U bɛ se k’a ye k’an danfaralen don ka bɔ tɔw la

¹ Salon, mɔgɔ kura minnu ka ca ni 300000 ye, olu de fara la an kan u kɛlen ka batɛmu ta. O mɔgɔ ninnu ye mun de ye Jehowa Seerew la n’o y’a to u y’a kanu ka kɛ Ala ka jamakulu kolabɛnnen mɔgɔ dɔw ye? Mun b’an danfara ka bɔ diinɛmɔgɔ tɔw bɛɛ la? A jaabi jɛlen dɔw filɛ nin ye:

—An bɛ nɔrɔ Bibulu la sanni an ka nɔrɔ mɔgɔ hakililataw la: An bɛ Jehowa bato “hakili la ani tiɲɛ la,” iko Yesu y’a fɔ an ka kɛ cogo min na. O kɔrɔ ye ko an b’an ban diinɛ ka nkalonw ma, nka ko an bɛ Ala ka Kuma sɛbɛnnen labato.—Yuh. 4:23, 24, NW; 2 Tim. 3:15-17.

—An bɛ taa mɔgɔw ma sanni an ka kɔnɔ u ka na an ma: An sɔnna Yesu ka cikan ma ka waajuli kɛ, ka kalan kɛ mɔgɔw kun ani k’a ka misali ladege n’o ye ka mɔgɔ dusukun jɛlenw ɲini. An bɛ taa u ɲini u bara, nbɛdaw la, walima u bɛ se ka sɔrɔ yɔrɔ o yɔrɔ la.—Mat. 9:35; 10:11; 28:19, 20; Kɛw. 10:42.

—An bɛ Bibulu kalan kɛ mɔgɔ kelen-kelen bɛɛ kun k’a sɔrɔ wari ma bɔ: An yɛrɛma, an b’an ka nafolow an’an fanga ta ka lɛri miliyari caman kɛ Ala ka baara la san o san. K’a sɔrɔ an ma ɲɛnawolomani kɛ, an bɛ Bibulu kalan kɛ mɔgɔ sugu bɛɛ kun.—Mat. 10:8; Kɛw. 10:34, 35; Jir. 22:17.

—An degera koɲuman walisa ka mɔgɔw dɛmɛ hakili ta fan fɛ: An yɛrɛ ka Bibulu kalan fɛ, ani kalan min bɛ kɛ an kun lajɛw la, kafo ka jamalajɛw ani kafoba ka jamalajɛw la, olu sababu fɛ, an bɛ ala-ka-marako ɲɛtaa kalan sɔrɔ min sigira sen kan, n’a sɔngɔ tɛ se ka fɔ wa n’a b’a to an bɛ se ka yeelen bɔ mɔgɔ wɛrɛw ye hakili ta fan fɛ.—Esa. 54:13; 2 Tim. 2:15; 1 Piɛ. 3:15.

—An bɛ Tiɲɛ minɛ ni sɛbɛ ye, k’a sirataama an ka ɲɛnamaya kɔnɔ don o don: K’a da an ka Ala kanuya kan, an bɛ yɛlɛmaliw kɛ, k’an ka hadamadenya kɛcogo bɛn a sago ma. Iko Krista, an ka mɔgɔya kura bɛ mɔgɔ tɔw sama ka na tiɲɛ na.—Kol. 3:9, 10; Yak. 1:22, 25; 1 Yuh. 5:3.

—An b’an jija k’an ka hadamadenya kɛ hɛrɛ la ani ka baara kɛ ni tɔw ye bɛn kɔnɔ: Ka ala ɲɛsiranya jogo sɛnɛ an na, o b’an dɛmɛ k’an ka walew n’an ka kumacogo kɔlɔsi. “An ka hɛrɛ ɲini ka tugu a nɔfɛ” ni mɔgɔ bɛɛ ye.—1 Piɛ. 3:10, 11; Efe. 4:1-3.

² Mɔgɔw bɛ Krecɛn ka hadamadenya kɛcogo misaliw ye Jehowa ka jamakulu kolabɛnnen kɔnɔ. O kɛra sababu ye ka caman bila ka sɔn tiɲɛ la. An yɛrɛw ka misali ka se k’o nɔ sugu fana bila mɔgɔw la, mɔgɔ minnu b’a dɔn ani minnu bɛ k’an kɔlɔsi.