Bɛɛ ka kan ‘ka sɔn Kuma ma n’u dusukun bɛɛ ye’!
1 Mɔgɔ miliyɔn caman bɛ Bibulu kalan ni Jehowa Seerew ye. Walisa u ka mankutu sɔrɔ ɲɛnamaya banbali kama, u ka kan ka ‘sɔn kuma ma n’u dusukun bɛɛ ye,’ i n’a fɔ mɔgɔ 3000 ninnu y’a kɛ cogo min na, u kɛlen ka nimisa u ka jurumuw na ka batɛmu ta Pantekɔte don, san 33nan kristatile la. (Kɛw. 2:41, NW) O bɛ sangatigiya jumɛn bila an kan bi?
2 An mago b’a la k’an ka Bibulu kalandenw dɛmɛ ka kɛ mɔgɔw ye minnu bɛ nɔrɔ Jehowa la. (1 Tim. 4:7-10) O kama, san 1996 Zuwɛnkalo ka An ka Masaya Cidenyabaara farankan sɛbɛn kɔnɔ, a dakun 20nan na, nin hakilina jiralen bɛ ko: “Kalan kɔnɔna na, i ka cogow ɲini k’u ka waleɲumandɔn sinsi ka ɲɛsin Jehowa ka mankutuw ma. I yɛrɛ dusukunnata ka bon cogo min na ka ɲɛsin Jehowa ma, o fɔ a ye. Kalanden dɛmɛ a ka miiri ka teriyasira don ale yɛrɛ ni Jehowa cɛ.”
3 Gɛlɛya min ka kan ka kɛlɛ: Ikomi mɔgɔw fanba minɛlen bɛ diinɛ nkalonmanw fɛ, u bɛ wasa sɔrɔ diinɛ sira dɔ la, waati caman ani cɛsiribaw tɛ min na, wa n’a tɛ yɛlɛma jɔnjɔn fana wajibiya u ka hadamadenya taabolo la. (2 Tim. 3:5) Bibulu kalandenw ko la, gɛlɛya min b’an ɲɛ, o ye k’u dɛmɛ k’a faamu ko bato lakika bɛ fɛn wajibiya min bɛ tɛmɛ Ala ka kuma lamɛnni dɔrɔn kan. U bɛ min kalan, u ka kan k’o sirataama u balocogo la. (Yak. 1:22-25) Ni fɛn dɔ bɛ u jogo la, n’a tɛ bɛn Ala ma, u ka kan ka sɔn a ma k’u ka kan ka “segin” kɔ, ka fɛn tilennen kɛ min bɛ diya a ye. (Kɛw. 3:19) Walisa ka ɲɛnamaya banbali sɔrɔ, u ka kan k’u “gɛlɛya” k’u banbannen to tiɲɛ kɔnɔ.—Lu. 13:24, 25.
4 Tuma min na aw bɛ baro kɛ kɛcogo ɲuman ni kɛcogo juguman kan, i ka Bibulu kalanden ɲininka ale hakilinata ye mun ye o ko ninnu la. N’a ɲɛ b’a la k’a ka kan k’a balocogo yɛlɛma, i bɛ se fana k’a ɲininka a bɛna mun kɛ. A ɲɛsin jamakulu ma, o min sababu fɛ a bɛ ka tiɲɛ kalan. A dusu lamin a ka kɛ jɛkulu lajɛw la tuma bɛɛ.—Heb. 10:25.
5 An k’an kuntilenna kɛ ka kalanden dusukun sɔrɔ. Ka mɔgɔ dɔ bila a ka sɔn Ala ka kuma ma n’a dusukun bɛɛ ye ani ka sɔn ka batɛmu ta, o bɛna an nisɔndiya dɛ!—1Tes. 2:13.