I bɛ se ka bato lakika dɔn cogo di?

1. Yala diinɛ lakika kelen de bɛ yen wa?

Yesu ye a ka kalandenw kalan diinɛ kelen de ko la, diinɛ lakika. O bɛ iko sira min bɛ taa ɲɛnamaya banbali la. O sira ko la Yesu y’a fɔ ko: “A sɔrɔbaaw man ca”. (Matyiu 7:14) Ala bɛ sɔn bato ma min sinsinnen bɛ a ka kuma tiɲɛma dɔrɔn de kan. Batobaga lakikaw faralen bɛ ɲɔgɔn kan kelenya ani dannaya kelen kɔnɔ.—Zaburu 25:5; Yuhana 14:6; Efesekaw 4:4, 5 kalan.

Wideyo lajɛ min tɔgɔ ye ko Yala Ala bɛ sɔn bato suguw bɛɛ ma wa?

2. Yesu ye mun fɔ Krecɛn nkalonmaw ko la?

Yesu ye lasɔmini kɛ ko kira nkalontigɛlaw na krecɛnya lanɔgɔ. Ni i ye o krecɛn suguw ye i b’a fɔ ko batobaga lakikaw don. Wa u ka Egilisi kɔnɔ mɔgɔw b’a fɔ k’u ye krecɛnw ye. Nka tiɲɛna i bɛ se ka o mɔgɔ suguw dɔn, olu tigi la mɔgɔw kɛcogoya yɛrɛ de fɛ. Cogo di? Bato lakika dɔrɔn de bɛ den krecɛn ɲumanw na, olu minnu bɛ dɔn u jɔgɔw ni u kɛcogow fɛ.—Matiyu 7:13-23 kalan.

3. I bɛ se ka batobaga lakikaw dɔn cogo di?

Ni tamashyɛn duuru minnu bɛ a to i bɛ o dɔn lajɛ:

• Batobaga lakikaw bɛ Bibulu bonya i n’a fɔ Ala ka kuma. U bɛ u ka ɲɛnamaya sinsin a sariyakolow kan. O la danfara bɛ diinɛ lakika ni diinɛ cɛ, minnu bɛ u sinsin Hadamaden hakilinaw kan. (Matiyu 15:7-9) Batobaga lakikaw tɛ fɛn dɔ waaju, ka tila ka ko kɛ, min n’o tɛ bɛn.—Yuhana 17:17; 2 Timote 3:16, 17 kalan.

• 

  Yesu ka kalanden lakikaw bɛ Ala tɔgɔ, Jehova bonya. Yesu ye Ala tɔgɔ bonya a kɛlen ka o tɔgɔ jira mɔgɔw la. A ye mɔgɔ dɛmɛ u ka Ala dɔn, ani k’u kalan u ka delili kɛ walasa tɔgɔ in ka saniya. (Matiyu 6:9) I ka sigiyɔrɔ la, diinɛ jumɛn bɛ Ala tɔgɔ jira mɔgɔw la?—Yuhana 17:26; Romɛkaw 10:13, 14 kalan.

• O krecɛn lakikaw bɛ waajulikɛ Ala ka masaya ko la. Ala ye Yesu ci walasa a ka kibaru duman waajulikɛ masaya ko la. Jigiya kelen min bɛ hadamadenw ye, o ye Ala ka Masaya de ye. Yesu taara a fɛ ka kuma Masaya in kan fɔ ka taa se a ka saya don ma. (Luka 4:43; 8:1; 23:42, 43). Yesu ye a fɔ a ka kalandenw ye k’u ka kan ka waajuli kɛ Masaya ko la. Ni mɔgɔ dɔw gɛrɛ la i la walasa ka kuma i fɛ Ala ka Masaya ko la, o tigi ye diinɛ jumɛn mɔgɔ ye?—Matiyu 24:14 kalan.

• Yesu ka kalandenw sen tɛ ni diɲɛ jugu in na. I bɛ se ka u dɔn kɛcogoya min fɛ, u tɛ u sen don politiki ani siyakɛlɛw la. (Yuhana 17:16; 18:36). O kama, u tɛ u sen don nin diɲɛ kɛwalew ani miirina juguw la.—Yakuba 4:4 kalan.

• Krecɛn lakikaw bɛ kanuya jira ɲɔgɔnna min ɲɔgɔn tɛ yen. Ka kɛɲɛ ni Ala ka kuma ye, u bɛ kalan siyaw bɛɛ bonyali la. Diinɛ nkalonma danfara la, olu minnu ye u sen don ni barika ye siyawoloma kɛlɛw la, batobaga lakikaw tɛ sɔn ka u sen don o ko suguw la. (Mise 4:1-3). Krecɛn lakikaw bɛ baara kɛ n’u ka waati ani fɛn minnu bɛ u bolo ka mɔgɔ wɛrɛw dɛmɛ ani ka dusudon u kɔnɔ, u bɛ o min kɛ gansan.—Yuhana 13:34, 35; 1 Yuhana 4:20 kalan.

4. Yala I bɛ se ka diinɛ lakika dɔn wa?

Diinɛ jumɛn bɛ a ka kalanw sinsin Ala ka kuma kan, ka Ala tɔgɔ bonya, ani ka a waaju ko jigiya kelen min bɛ hadamadenw bolo, o ye Ala ka Masaya ye? Jɛkulu jumɛn bɛ kanuya jira, ka kɛlɛ kɔniya? I ka miiri ye mun ye?—1 Yuhana 3:10-12 kalan.