Yakuba de ye ciyɛn ta

Isiyaka saan 40nan na, a ye Erebɛka furu. A koo tun ka di Isiyaka ye kosɔbɛ. Kɔfɛ, u nana deen fila sɔrɔ: filaninw tun lo.

Kɔrɔbanin tɔgɔ ko Ezawu ani dɔgɔnin tɔgɔ ko Yakuba. Ezawu tun man teli ka sigi soo. Donsocɛ ŋana tun lo. Nka a tun ka di Yakuba ye ka to soo.

O wagati la, ni faa sara, a ka dugukolo n’a ka wari fanba tun be di dencɛ fɔlɔ lo ma. O lo be weele ko cɛɛn. Ala tun ye layidu minw ta Ibrayima ye, olu fana tun ye cɛɛn ye Isiyaka ka denbaya fɛ. Ezawu tun t’o layiduw ta sɔbɛ la. Nka, Yakuba kɔni tun b’a lɔn ko fɛɛn sɔbɛw lo.

Loon dɔ, Ezawu sɛgɛnninba bɔra a ka donsoya la ka na soo. Yakuba tun be dumuni diiman dɔ tobira. Ezawu y’o kasa mɛn ani a ko: ‘Kɔngo bena n’ faga! I tɛ n’ sɔn dumuni wulenman nin na wa?’ Yakuba ko: ‘Ɔnhɔn, nka kali ne ye fɔlɔ ko ne lo bena cɛɛn ta i nɔɔ na.’ Ezawu ko: ‘Cɛɛn tɛ foyi ye ne ɲɛɛ na. I be se k’a ta. Ne be dumuni nin dɔrɔn le fɛ.’ E ka miiri la, nin tun ye hakilitigiyako ye Ezawu fɛ wa? Ɔn ɔn dɛ! Ezawu banna fɛɛn nafamanba dɔ lo la dumuni tasa kelen dɔrɔn kosɔn.

Isiyaka nana kɔrɔ haali. Wagati tun sera a ka duga kɛ a dencɛ fɔlɔ Ezawu ye. Nka Erebɛka ye Ezawu dɔgɔcɛ Yakuba dɛmɛ k’o duga sɔrɔ. Ezawu bɔra o kala ma tuma min na, a dimina kosɔbɛ ani a y’a ɲini k’a filaninɲɔgɔn faga. Komi Isiyaka ni Erebɛka tun b’a fɛ ka Yakuba latanga, u y’a fɔ a ye ko: ‘Taga to i bamuso kɔrɔcɛ Laban fɛ sanni Ezawu dusu ka suma.’ Yakuba y’a wolobagaw ka ladili lamɛn ani a bolila walisa k’a niin kisi.