Ọba ighẹ e Devid wa rẹn e Jehova, erriọ vbe ya mu ẹtin yan rẹn. Vbe avbe eghian rẹn ghaa khu ẹre khian, ya sẹ egbe Ọba ighẹ e Sọl, e Devid keghi na erhunmwu gie Jehova nọ ru iyobọ ne irẹn. Osanobua keghi họn erhunmwu e Devid, ọ na gele miẹn ọnrẹn fan, ẹre Devid na ghi kha wẹẹ: “E Jehova rrọọ!” (Psm 18:46) Ẹmwẹ ne Devid ta na rhie ẹre ma wẹẹ, ọ rẹnrẹn we Jehova rrọọ, sokpan ẹ i re ọni ọkpa. Ebe ọkpa khare wẹẹ, ẹmwẹ ne Devid ta na rhie ẹre ma wẹẹ, ọ mu ẹtin yan e Jehova zẹvbe “osa nọ rrọọ, nọ ru iyobọ ne emwa rẹn vbe ẹghẹ hia.” Gele gele emwi ne Devid miẹn vbe agbọn yae rẹn wẹẹ, Osanobua rrọọ; ọna ẹre ọ ghi ru iyobọ ne Devid nọ na ye gha ga e Jehova, ọ na vbe gha rhie urhomwẹ nẹẹn. (Psm 18:​28, 29, 49) Ma gha gele yayi wẹẹ, e Jehova ọre Osanobua nọ rrọọ, ọ gha ru iyobọ ne ima ya gha ya ekhọe hia gae. Ọna gha rhie ẹtin ne ima ya sẹtin zin egbe edanmwẹ, ọ gha ru iyobọ ne ima ya gha ru vbene ẹtin ima sẹ vbe ugamwẹ e Jehova, ọ gha vbe ru iyobọ ne ima ya rhikhan mu e Jehova. w24.06 20-21 ¶3-4

Vbe ima miẹn ruẹ vbe ibude ne ukọ ighẹ e Pọl rhie ne etẹn ni rre Tẹsalonaika? Ma gha họn iyẹn nọ ma gua ilele ọghe Baibol ro ra nọ kpa ọmwa odin, ọ khẹke ne ima loo ẹwaẹn. Vbe ẹghẹ ọghe Soviet Union, avbe eghian ọghe ima keghi ghae elẹta ne avbe etẹn ima, iran na ta ohoghe wẹẹ igiogbẹ ọghe ima ẹre avbe elẹta na ke rre. Vbe nene elẹta, iran keghi rhie igiọdu ne etẹn eso ne iran mu otu ọghe obọ iran gbọọ. Ọ na wa khọ wẹẹ, otu ẹre ọ gele gbẹn elẹta nii rre. Sokpan avbe etẹn ni mudia ẹse ma de ye ifi na. Iran keghi bẹghe ẹre wẹẹ, emwi nọ rre elẹta nii ma gua ẹre ro, emwi na he ma iran re. Vbe ẹdẹnẹrẹ, avbe eghian ọghe ima keghi hia ne iran loo intanẹt ya mu ima rẹrẹ, ne ima ghẹ mieke na gha mwẹ akugbe. Ne ima gha te ya “gi odẹ ne [ima] ya roro emwi rherhe wa gha lighi ye [ima] aro,” ọ khẹke ne ima mu ukpa mu uwerhẹn ghee emwi ne ima họẹn ra emwi ne ima tie re, deghẹ ọ gua emwi nọ rre uwu e Baibol ro.​—2 Tẹs 2:2; 1 Jọn 4:1. w24.07 12 ¶14-15

Azẹ nọ ghi ru ekpataki sẹ ne ọmwa gha sẹtin ru ọre nọ ya egbe ẹre fiohan ne Jehova, ọ ghi do gha re ọkpa vbe ẹgbẹe ọre. Emwi ne Jehova hoo ne emwa hia ru ẹre na khin. Vbọzẹ? Ọ hoo ne iran gha re ọsie irẹn kevbe ne iran gha rrọọ vbe etẹbitẹ. (Diut 30:​19, 20; Gal 6:​7, 8) Vbọrhirhighayehẹ, e Jehova i kpikpi emwa ne iran do ga irẹn. Ọ hoo ne dọmwadẹ ọghẹe ya ekhọe ọre zẹ ne egbe ẹre. Ovbi Otu e Kristi nọ dinmwiamẹ nẹ, gha ghi ru orukhọ nọ wegbe ghi vbo? Adeghẹ ọ ma na fi werriẹ, a ghi rhie ẹre hin iko rre. (1 Kọr 5:13) Ọrheyerriọ, e Jehova wa hoo ne ọmwa nọ ru orukhọ werriegbe bu irẹn gha dee, uhiẹn, ọni ẹre ọ si ẹre nọ na kpemehe izọese adẹwerriegbe, nọ mieke na sẹtin yabọ ọmwa orukhọ nọ roro iro fi uyinmwẹ werriẹ. Osa nọ mwẹ ahoẹmwọmwa ne ima ga keghi rhie igiọdu ne emwa orukhọ ne iran roro iro fi uyinmwẹ werriẹ.​—Zẹk 1:3; Rom 2:4; Jems 4:8. w24.08 14 ¶1-2