Musa y’a latigɛ ka Jehova bato

Ezipiti jamana na, Yakuba ka denbayamɔgɔw nana weele ko Israɛldenw. Yakuba ni Yusufu sanin kɔ, Farahuna wɛrɛ y’a daminɛ ka kuntigiya kɛ. A siranna sabu Israɛldenw fanga tun be bonyana ka tɛmɛ Ezipitikaw ta kan. O kama, a ye Israɛldenw kɛ jɔɔnw ye. A y’u waajibiya ka birikiw bɔ ani ka baara gwɛlɛw kɛ forow la. Ezipitikaw tora ka Israɛldenw waajibiya u ka baara gwɛlɛ kɛ. Nka, Israɛldenw tun be cayara ka taga dɔrɔn. Komi o ma diya Farahuna ye, a ye cii di k’u ka Israɛl denɲɛnin cɛmanw bɛɛ faga. Miiri k’a filɛ o koo ye Israɛldenw jaa tigɛ cogo min na!

Eburumuso dɔ ye dencɛ cɛɲumanin dɔ wolo. O muso tɔgɔ ko Yokɛbɛdi. Walisa k’o deen dogo, a y’a la segi kɔnɔ ani a y’a bila Nili baji kan biinw cɛma. Deen kɔrɔmuso Miriyama lɔra yɔrɔ surun na k’a filɛ min bena kɛ.

Farahuna denmuso nana jii ko baa daa la. A ɲɛɛ lara segi kan. A ye denɲɛnin kasitɔ ye a kɔnɔ, a hinɛ y’a minɛ. Miriyama ko: ‘I b’a fɛ ne ka taga muso dɔ yaala min bena siin di deen nin ma wa?’ Farahuna denmuso ko ɔnhɔn ani Miriyama tagara a yɛrɛ bamuso Yokɛbɛdi weele. Farahuna denmuso y’a fɔ a ye ko: ‘Deen nin ta ka siin di a ma. Ne bena i sara.’

Deen kɔrɔbayara tuma min na, Yokɛbɛdi tagara a di Farahuna denmuso ma. Farahuna denmuso y’a tɔgɔ la ko Musa ani a y’a balo i ko a yɛrɛ dencɛ. Musa kɔrɔbayara masadenya la. Fɛɛn min bɛɛ tun ka di a ye, a tun be se k’o sɔrɔ. Nka Musa ma ɲinɛ Jehova kɔ fewu. A tun b’a lɔn ko a ye Israɛlden ye, ko a tun tɛ Ezipitika ye. A y’a latigɛ ka Jehova bato.

A saan 40nan na, Musa y’a latigɛ k’a ka mɔgɔw dɛmɛ. A ye Ezipitika dɔ ye a be Israɛlden jɔncɛ dɔ bugɔra. Musa y’a bugɔ k’a faga ani k’a suu datugu cɛncɛn kɔnɔ. Farahuna bɔra o kalama tuma min na, a y’a ɲini ka Musa faga. Nka Musa bolila ka taga Madiyan jamana na. Jehova y’a ladon o yɔrɔ la.