Kɔrɔbɔli min kɛra Karmɛl kulu kan

Israɛl siya tan ka masacɛ caaman tun ka jugu. Nka, Akabu tun ka jugu haali. A ye muso jugu dɔ furu min tun be Baali bato. A tɔgɔ ko Zezabɛli. Akabu ni Zezabɛli y’a kɛ jamana fara Baali batoli la ani u ye Jehova ka kiraw faga. Jehova ye mun lo kɛ do? A ye kira Eliya bila ka taga cii dɔ lase Akabu ma.

Eliya y’a fɔ masacɛ Akabu ye ko sanji tɛna ben Israɛl jamana na a ka juguya kosɔn. Saan saba ni kɔ kɔnɔ, sɛnɛfɛnw ma ɲɛ. Kɔngɔ ye mɔgɔw minɛ. Kɔfɛ, Jehova tilara ka Eliya ci Akabu fɛ. Akabu ko: ‘Ele kunko ɲinila nin! Nin bɛɛ ye e nɔɔ lo ye.’ Eliya y’a jaabi ko: ‘Jaa nin tɛ ne nɔɔ ye. Ele nɔɔ lo sabu i be Baali lo bato. An bena koo dɔ kɛ k’a yira min ye tiɲɛn Ala ye. Baali ka kiraw ni jama lajɛn Karimɛli kulu kan.’

Jama ye ɲɔgɔn lajɛn kulu kan. Eliya ko: ‘ A’ ye miiri ka ɲɛ. Ni Jehova lo ye tiɲɛn Ala ye, a’ ye tugu a kɔ. Nka ni Baali lo, a’ ye tugu a kɔ. Ne b’aw kɔrɔbɔ: Baali ka kira 450 nunu ka saraka labɛn ani k’u ka ala weele. Ne fana bena saraka labɛn ani ka Jehova weele. Ala min bena a ka mɔgɔw jaabi tasuma sababu fɛ, o tigi lo ye tiɲɛn Ala ye.’ Jama sɔnna.

Baali ka kiraw ye saraka labɛn. U y’u ka ala weele tile kuru bɛɛ la ko: ‘Baali, an jaabi!’ Baali t’u jaabira minkɛ, Eliya yɛlɛla a ma. A ko: ‘ A’ y’a weele n’aw fanga bɛɛ ye. N’a sɔrɔ a be sinɔgɔra, u ka kan k’a kunu.’ Baali ka kiraw tora k’a weele fɔɔ wulafɛ. Nka a m’u jaabi halibi.

Eliya y’a ka saraka bila sarakabɔlan dɔ kan ani ka jii bɔn a faan bɛɛ la. O kɔ, a ye Jehova deli ko: ‘Jehova, sabari k’a to jama nin k’a lɔn ko ele lo ye tiɲɛn Ala ye.’ Yɔrɔnin kelen, Jehova y’a kɛ tasuma jigira ka saraka jɛni. Jama kulera ko: ‘Jehova lo ye tiɲɛn Ala ye!’ Eliya ko: ‘Aw kan’a to Baali ka kiraw ka boli!’ U ye Baali ka kira 450 nunu faga o loon na.

Sankaba dennin dɔ wulila kɔgɔji kun na minkɛ, Eliya y’a fɔ Akabu ye ko: ‘Saan be labɛnna. I ka wotoro labɛn ka boli ka taga soo.’ Saan finna ka yɔrɔ bɛɛ ta, sanfɔɲɔ wulila, sanjiba dɔ daminɛna ka ben. A laban, jaa banna. Akabu y’a ka wotoro boli n’a fanga bɛɛ ye. Jehova barika la, Eliya bolila tiɲɛn tiɲɛn na ka tɛmɛ wotoro kan! Nka, yala Eliya ka kunkow bɛɛ tun banna ten wa? An k’o lajɛ.