Matigi ka surɔfana ye seli dɔ ye min bɛ nɔɔrɔ da Ala kan

KRECƐNW ye nin cikan sɔrɔ ko u ka Krisita ka saya Hakilijigin kɛ. O ko bɛ wele fana ko “Matigi ka fana”. (1 Kɔrɛntekaw 11:20, BS) Mun na o surɔfana nafa ka bon? Waati jumɛn ani cogo jumɛn na o ka kan ka kɛ?

JYesu ye o ko sigi Yahutuw ka Tɛmɛnkan seli su fɛ san 33, Krisita tile la. Tɛmɛnkan seli tun bɛ kɛ san kɔnɔ siɲɛ kelenpe dɔrɔn, n’o bɛ bɛn Yahutuw ka Nisan kalo tile 14 don ma. Walisa ka o don jate, tubabuw bɛ don min wele ko équinoxe de printemps, kow b’a jira ko Yahutuw tun bɛ o de makɔnɔ. O ye don ye min tile ye lɛrɛ 12 ɲɔgɔnna ye ani su ye lɛrɛ 12 ɲɔgɔnna ye. Kalo kura fɔlɔ min tun bɛ ye sankolo la équinoxe de printemps kɔfɛ, o tun bɛ Nisan kalo daminɛ de jira. Tɛmɛnkan seli tun bɛ bɛn tile 14 tɛmɛnen o kɔfɛ, tile binnen kɔ.

Yesu ye Tɛmɛnkan seli kɛ ni a ka kalandenw ye. A kɛlen ka Juda Isikariɔti bila ka taa, o kɔfɛ a ye Matigi ka surɔfana sigi. Matigi ka surɔfana kɛli bilala Yahutuw ka Tɛmɛnkan seli nɔ na. O la, an ka kan ka o kɛ siyɛn kelenpe san kɔnɔ.

Matiyu ka kitabu b’a fɔ ko: “Ka u to dumuni la, Yesu ye nbuuru ta ka barika da Ala ye, ka o karikari k’a di a ka kalandenw ma. A y’a fɔ u ye ko: ‘A’ ye dɔ ta ka a dun, nin ye ne farikolo ye.’ O kɔ, a ye jifilen ta ka barika da Ala ye k’a di u ma, a ko: ‘Aw bɛɛ ka dɔ min nin na, sabu nin ye ne joli ye, Ala ka layidu sigili joli. A bɔnna mɔgɔ caman ka jurumuw yafa kama.’ ”—Matiyu 26:26-28.

Dɔw dalen b’a la ko Yesu ye nburu yɛlɛma k’a kɛ a farikolo yɛrɛ ye ani ka duwɛn yɛlɛma k’a kɛ a joli ye. Nka Yesu farikolo tora a cogoya la tuma min na a ye nburu di u ma. Yala a ka cidenw tun bɛ ka a farikolo yɛrɛ de dun ani ka a joli de min wa? Ayi, bawo o ye ka kɛ mɔgɔsogodunna ye, wa o ko tun bɛna Ala ka sariya sɔsɔ. (Jenɛse 9:3, 4; Levitike 17:10) Ka kɛɲɛ ni Luka 22:20 ye, Yesu b’a fɔ ko: “Nin jifilen ye Ala ka layidu kura ye, o layidu tara ne joli la, o bɔnna aw kosɔn.” Yala o jifilen kɛra “layidu kura” yɛrɛ-yɛrɛ de ye wa? O tɛ se ka kɛ cogo si la bawo layidu ye bɛnkan de ye, nka o tɛ fɛn ye an bɛ se ka maga min na.

O la sa, nburu ani duwɛn ye taamasyɛnw dɔrɔn de ye. Nburu bɛ Krisita farikolo dafalen de taamasyɛn. Nburu tɔ minnu tun tora Tɛmɛnkan seli dumuni kɔfɛ, Yesu ye o nburu kelen de ta. Fununna tun tɛ o nburu la. (Ekisode 12:8) Bibulu kɔnɔ, funnunna bɛ jurumu walima fɛn tiɲɛnen taamasyɛn de jira. O la sa, nburu bɛ Yesu farikolo dafalen taamasyɛn, a ye min saraka. Jurumu fosi tun tɛ a la.—Matiyu 16:11, 12; 1 Kɔrɛntekaw 5:6, 7; 1 Piɛrɛ 2:22; 1 Yuhana 2:1, 2.

Duwɛn bilenman bɛ Yesu joli de taamasyɛn. O joli b’a to layidu kura bɛ kɛ layidu sigilen ye. Yesu ko a joli bɔnna “jurumu yafa kama.” O kɛlen, hadamadenw bɛ se ka saniya Ala ɲɛkɔrɔ ani u bɛ se ka don layidu kura kɔnɔ min bɛ u ni Jehova cɛ. (Heburuw 9:14; 10:16, 17) O layidu kura walima o bɛnkan b’a to Krecɛn kantigi mɔgɔ 144 000 ka taa sankolo la. U bɛna baara kɛ yen i ko masakɛw ani sarakalasebagaw diɲɛ bɛɛ ka nafa kama.—Jenɛse 22:18; Jeremi 31:31-33; 1 Piɛrɛ 2:9; Jirali 5:9, 10; 14:1-3.

Jɔni ka kan ka Hakilijigin taamasyɛn fɛnw ta? Cogo bɛnnen na, mɔgɔ minnu sen bɛ layidu kura la, olu ye mɔgɔw ye jigiya bɛ minnu na ka taa sankolo la, olu de ka kan ka nburu ani duwɛn ta. Ala ka hakili senu b’a sɛmɛntiya u ye ko u sugandira walisa ka kɛ masakɛ ye sankolo la. (Romɛkaw 8:16) U sigira fana Masaya kunna Yesu kɛrɛ fɛ.—Luka 22:29.

An bɛ se ka mun fɔ mɔgɔw ko la, ɲɛnamaya banbali jigiya bɛ minnu ye dugukolo kan? U bɛ Yesu ka ci fɔlen mara min ye ka taa Matigi ka surɔfana kɛnɛ kan. U bɛ na Matigi ka surɔfana na ni bonya ye, nka u tɛ nburu ani duwɛn ta. Siyɛn kelen san kɔnɔ tile binnen kɔfɛ, Nisan kalo tile 14, Jehova Seerew bɛ Matigi ka surɔfana kɛ. Hali ni mɔgɔ ba damadɔ dɔrɔn diɲɛ kɔnɔ de b’a fɔ ko u ye jigiya sɔrɔ ka ɲɛnamaya kɛ sankolo la, nin ko ye fɛn nafamaba ye Krecɛn bɛɛ fɛ. A bɛ cogoya di u ma ka miiri kanuyaba la Jehova Ala ani Yesu Krisita ye min kɛ u ye.—Yuhana 3:16.