Jehojada ye jagɛlɛya jira

Denmuso dɔ tun be Zezabɛli fɛ min tɔgɔ ko Atali. Atali tun ka jugu i n’a fɔ a bamuso. A tun furula Zuda masacɛ ma. A cɛɛ sanin kɔ, a dencɛ y’a daminɛ ka kuntigiya kɛ. Nka a dencɛ sanin kɔ, Atali yɛrɛ wulila ka sigi masaya la. O kɔ, a y’a ɲini ka masacɛ ka bɔnsɔn tunu: mɔgɔ o mɔgɔ tun ka ɲi ka kɛ masa ye, a y’u bɛɛ faga, hali a yɛrɛ mamadenw. Bɛɛ tun be siran a ɲɛ.

Sarakalasebagaw kuntigi Yoyada n’a muso Yoseba tun b’a lɔn ko Atali be min kɛra, o ye kojuguba ye. U y’u niinw bila farati la: u ye Atali mamaden kelen dogo. Denɲɛnin dɔ tun lo min tɔgɔ ko Zowasi. U y’a lamɔ Alabatosoba kɔnɔ.

Zowasi saan wolonfilanan na, Yoyada ye kuntigiw ni Levitew lajɛn k’a fɔ u ye ko: ‘Aw ye Alabatosoba daa kɔlɔsi mɔgɔ si kana don.’ O kɔ, Yoyada ye Zowasi kɛ masa ye Zuda kun na ani a ye masafugulan biri a kuun na. Zuda mɔgɔw kulera ko: ‘Masacɛ ka sii sɔrɔ!’

Masamuso Atali ye jama kaan mɛn minkɛ, a teliyara ka taga Alabatosoba kɔnɔ. A ye masacɛ kura ye minkɛ, a kulera ko: “Janfa lo! Janfa lo!” Kuntigiw y’o masamuso jugu minɛ ka taga n’a ye yɔrɔjan ani k’a faga. Nka a ye nɔɔ jugu min to jamana mɔgɔw kan, o koo bena kɛ di?

Yoyada ye jamana mɔgɔw dɛmɛ ka layidu ta Jehova ye: u y’u daa di k’u bena Jehova kelenpe lo bato. Yoyada y’a to u ye Baali batoso ci ani ka boliw halaki. A ye sarakalasebagaw ni Levitew sigi u ka baara la Alabatosoba kɔnɔ walisa jama ka se ka Ala bato o yɔrɔ la tugun. A ye dakɔlɔsibagaw bɔ ka Alabatosoba daa kɔlɔsi walisa mɔgɔ minw saniyanin tɛ, u si kana don. O kɔ, Yoyada ni kuntigiw tagara ni Zowasi ye masaso la k’a sigi masasigilan kan. Zuda mɔgɔw ninsɔndiyara. Sisan, komi u hɔɔrɔnyara ka bɔ muso jugu Atali bolo ani Baali batoli la, u be se ka Jehova bato. I y’a kɔrɔsi cogo min na Yoyada ka jagwɛlɛya ye mɔgɔ caaman dɛmɛ wa?