ka kow ɲɛ.
2 Cikan min ka bon ni cikan bɛɛ ye, n’o ye ‘I ka Jehowa i ka Ala bato n’i dusukun bɛɛ ye, ani i ni bɛɛ, ani i hakili bɛɛ ye’, o de ka kan k’an bila k’an ka baaraw bɛɛ kɛ. (Mar. 12:30) Cogo minnu bɛɛ bɛ yen, n’an bɛ olu kɛ ka Masaya baara lataa ɲɛ, o cogo de la an b’an ka kanuya dafalen jira ka ɲɛsin Jehowa ma. I bɛ se ka dɔ fara i ka cidenyabaara kan cogo minnu fɛ, i k’olu mafilɛ. O cogow filɛ nin ye.
3 I jɔyɔrɔ fa: Balimakɛ batiselenw bɛ se k’u cɛsiri ka wajibiw dafa walisa ka kɛ cidenyabaara magannaw ye. O kɔfɛ, u ka taa ɲɛ ka baara kɛ iko maakɔrɔw. San 1990 Setanburukalo tile fɔlɔ La Tour de Garde kɔnɔ, “Aspirez-vous à une charge?” (Yali i bɛ jɔyɔrɔ dɔ nɔ fɛ wa?) ani “Êtes-vous qualifié pour servir?” (Yali i ye mankutu sɔrɔ walisa ka baara kɛ wa?) barokunw ye balimakɛ caman bila u ka ɲini ka jɔyɔrɔw fa jɛkulu kɔnɔ. I ka jɛkulu maakɔrɔw ɲininka ka hakilinata ɲumanw sɔrɔ o kow la: jɔyɔrɔw bɛ sɔrɔ cogo min na, ani wajibiw bɛ dafa cogo min na jɛkulu kɔnɔ.
4 Maakɔrɔw ni cidenyabaara maganna minnu kelen don, wele bilalen bɛ u ma ka miiri kosɛbɛ u donni na École de Formation ministérielle la. I bɛ se k’a kow dɔn n’i ye kunnafoniw kalan minnu sɛbɛnnen bɛ “École de Formation ministérielle” yɔrɔ jukɔrɔ, Index des publications de la Societé Watch Tower (1986-1990, 1991-1994 ani 1996) kɔnɔ. Yali i ɲɛ b’a la ko ‘daba bɛ yɛlɛ la i ɲɛ wa’? (1 Kɔr. 16:9a) Balimakɛ caman minnu ye cogo sɔrɔ o da in na, u tun ma deli ka miiri bonyaw bɛɛ la minnu sirilen bɛ o baara la, u ka kalan kɔfɛ. Bi, nisɔndiya b’u la ka baara kɛ Bɛtɛl la, walima foro la iko tutigɛbaga kɛrɛnkɛrɛnnenw, walima misiɔnɛriw, walima kafo lakɔlɔsibagaw.
5 Aw ka ɲini ka don cidenyabaara waati-dafalen na: Funankɛ minnu bɔra lisew la, gadonmusow, ani mɔgɔ o mɔgɔ min bolo bɔra baara la k’a da a si kan, olu ka kan ka tutigɛbagaya baara ko lajɛ kosɛbɛ. San 1998 Zuluyekalo Ministère du Royaume ka farankan lajɛ. O kɔ, kuma tutigɛbagaw fɛ minnu ka ɲɛnamaya kɔnɔkow tun bɔlen bɛ e yɛrɛ taw fɛ. O bɛ se ka kɛ sababu ye min bɛna i yɛrɛ bila ka dɔ fara i ka cidenyabaara kan, ka kɛ tutigɛbaga ye iko olu bɛ o la cogo min na. (1 Kɔr. 11:1) Mun bɛ se ka kɛ walisa ka dɔ fara i ka baara kan ka se ka lɛrɛ 70 sɔrɔ kalo la, o cogo la ka kɛ tutigɛbaga basigilen ye?
