Yala kibaru duman bɔra Ala yɔrɔ tigitigi wa?

1. Jɔni ye Bibulu tigi ye?

Kibaru duman min b’a jira ko hadamadenw bɛna ɲɛnamaya kɛ badaa dugukolo kan, o sɛbɛnnen bɛ Bibulu kɔnɔ. (Zaburu 37:29) Bibulu ye kitabu misɛnnin 66 dalajɛlen de ye. Ala tɛmɛna mɔgɔ kantigiw 40 de fɛ walasa ka Bibulu sɛbɛn. Kitabu misɛnnin duuru fɔlɔw sɛbɛnna Musa de fɛ a bɛ san 3 500 bɔ. Kitabu misɛnnin labanw sɛbɛnna ciden Yuhana de fɛ a ka ca san 1 900 ye. Jɔni hakilinaw de bɛ Bibulu kɔnɔ? Ala kumana Bibulu sɛbɛnbagaw fɛ a ka hakili senu sababu fɛ. (2 Samuɛl 23:2) U ma u yɛrɛ miirinnaw sɛbɛn a kɔnɔ nka u ye Ala miirinnaw de sɛbɛn. O la Jehova de ye Bibulu tigi ye.—2 Timote 3:16; 2 Piɛrɛ 1:20, 21 kalan.

Wideyo lajɛ min tɔgɔ ye ko Jɔni ye Bibulu tigi ye?

2. An bɛ se ka da a la tigitigi cogo di ko Bibulu ye tiɲɛ ye?

An dalen b’a la ko Bibulu bɔra Ala yɔrɔ, bawo a bɛ ko nataw fɔ ka u perepere latigɛ. Hadamaden si tɛ se k’o kɛ. (Josue 23:14) Se bɛɛ tigi Ala kelenpe dɔrɔn de bɛ se ka hadamadenw ka ko nataw fɔ k’a jɛya.—Esayi 42:9; 46:10 kalan.

An bɛ se ka sigi n’a ye ko kitabu min bɔra Ala yɔrɔ, o ɲɔgɔn tɛ yen. Bibulu miliyɔn caman de tilatilalen bɛ kan kɛmɛ ni kɔ la. Bibulu n’a ka kɔrɔya bɛɛ, ni a bɛ kuma science kan, a bɛ tiɲɛ fɔ. Wa, a sɛbɛnbaga 40 tɛ fɔ ɲɔgɔn kɔ.a Ka fara o kan siga tɛ a la ko Bibulu sinsinnen bɛ Ala ka kanuya de kan, wa se bɛ a ye ka an ka ɲɛnamaya ɲɛ. Nin bɛɛ de kosɔn, mɔgɔ miliyɔn caman dalen b’a la ko Bibulu ye Ala ka kuma ye.—1 Tesalonikekaw 2:⁠13 kalan.

Wideyo lajɛ min tɔgɔ ye ko An bɛ se ka da a la tigitigi cogo di ko Bibulu ye tiɲɛ ye?

3. Bibulu ka barokun ye mun ye?

Bibulu ka barokun ye kibaru duman ye, o min ye Ala sago ye ka ɲɛsin hadamadenw ma. A kɔnɔna kumaw bɛ ɲɛfɔli kɛ bonya kan min tun dira hadamadenw ma ka ɲɛnamaya kɛ Alijɛnɛ kɔnɔ dugukolo kan, o tiɲɛna cogoya min na kabini fɔlɔ-fɔlɔ, ani Alijɛnɛ bɛna segin kokura cogo min na.—Jirali 21:4, 5 kalan.

Sariyaw ni sariyakolow ani laadiliw bɛ sɔrɔ Ala ka kuma kɔnɔ. Ka fara o kan, Bibulu bɛ kuma tarikuw kan minnu tɛmɛna Ala ni hadamadenw cɛ. O tariku tɛmɛnenw ye Ala ka kɛcogo bɔ kɛnɛkan. O la, Bibulu bɛ se ka i dɛmɛ ka Ala dɔn. A bɛna a ɲɛfɔ i ye cogo min na i bɛ se ka kɛ a teri ye.—Zaburu 19:8, 12; Yakuba 2:23; 4:8 kalan.

4. Cogo jumɛn na i bɛ se ka Bibulu faamuya?

Nin gafenin bena i dɛmɛ ka Bibulu faamu bawo a bɛ tugu fɛɛrɛ dɔw kɔ Yesu ye min kɛ. A tun bɛ Bibulu tɛmɛsiraw ta kelen-kelen ka ɲɛfɔli kɛ u kan walisa mɔgɔw ka “Kitabuw kumaw faamu.”—Luka 24:27, 45 kalan.

Fɛn wɛrɛw bɛ yen, min bɛ an kabakoya i n’a fɔ kibaru duman min bɛ bɔ Ala yɔrɔ. O n’a ta bɛɛ, mɔgɔ dɔw mago tɛ a la, ani a bɛ dɔw yɛrɛ dusubɔ. O kana i farifaga. Jigiya min bɛ i la ka ɲɛnamaya banbali sɔrɔ, o bɛ bɔ i ka dɔnniya de la Ala kan.—Yuhana 17:3 kalan.