Emwa Ni Bun Wa Si Osi Ye Ọlọghọmwa Ne Intanẹt Si Ye Avbe Igbama Egbe

Vbe ukpo 2025 arriọba ni bun keghi guan kaẹn ọlọghọmwa ne eke na na gu emwa guan vbe intanẹt he si ye avbe igbama egbe. Ẹvbo ọkpa mu awua yọ nẹ, ne emwa ni ma re sẹ ukpo 16 ghẹ ghi gha loo eke na na gu emwa guan vbe intanẹt, avbe ẹvbo ọvbehe wa vbe hoo ne iran ru vberriọ.

Avbe igbama eso wa vbe kue yọ wẹẹ, eke na na gu emwa guan vbe intanẹt gha sẹtin zẹ ẹbe. Vbe April 2025, Pew Research Center nọ rre United State keghi guan kaẹn emwi ne igbama eso ne iran nọ re ọta tae, iran khare wẹẹ, “orhunmwu 48 vbe uwu igbama 100 ni rre odẹ ukpo 13 ya sẹ 17 kue yọ wẹẹ, eke na na gu emwa guan vbe intanẹt wa si ọlọghọmwa ye ihua iran egbe.”

Avbe ọbo ebo vbe tae wẹẹ, eke na na gu emwa guan vbe intanẹt gha sẹtin mu iziro ọghe avbe igbama rhia. Vbe ne ukpo, Dr. Vivek Murthy, nọ re U.S. surgeon general keghi kha wẹẹ: “Te vbene avbe igbama ni bun ya roro emwi ghi wa mwẹ vbene ọ ye hẹ, eke na na gu emwa guan vbe intanẹt ẹre ọ wa mobọ si ẹre.”

De vbene evbibiẹ emọ khian ya ru iyobọ ne ivbi iran hẹ, ne iran ghẹ ya de ye ẹbe nọ lele intanẹt khian? Adia eso rre Baibol ni gha wa ru iyobọ.

Emwi ne evbibiẹ emọ gha sẹtin ru

Gi ima guan kaẹn adia eso ni rre Baibol.

“Avbe umẹwaẹn, te iran ghee owẹ zẹ vbe otọ.”—Itan 14:15.

Rhunmwuda ẹbe nọ lele intanẹt khian, ghẹ gha roro ẹre wẹẹ, te ọ khẹke ne u kue ne ovbuẹ gha loo intanẹt. U ke kue ne ovbuẹ gha loo intanẹt, ọ khẹke ne u rẹn deghẹ ọ mwẹ ẹwaẹn nọ khian ya gha lele uhi ne u gbe nẹẹn, vbene ọ dekaẹn inu ẹghẹ nọ khian gha gbe vba, aro ọse nọ khẹke nọ gha mwẹ kevbe aro ughe nọ khẹke nọ gha ghee vba.

• Deghẹ u hoo ne u rẹn sayọ, ya tie avbe uhunmwuta na, “Should My Child Use Social Media?” kevbe “Teaching Your Teenager Social Media Safety.”

“Wa ghi gha loo ẹghẹ ọghe uwa ẹse.”—Ẹfisọs 5:16.

U gha kue yọ ne ovbuẹ gha la eke na na gu emwa guan vbe intanẹt, ọ khẹke ne u yi uhi eso nẹẹn, u ghi vbe rhan otọ vbene avbe uhi na khian ya ru iyobọ nẹẹn hẹ. Gha rhie aro sẹ otọ ne u mieke na rẹn deghẹ odẹ nọ ya yin fi werriẹ ke obọ nọ ya suẹn gha loo intanẹt, ọna gha ya ruẹ rẹn deghẹ ọ khẹke ne u ye gbe uhi nẹẹn, vbe nọ dekaẹn vbene ọ ya loo ẹre hẹ.

• Loo e vidio ọghe katun na vinnọ ye ebọdi nọ khare wẹẹ, Gha Ya Ẹwaẹn Loo Ehe Ne A Na Zẹ Ọse Vbe Intanẹt ya gi ovbuẹ rẹn vbene ọ khẹke nọ ya gha loo intanẹt hẹ.

U ghaa hoo ne u rẹn sayọ vbekpa emwi ọvbehe ne Baibol tae wẹẹ, evbibiẹ emọ gha sẹtin ru, ya tie uhunmwuta na, “Top Health Official Warns of Social Media’s Effect on Young People—What Does the Bible Say?”

Ruẹ sayọ

E Baibol tae ye otọ wẹẹ, “te emwi hia khian gha lọghọ” vbe ẹghẹ ne ima ye na. (2 Timoti 3:1-5) Sokpan, e Baibol vbe tama ima ẹmwẹ ibude eso nọ gha ru iyobọ ne ima ya sẹtin zin egbe. Evbibiẹ emọ kevbe emọ gha miẹn uhunmwuta ni gberra 20, ni guan kaẹn ilele eso ni rre Baibol ni gha ru iyobọ ne iran, vbe uhunmwuta nọ khare wẹẹ, “Vbene Avbe Igbama Ni Bun Ghi Ya Roro Emwi Ghi Wa Mwẹ Vbene Ọ Ye Hẹ​—De Emwi Ne Baibol Tae?”