Jɔn ye Ala teriw ye?

Yesu Krista ye Jehowa denkɛ ye. A teri kanulen don min ka surun a la ni bɛɛ ye. Sanni a ka balo dugukolo kan i n’a fɔ hadamaden, Yesu tun bɛ balola sankolo la iko danfɛn hakilima setigi yebali dɔ. (Yuhana 17:5) Kɔfɛ, a nana dugukolo kan ka mɔgɔw kalan tiɲɛ na Ala ko la. (Yuhana 18:37) A y’a ka hadamaden ɲɛnamaya fana di walasa ka hadamadenw kisi ka bɔ jurumu ni saya la, hadamaden minnu bɛ Ala kanminɛ. (Romɛkaw 6:23) Yesu ye Ala ka Masaya Masakɛ ye sisan. O sankolola masaya bɛna Alijinɛ sigi nin dugukolo in kan.—Jirali 19:16.

Mɛlɛkɛw fana ye Ala teriw ye. Hadamadenw ka ɲɛnamaya daminɛna dugukolo kan, nka mɛlɛkɛw ta ma kɛ ten. U dara sankolo la sanni Ala ka dugukolo yɛrɛ da. (Job 38:4-7) Mɛlɛkɛ miliyɔn caman de bɛ yen. (Daniɛl 7:10) U ye Ala teriw ye sankolo la. U b’a fɛ mɔgɔw ka tiɲɛ dɔn Jehowa kan.—Jirali 14:6, 7.

Teriw bɛ Ala fɛ dugukolo fana kan. A b’u wele a ka Seerew. Kiritigɛyɔrɔ la, seere bɛ min dɔn mɔgɔ dɔ, walima fɛn dɔ kan, a b’o fɔ. Jehowa Seerew bɛ min dɔn Jehowa n’a kuntilenna kan, u b’o fɔ tɔw ye. (Esayi 43:10) Iko mɛlɛkɛw b’a fɛ cogo min na, Seerew b’a fɛ fana k’i dɛmɛ ka tiɲɛ dɔn Jehowa kan. U b’a fɛ e fana ka kɛ Ala teri ye.