I ka hakilina ye mun ye Bibulu kan?
I bɛ se k’a fɔ . . .
hadamadenw hakilina don.
Bibulu kɔnɔ kumaw yɛlɛma na.
Ala ka kuma don.
BIBULU BƐ NIN DE FƆ
“Kitabu kuma bɛɛ kɛra a sɛbɛnnikɛlaw kɔnɔ Ala dafiɲɛ fɛ.”—2 Timote 3:16, Bible Senuma, 1996.
O KƆRƆ BƐ SE KA KƐ MIN YE E BOLO
An bɛ ɲininkali gɛlɛn minnu kɛ ɲɛnamaya kan, a bɛ olu jaabi jɔnjɔnw di.—Ntalenw 2:1-5.
A bɛ an ɲɛminɛ koɲuman, an ka don o don ɲɛnamaya kɔnɔ.—Zaburu 119:105.
A bɛ jigiya jɔnjɔn di an ma siniɲɛsigi ko la.—Romɛkaw 15:4.
BIBULU BƐ MIN FƆ YALA AN BƐ SE KA DA O LA TIGITIGI WA?
Ɔwɔ, kun saba kosɔn:
Bibulu kɔnɔ kumaw tɛ fɔ ɲɔgɔn kɔ. Bibulu sɛbɛnna a ka ca ni san 1600 ye cɛ 40 fɛ. A sɛbɛnnikɛla fanbaw ma deli ka ɲɔgɔn ye. O n’a ta bɛɛ, kitabu kuturu kɔnɔ kumaw tɛ fɔ ɲɔgɔn kɔ, wa a barokun bɛ fɛn kelen de kan.
Bibulu ka maanaw ye tiɲɛ ye. Tuma caman na, fɔlɔ fɔlɔ tariku sɛbɛnnaw tɛ kuma u ka jamana ka sentanya kow kan. Nka Bibulu sɛbɛnnikɛlaw ma u ka filiw ani u ka jamana taw dogo.—2 Tilew Kibaru 36:15, 16; Zaburu 51:1-4.
Bibulu ka kiraya kumaw ye tiɲɛ ye. Bibulu kumana Babilonɛ dugu halakili kan, o kirayakuma fɔra san 200 sani o ka kɛ. (Esayi 13:17-22) A ma dan dɔrɔn ka o dugu halakili cogo fɔ nka a ye o kɛbaga tɔgɔ yɛrɛ fɔ.—Esayi 45:1-3.
Bibulu ka kiraya kuma caman yɛrɛ fana tiimɛna. Yala o tɛ a to i bɛ d’a la ko Bibulu bɔra Ala yɔrɔ?—2 Piɛrɛ 1:21.
I HAKILI JAGABƆ NIN KAN
Ala ka kuma bɛ se ka i ka ɲɛnamaya ɲɛ cogo di?
Bibulu bɛ nin ɲininkali jaabi di ESAYI 48:17, 18 ani 2 TIMOTE 3:16, 17 kɔnɔ.