Habakọk
2 Eo Jehova, inu igba ẹre I gha tu nọ iyobọ vbe obọ ruẹ, sokpan u i zẹyọ mwẹ re? Inu igba I gha nọ iyobọ ne u do miẹn ima fan hin obọ uyinmwẹ ọkpankpan rre, sokpan u i ru emwi rhọkpa? 3 Vbua ghi na gu mwẹ miẹn ọlọghọmwa vbenian hẹ? Vbọzẹ ne u na zin egbe gha ghee emwa ni ya obọ yẹnyẹn emwa mu otọ? Vbọzẹ ne omurhia kevbe ọkpankpan na ọ lẹga mwẹ? Igbinna kevbe ẹzọ wa vbe rre ehe hia. 12 Eo Jehova, ke etẹbitẹghori gha dee, uwẹ ọre Osanobua. Uwẹ ọre Osanobua mwẹ Nọ Huanrẹn, nẹi wu. Jehova, uwẹ keghi hannọ iran zẹ, ne iran gha bu ohiẹn; Okuta mwẹ, uwẹ keghi ya iran wegbe ne iran miẹn ehe na rri ima oya. 13 Aro ruẹ huan gbe nọ gha sẹtin ghee ọkhọ, wẹ i vbe sẹtin gha ghee ughe vbe emwa ra gha ru emwi dan. Sokpan, vbe uwẹ ra sẹtin zin egbe avbe igbẹki ne emwa dan na hẹ yi? Vbọzẹ ne uwẹ na hunwan yi vbe iran dunmwu emwa ni maan sẹ iran rua?