6 Balimakɛ ni balimamuso 17000 ni kɔ bɛ ka baara kɛ Tɔn bolofaraw ni Bɛtɛl sow la diɲɛ fan bɛɛ la. Kafoba ka jamalajɛw senfɛ, mɔgɔ minnu b’a fɛ ka baara kɛ o yɔrɔw la, u bɛɛ welelen bɛ k’u yɛrɛ jira. Lajɛ min kɛra o kama, mun na i tɛna kɛ o la, walisa k’a ye n’i ye mɔgɔ ye min bɛ se ka wajibiw dafa walisa ka bonya sɔrɔ, bonya min ɲɔgɔn tɛ, ka baara kɛ Bɛtɛl la?
7 Magoba bɛ yɔrɔ min na, baara kɛ yen: Yali i sigilen bɛ danyɔrɔ la min bɛ baara tuma caman na wa? Walima balimakɛw ka ca yen minnu bɛ jɔyɔrɔw tila u ni ɲɔgɔn cɛ wa? Yali i y’a miiri ka taa i sigi magoba bɛ yɔrɔ min na walisa ka dɔ fara i ka cidenyabaara kan wa? A dɔ rɔ, i taayɔrɔ bɛ se ka kɛ wula kɔnɔna yɔrɔ surun dɔ ye, min mago bɛ baarakɛla caman na. (Mat. 9:37, 38) Nka, o man kan ka kɛ k’a sɔrɔ i ma miiri kosɛbɛ fɔlɔ. O ka kan ka lajɛ delili kɔnɔ. (Luka 14:28-30) I k’i ka cogo ɲɛfɔ maakɔrɔw ni kafo lakɔlɔsibaga ye. U bɛna i dɛmɛ i k’i hakili jakabɔ walisa i k’a dɔn ni hakilitigiyako don i ka taa i sigi yɔrɔ wɛrɛ la sisan, walima n’i ka kan k’i labɛn k’o kɛ waati nata la. I bɛ se ka taa i sigi yɔrɔ min na, n’i b’a fɛ ka hakilina sɔrɔ o ko la, i ka bataki ci Tɔn ma. Nka, i ka jɛkulu ka Baara Kulunin ka kan k’a bolo nɔ bila a yɛrɛ ka bataki kan walisa o ni e yɛrɛ ta ka ci ɲɔgɔn fɛ.
8 I ka dɔ fara i ka baara ɲɛli kan: A ka c’a la, an bɛɛ bɛ se k’an niyɔrɔ dafalen kɛ kosɛbɛ tun cidenyabaara la n’an b’an ka foro baara cogo ɲɛ ka taa’ fɛ. Yali an sen bɛ baara kɔnɔkow bɛɛ la, i n’a fɔ du-ni-du baara, senfɛ seereya, segin-ka-bɔnyew ani Bibulu kalan baara la wa? N’i bɛ Bibulu kalan kɛ mɔgɔ dɔ kun, yali i bɛ se ka dɔ fara i seko kan kalan kɛcogo ta fan fɛ wa? A ka ɲi i ka san 1996 Zuwɛnkalo Ministère du Royaume ka farankan lajɛ ka hakilinaw sɔrɔ. Baara kɛ n’olu ye walisa i bɛ Bibulu kalan kɛ mɔgɔ minnu kun, o k’olu bila k’u yɛrɛ latɛmɛ Ala ma ani ka batɛmu ta.
9 Cogo minnu bɛ yen walisa ka dɔ fara an ka cidenyabaara kan, o baro ɲɛfɔra k’a pereperelatigɛ Organisés pour bien remplir notre ministère gafe masalakun 9nan na. A jɛlen don k’an kelen-kelen bɛɛ ŋaniya ka kan ka kɛ k’an seko damajira kɛ Ala ka baara la. Mun na i tɛna miiri kosɛbɛ i kuntilennaw la hakili ta fan fɛ? A kɛ iko Timote ka bataki fɔlɔ b’a gɛlɛya an ma cogo min na, a sigida 4 na, a tilayɔrɔ 15 la, ko: “I jija o kow la ka i sɛbɛ don u la, walisa mɔgɔw bɛɛ k’a ye ko i bɛ taa ɲɛ.”