Jehova ye Yesu lakana

Israɛl kɔrɔn fan fɛ, siya dɔ tun be yen min lanin b’a la ko lolow be se k’u ɲɛminɛ. Loon dɔ sufɛ, o yɔrɔ cɛɛ dɔw ye fɛɛn dɔ ye sankolo la min be manamanana ka taga i ko lolo. U tugura a kɔ. O “lolo” y’u ɲɛminɛ ka taga n’u ye Zeruzalɛmu. O cɛɛw y’a daminɛ ka mɔgɔw ɲininga ko: ‘Deen min bena kɛ Yahutuw ka masacɛ ye, a be min? An nana walisa k’ale lo bonya.’

Zeruzalɛmu masacɛ Erɔdi ye masacɛ kura dɔ koo mɛn dɔrɔn, a hakili ɲagamina. A ye sarakalasebagaw kuntigiw ɲininga ko: ‘O masacɛ tɔgɔla ka ɲi ka wolo min?’ U y’a jaabi ko: ‘Kiraw tun y’a fɔ ko a bena wolo Bɛtilehɛmu.’ Cɛɛ minw bɔra kɔrɔn fan fɛ, Erɔdi y’olu weele k’a fɔ u ye ko: ‘Aw ye taga Bɛtilehɛmu k’o deen yɔrɔ ɲini. O kɔ, a’ ye segi ka na a yɔrɔ yira n’ na. N’ fana b’a fɛ ka taga a bonya.’ Nka ngalon tun lo.

“Lolo” y’a daminɛ tugun ka taga. O cɛɛw tugura a kɔ fɔɔ Bɛtilehɛmu. “Lolo” tagara lɔ boon dɔ kun na, o cɛɛw donna a kɔnɔ. U ye Yezu n’a bamuso Mariyamu sɔrɔ yen. U y’u kunbiri gwan duguma deen ɲɛɛ kɔrɔ ani u ye bonyafɛnw di a ma: sanu ni wusulan ani tulu kasadiman. Yala Jehova lo tun y’o cɛɛw ci tiɲɛn na ka taga Yezu yɔrɔ ɲini wa? Ayi.

O loon sufɛ, Jehova y’a fɔ Yusufu ye siko la ko: ‘Erɔdi b’a fɛ ka Yezu faga. I muso n’i dencɛ minɛ ka boli ka taga Ezipiti. To yen fɔɔ tuma min na n’ bena a fɔ i ye ko i be se ka kɔsegi.’ Yusufu n’a ka denbaya sinna ka taga Ezipiti.

Cɛɛ minw bɔra kɔrɔn fan fɛ, Jehova y’a fɔ u ye k’u kana kɔsegi Erɔdi fɛ. Tuma min na Erɔdi y’a faamu k’u tɛna segi ka na, a dimina. Komi a tun tɛ se ka Yezu yɔrɔ lɔn, a ko cɛdennin minw bɛɛ ye Yezu filankuruw ye Bɛtilehɛmu, u bɛɛ ka faga. Nka Yezu latanganin tun lo yɔrɔjan, Ezipiti jamana na.

Erɔdi nana sa. Jehova y’a fɔ Yusufu ye ko: ‘Aw be se ka kɔsegi sisan.’ Yusufu, Mariyamu ani Yezu kɔsegira Israɛl jamana na ka taga sigi Nazarɛti dugu la.