U man sɔn ka biri

Masacɛ Nebukadnezar tun sikora jaa dɔ koo la. Wagati damanin o kɔ, a ye jaa jamanjanba dɔ dilan ni sanu ye. A y’o jaa lɔ Dura kɔkɛnɛ na ani a y’a ɲini jamana ɲɛmɔgɔw fɛ u ka lajɛn o jaa ɲɛfɛ. Sadiraki, Mesaki ani Abɛdenego tun b’u cɛma. Masacɛ ko: ‘ N’aw ye filejan, ngɔni ani filesurun kaan mɛn dɔrɔn, a’ ye biri jaa kɔrɔ! Mɔgɔ min tɛna biri, o tigi bena fili tasumaba kɔnɔ.’ Yala Heburu mɔgɔ saba nunu bena biri k’o jaa bato wa, wala u bena Jehova kelenpe lo bato?

O tuma na, masacɛ ko u ka fɔlifɛnw fɔ. Bɛɛ birila ka jaa bato, fɔɔ Sadiraki, Mesaki ni Abɛdenego dɔrɔn. Mɔgɔ dɔw y’o ye ani u y’a fɔ masacɛ ye ko: ‘Heburu mɔgɔ saba nunu banna k’i ka jaa bato.’ Nebukadnezar ye cii bila k’a fɔ u ye ko: ‘Ne bena sababu wɛrɛ di aw ma ka jaa nin bato. N’aw banna, n’ bena aw fili tasumaba kɔnɔ. Ala si tɛ yen min bena se k’aw kisi ne bolo.’ U y’a jaabi ko: ‘An mako tɛ o sababu wɛrɛ la. An ka Ala be se k’an kisi. Nka hali n’a m’o kɛ, masacɛ, an tɛna o jaa bato.’

Nebukadnezar dimina kosɔbɛ. A y’a fɔ a ka cɛɛw ye ko: ‘Aw ye tasuma bonya fɔɔ siɲɛ wolonfila ka tɛmɛ fɔlɔ kan!’ O kɔ, a y’a fɔ a ka sɔrɔdasiw ye ko: ‘Aw ye cɛɛ nunu siri k’u fili tasuma kɔnɔ!’ Tasuma tun gwannin lo kojugu fɔɔ sɔrɔdasiw gwɛrɛla a la tuma min na, a y’u jɛni k’u faga yɔrɔnin kelen. Heburu mɔgɔ saba nunu benna tasuma kɔnɔ. Nka tuma min na Nebukadnezar ye filɛli kɛ a kɔnɔ, sanni a ka mɔgɔ saba ye, a ye mɔgɔ naani lo ye u be yaalayaalara tasuma kɔnɔ. A siranna ani a y’a ka faamanw ɲininga ko: ‘An ma cɛɛ saba lo fili tasuma kɔnɔ wa? Ne be cɛɛ naani lo yera ani kelen bɔnin be mɛlɛkɛ ma!’

Nebukadnezar gwɛrɛla ani a y’a fɔ fanga la ko: ‘Aw ye bɔ yan, Ala Kɔrɔtaninba ka baarakɛlaw!’ Bɛɛ kabakoyara ka Sadiraki, Mesaki ni Abɛdenego bɔtɔ ye tasuma kɔnɔ, foyi ma u sɔrɔ. U farigolo, u kunsigi ani u ka faniw ma jɛni ani tasuma kasa tɛ u kan.

Nebukadnezar ko: ‘Sadiraki, Mesaki ni Abɛdenego ka Ala ka bon. A y’a ka mɛlɛkɛ ci ka na u kisi. U ka Ala ɲɔgɔn tɛ yen.’

Koo o koo mana i sɔrɔ, yala i cɛsirinin lo ka kantigiya kɛ Jehova ye i n’a fɔ Heburu mɔgɔ saba nunu wa?