Jeremi m’a dabila ka kuma Jehova ko la

Tuma dɔw la mɔgɔw bɛ u ɲagaribɔ an na walima u bɛ dimi an kɔrɔ ni an bɛ Jehova ko fo u ye. O bɛ se ka kɛ sababu ye, an b’a ɲini k’a dabila ka kuma Ala ko la. Yala e delila ka miiri o cogo la wa?​​— Bibulu bɛ kamalennin dɔ ko fɔ an ye, a tun bɛ Jehova kanu, nka a tun bɛ ɲini k’a dabila ka kuma Jehova ko la. A tɔgɔ tun ye Jeremi. An k’a ɲini ka Jeremi dɔn ka ɲɛ.

Tuma min na Jeremi tun ye kamalennin ye, Jehova y’a fɔ a ye k’a ka taa fɔ mɔgɔw ye ko u ka kojugu kɛli dabila. O kɛli tun ka gɛlɛn kosɛbɛ Jeremi bolo, ani a tun bɛ ka siran. A y’a fɔ Jehova ye ko: ‘Ne tɛ se kuma la. Ne ye denmisɛn ye.’ Nka Jehova y’a fɔ a ye ko: ‘Kana siran. Ne bɛna i dɛmɛ.’

O la Jeremi y’a daminɛ ka mɔgɔw lasɔmi ko u bɛna ɲangi ni u ma yɛlɛma. E hakili la Jeremi ye min fɔ, mɔgɔw ye o kɛ wa?⁠— Ayi. U ye u ɲagari bɔ a la ani ka dimi kosɛbɛ a kɔrɔ. Hali dɔw tun b’a fɛ ka a faga! E hakili la Jeremi tun bɛ cogo di?⁠— A tun siran na ani a y’a fɔ ko: ‘Ne tɛna kuma Jehova ko la bilen’. Nka yala a ye o kɛ tiɲɛ na wa?⁠— Ayi. A ma o kɛ. A tun ye Jehova kanu kosɛbɛ, fo a tun tɛ se k’a dabila ka kuma a ko la. Ikomi Jeremi m’a dabila ka kuma Jehova ko la, Jehova y’a kisi.

Misali la, cɛ kojugukɛla dɔw ye Jeremi fili dingɛ dunnenba dɔ kɔnɔ bɔgɔ tun bɛ min kɔnɔ. Dumuni ni ji tun tɛ a bolo. O cɛw tun b’a fɛ ka Jeremi to yen a ka sa. Nka ni Jehova ka dɛmɛ ye, a sera ka bɔ!

I bɛ se ka kalansira jumɛn sɔrɔ Jeremi ka misaliya la?​​— Hali k’a sɔrɔ a tun sirannen don tuma dɔw la, a m’a dabila ka kuma Jehova ko la. Ni i bɛ kuma Jehova ko la, mɔgɔw bɛna u ɲagari bɔ i la ani ka dimi i kɔrɔ. I bɛ se ka degun walima yɛrɛ ka siran. Nka i kana a dabila abada ka kuma Jehova ko la. A bɛna i dɛmɛ waati bɛɛ i n’a fɔ a ye Jeremi dɛmɛ cogoya min na.