De Emwamwa Ne Osanobua Mwẹ Ne Ima?

U GHA tie ebe iyẹn, u na ghee ẹkpẹti ughe ra u na vbe danmwehọ iyẹn vbe ẹkpẹti ọta, emwi ne u bẹghe ra emwi ne u họn ma gberra okha ọghe uyinmwẹ ọkhọ, okuo kevbe oguomizan. Ughaghe uwẹ tobọ uwẹ vbe rri oya emianmwẹ ra u rre uwu akhiẹ, rhunmwuda ọmwa ne u hoẹmwẹ ọnrẹn nọ wu.

Nọ egbuẹ:

Ọna ọre emwamwa ne Osanobua mwẹ ne imẹ vbe ẹgbẹe mwẹ ra?
De ọmwa nọ gha sẹtin ru iyobọ mẹ ya zin egbe ọlọghọmwa hia ne I ye?
Ọ mwẹ ẹghẹ ne emwa hia khian ya gele gha mwẹ ọfunmwegbe nọ sẹ otọ ẹko ra?

E Baibol rhie ewanniẹn ni fu ọmwa ekhọe rre ye avbe inọta na.

E BAIBOL MAA IMA RE WẸẸ OSANOBUA GHA RU EMWI ỌYUNNUAN VBE UHUNMWU OTAGBỌN.

Ai ghi miẹn obalọ, ai ghi khian ọmaẹn, ai ghi vbe wu.—Arhie Maan 21:4
“Arọ gha san ghe odukhunmwu.”—Aizaia 35:6
“Arhuaro gha bẹghe odẹ.”—Aizaia 35:5
A gha huẹn emwa ni wulo kpaegbe vbe idin.—Jọn 5:28, 29
Ai ghi miẹn ọmwa nọ khuọnmwi.—Aizaia 33:24
Te evbare khian kpọ kua vbe ehe hia vbe uhunmwu otagbọn.—Psalm 72:16

AFIANGBE NA MIẸN VBE EMWI NE BAIBOL MAA IMA RE

Ọkpa vbe Osẹe Jehova gha gu ọmwa ruẹ e Baibol

U sẹtin gha roro ẹre wẹẹ emwi ne u ruẹ re vbe ipapa 4 kevbe 5 ọghe ebe na keghi re emwi na miẹn vbe imina, ne ẹi khian sunu ẹdẹ. Sokpan, Osanobua yan rẹn nẹ wẹẹ, vbe ne ẹi khian ghi kpẹẹ gbe, irẹn gha fi emwi hia werriẹ vbe uhunmwu otagbọn. E Baibol gi ima rẹn vbe nọ khian ya ru ẹre hẹ.

Ẹi re ọni ọkpa, e Baibol ye vbe tama ima emwi nọ khẹke ne ima ru ne ima mieke na gha sọyẹnmwẹ arrọọ vbe ẹghẹ na. Muẹn roro emwi eso nọ ya ruẹ si osi. Ọ sẹtin gha re ẹmwẹ igho, ẹmwẹ ẹgbẹe, emianmwẹ ra uwu ọghe ọmwa ne u hoẹmwẹ ọnrẹn. E Baibol gha sẹtin ru iyobọ nuẹn, ne u ya gu avbe ọlọghọmwa na loo, kevbe wẹẹ, ewanniẹn nọ rhie ye avbe inọta na gha rhie ifuẹko nuẹn:

Vbọsiẹ ne ima na susẹ?
De vbene ima khian ya sẹtin zin egbe ọlọghọmwa ne ima ye?
Ẹgbẹe ima gha sẹtin gha mwẹ oghọghọ ra?
Vbọ sunu daa ima vbe ima gha wu?
Ma gha ye werriegbe miẹn emwa ne ima hoẹmwẹ ọnrẹn ni wulo ra?
Vbọzẹe ne ima na mwẹ ilẹkẹtin wẹẹ Osanobua gha mu eyan rẹn hia sẹ?

Ne u na tie ebe na rhiẹre ma wẹẹ, u gele hoo ne u rẹn ẹmwata nọ rre Baibol. Ebe na gha ru iyobọ nuẹn. Inọta rre dọmwadẹ okhuẹn nọ gha ya ruẹ rẹn e Baibol sayọ. Ẹbo emwa nibun wa ghọghọ ye Baibol ne Avbe Osẹe Jehova gu iran ruẹ. Ma yaro yọ wẹẹ, erriọ khian vbe gha ye nuẹn. Osanobua gha fiangbuẹ zẹvbe ne u ya mwẹ irẹnmwi ọghe Baibol sayọ!

HIA NE U RẸN E BAIBOL RUẸ SAYỌ

EBE 66 ẹre ọ rre Baibol. Dọmwadẹ ebe na keghi mwẹ uhunmwu ẹnrẹn kevbe uviẹn ọnrẹn. Ọna ẹre ọ si ẹre ne ẹi na lọghọ na miẹn uviẹn na sunu yi. A gha sunu ye ako rhọkpa vbe evbagbẹn nọhuanrẹn vbuwe ebe na, enọmba nọ sikẹ eni ebe ọghe Baibol ọre uhunmwu ẹnrẹn, enọmba nọ ghi lelẹe ọre uviẹn ọnrẹn. Vbe igiemwi, u gha miẹn “2 Timoti 3:16,” ọni ọre ebe nogieva na gbẹn gie Timoti, uhunmwu ẹnrẹn 3, uviẹn ọnrẹn 16.

U ghaa wee ẹre, u na vbe gha tie ako ọghe evbagbẹn nọhuanrẹn hia na sunu yi vbe ebe na, u i khian ghi gha ye urri ẹdẹ ohoho gualọ ako na sunu yi. U sẹtin vbe suẹn e Baibol na tie ẹdẹgbegbe. U na sẹtin gha tie uhunmwu ẹnrẹn eha ya mu isẹn vbe ẹdẹ, u gha sẹtin tie ẹre fo vbe ukpo ọkpa.