Ala teriw bɛna sigi Alijinɛ kɔnɔ

Alijinɛ tɛna kɛ iko an bɛ diɲɛ min na bi. Dugukolo ka fa ɲagami, dusukasi, dimin ni tɔɔrɔw la, o ma kɛ Ala sago ye abada. Ala bɛna dugukolo kɛ alijinɛ ye don nataw la. Alijinɛ bɛna kɛ cogo di? An k’a lajɛ Bibulu bɛ min fɔ o ko la:

Mɔgɔ ɲumanw. Alijinɛ bɛna kɛ Ala teriw sigiyɔrɔ ye. U bɛna koɲuman kɛ ɲɔgɔn ye. U bɛna u ka diɲɛnatigɛ kɛ ka bɛn Ala ka sira tilennenw ma.—Ntalenw 2:21.

Suman camanba. Kɔngɔ bɛna ban pewu alijinɛ kɔnɔ. Bibulu b’a fɔ ko: ‘Sɛnɛfɛnw [walima dumuni] na caya dugukolo kan.’—Zaburu 72:16, NW.

So cɛɲiw ani baara ɲuman. Denbaya kelen-kelen bɛɛ bɛna a tɔgɔla du sɔrɔ Alijinɛ kɔnɔ. Mɔgɔ bɛɛ ka baara bɛna u nisɔndiya.—Esayi 65:21-23.

Hɛrɛ bɛna kɛ diɲɛ fan bɛɛ la. Mɔgɔw tɛna kɛlɛ kɛ tun, wa, u tɛna sa kɛlɛ la fana. Ala ka Kuma b’a fɔ ko: ‘Ala bɛ kɛlɛ ban.’—Zaburu 46:9, 10.

Kɛnɛya. Bibulu ye layidu ta ko: ‘O dugu [Alijinɛ] mɔgɔ si tɛn’a fɔ ko ale man kɛnɛ.’ (Esayi 33:24) Mɔgɔ si tɛna kɛ senkelen, fiyɛntɔ, tulogeren, walima bobo ye.—Esayi 35:5, 6.

Dimin ni dusukasi ani saya bɛna ban. Ala ka Kuma b’a fɔ ko: “Saya tɛna kɛ tun, ɲɛnasisi fana tɛna kɛ tun, walima kasi, walima dimin katuguni fɛn fɔlɔw tɛmɛnna.”—Jirali 21:4.

Mɔgɔ juguw bɛna bɔ yen. Jehowa ye layidu ta ko: “Mɔgɔ juguw na halaki ka bɔ dugukolo kan; janfanciw dili na sama ka bɔ yen.”— Ntalenw 2:22, NW.

Mɔgɔw bɛna ɲɔgɔn kanu, ka ɲɔgɔn bonya. Tilenbaliya, natabaya, koniya, ani degunw ye fɛnw ye minnu tɛna kɛ tun. Kelenya bɛna kɛ mɔgɔw cɛ. U bɛna u ka diɲɛnatigɛ kɛ ka kɛɲɛ ni Ala ka sira tilennenw ye.—Esayi 26:9.