Yesu bɛ a ka kalandenw kalan delili kɛcogo la

Fariziɲɛw tun be koo minw bɛɛ kɛ, u tun b’o kɛ k’u yɛrɛ yira le. N’u ye koo ɲuman kɛ, u b’a fɛ mɔgɔw k’o lɔn. U tun be delili kɛ jamayɔrɔw la walisa bɛɛ k’u ye. Fariziɲɛw tun be delilijanw degi ani u tun b’u fɔ u kunfɛ Alabatosow kɔnɔ ani sira dakunw na walisa mɔgɔw k’u kaan mɛn. O kama, mɔgɔw kabakoyara tuma min na Yezu y’a fɔ u ye ko: ‘Aw kana delili kɛ i n’a fɔ Fariziɲɛw. U b’a miiri k’u ka kuma caaman lo bena a to Ala b’u jaabi, nka o tɛ. N’i be delili kɛ, o be e ni Jehova lo cɛ. Kana to ka segi kuma kelen kan siɲɛ caaman. Jehova b’a fɛ i k’i kɔnɔkow lo fɔ ale ye.’

‘Aw ka ɲi ka delili kɛ ko: “An Faa min be sankolo la, i tɔgɔ ka boɲa. I ka masaya ka na. I sago ka kɛ dugukolo kan i ko a be kɛ sankolo la cogo min na.” ’ Yezu y’a fɔ mɔgɔw ye fana k’u ka ɲi ka delili kɛ k’u ka daradumuni sɔrɔ tile kɔnɔ, k’u ka jurumu yafa deli ani u ka makoɲɛfɛn wɛrɛw.

Yezu y’a fɔ ko: ‘Aw kana aw fari faga delili koo la. A’ ye to ka fɛɛn ɲumanw deli aw Faa Jehova fɛ. Bangebagaw bɛɛ b’a fɛ ka fɛɛn ɲumanw di u deenw ma. N’i deen ye buru deli i fɛ, i bena kabakuru di a ma wa? N’a y’i deli jɛgɛ la, i bena saa di a ma wa?’

O kɔ, Yezu y’a ka kuma kɔrɔ ɲɛfɔ ko: ‘Ni aw be se ka fɛɛn ɲuman di aw deenw ma, siga t’a la, aw Faa Jehova bena hakili senu di aw ma. Aw ka kan ka min kɛ, o ye k’a deli le.’ Yala i be Yezu ka ladili nin sira tagama wa? I be delili kɛ fɛɛn jumanw lo koo la?