Ọga Na Ya Gha Gbe Ehẹn Vbe Ẹghẹ Nẹdẹ

Emwa ni gele tie Baibol gha rẹn wẹẹ, ọgbehẹn ẹre erhuanegbe Jesu eso ghaa khin. (Mak 1:​16-20) Ọga ẹre iran ghaa loo ya gbe ehẹn vbe Okun e Galili.

Irri e linẹn ẹre a ya gha do ọga na ya gha gbe ehẹn vbe ẹghẹ nẹdẹ. Vbene ehẹn ne iran khian yae gbe kpọlọ sẹ hẹ, ẹre ọ khian ta vbene uvun nọ rre ọga nii khian vbẹ sẹ hẹ. Ọ ghaa re ọga ni ma kpọlọ gbe, iran ghi dee emwi nọ nọkhua vbe na ghee ugbe ginnaẹn nọ mieke na sẹtin dinmwi ye uwu ẹzẹ, sokpan, ọ ghaa re ọga nọ kakabọ kpọlọ iran ghi dee emwi nọ khua ye ototọ re, iran ghi vbe dee erhan nekherhe kherhe ye uhunmwu ẹnrẹn, ne uhunmwu ẹnrẹn nii ghẹ mieke na dinmwi.

Igho ọrhẹnrhẹn ẹre a ya gha dẹ ọga. Ugbẹnso avbe okuta ni rre uwu okun kevbe ehẹn ni kakabọ bun sẹtin sọ ọga na. (Luk 5:6) E Baibol gi ima rẹn wẹẹ, ọ mwẹ asẹ ọkpa ne Jems vbe Jọn ya “gha dọlọ ọga ne iran ya gbe ehẹn yi”​—ọ gha kẹ, olodẹ kevbe irri e linẹn ẹre iran loo ro. (Mat 4:21) A sẹtin miẹn wẹẹ, ẹghẹ ke ẹghẹ ne avbe ọgbehẹn ya gbe ehẹn fo ẹre iran ya dọlọ ọga ọghe iran yi. E Luk vbe guan kaẹn avbe ọgbehẹn ni ghaa “họ ọga ọghe iran” ne iruẹn nọ rrọọ mieke na la hin. (Luk 5:2) Iyeke ọni, iran ghi taẹn ye ovẹn​—nẹ ghẹ mieke na kẹkẹ.​—Ẹzik 47:10.

E Jesu keghi gie na tie ikpia eso ni ghaa ya ọga munọ ehẹn ne iran do gha “munọ emwa nagbọn.”