Mun bɛ kɛ ni mɔgɔ sara?

Saya ni ɲɛnamaya kɔdonnen don ɲɔgɔn ma. Saya bɛ iko sunɔgɔba. (Yuhana 11:11-14) Mɔgɔ salen tɛ se ka mɛnni kɛ, ka yeli kɛ, ka kuma walima ka miiri fɛn dɔ la. (Ekilesiaste (Waajulikɛla) 9:5, 10) Nkalon diinɛ bɛ mɔgɔw kalan ko mɔgɔ salen bɛ taa danfɛn hakilima yebaliw ka yɔrɔ la walasa ka balo a bɛnbaw fɛ. Nka, Bibulu t’o fɔ.

Mɔgɔ minnu sara, olu tɛ se k’an dɛmɛ, wa, u tɛ se fana ka kojugu kɛ an na. Tuma caman na, mɔgɔw bɛ laadaw labato, ka sarakaw bɔ bawo u b’a miiri k’o fɛnw ka di mɔgɔ salenw ye. O fɛnw ka go Jehowa ye katuguni u sinsinnen bɛ Sitanɛ ka nkalonw dɔ la kelen de kan. O fɛnw tɛ se ka diya mɔgɔ salenw fana ye bawo u tɛ ɲɛnamaya la. An man kan ka siran mɔgɔ salenw ɲɛ. An man kan k’u bato. An ka kan ka Ala kelenpe dɔrɔn de bato.—Matiyu 4:10.

Mɔgɔ salenw bɛna segin ɲɛnamaya la ko kura. Jehowa bɛna mɔgɔ salenw laɲɛnamaya alijinɛ kɔnɔ dugukolo kan. Nka, o ye ko nata de ye. (Yuhana 5:28, 29; Kɛwalew 24:15) Ala bɛ se ka mɔgɔ salenw lakunun iko i bɛ se ka mɔgɔ lakunun cogo min na ka bɔ sunɔgɔ la.—Marka 5:22, 23, 41, 42.

Kalansira min b’a fɔ k’an tɛ sa, o ye nkalon dɔ ye min jɛnsɛnna Sitanɛ Sendonbaga fɛ. Sitanɛ ni jinɛw ye mɔgɔw bila ka miiri ko furew bɛ ɲɛnamaya la, k’olu de fana bɛ se ka kɛ banaw ni gɛlɛya wɛrɛw sababu ye. Tuma dɔw la yɛrɛ, Sitanɛ bɛ mɔgɔw lafili ni sugo ani yelifɛnw ye. Nka, mɔgɔ minnu b’a ɲini ka kuma mɔgɔ salenw fɛ, Jehowa bɛ jalaki bin o mɔgɔw kan.—Dutɛrɔnɔmɛ 18:10-12.